ភ្នំពេញ៖ រដ្ឋាភិបាលកំពុងសម្លឹងពង្រីកការដំឡើងអំពូលភ្លើងប្រើថាមពលព្រះអាទិត្យនៅតាមផ្លូវជាតិដែលមានចរាចរណ៍មមាញឹក និងតំបន់ដែលមានហានិភ័យគ្រោះថ្នាក់ខ្ពស់ ខណៈរដ្ឋមន្ត្រីក្រសួងសាធារណការ និងដឹកជញ្ជូន លោក ប៉េង ពោធិ៍នា បានលើកឡើងថា ការបំភ្លឺផ្លូវឱ្យបានគ្រប់គ្រាន់អាចជួយកាត់បន្ថយគ្រោះថ្នាក់ចរាចរណ៍បានចន្លោះពី ២០ ទៅ ៣០ភាគរយ។ គម្រោងនេះនឹងផ្តោតលើផ្លូវដែលមានចរាចរណ៍មមាញឹក ផ្លូវដែលកើតមានគ្រោះថ្នាក់ចរាចរណ៍ច្រើន និងតំបន់សាធារណៈសំខាន់ៗ ក្នុងគោលបំណងធ្វើឱ្យហេដ្ឋារចនាសម្ព័ន្ធផ្លូវថ្នល់កាន់តែមានសុវត្ថិភាពសម្រាប់អ្នកប្រើប្រាស់ផ្លូវ និងប្រជាពលរដ្ឋ។លោក ប៉េង ពោធិ៍នា បានឱ្យដឹងថា យោងតាមអនុស្សរណៈនៃការយោគយល់គ្នាមួយ ក្រុមការងារបច្ចេកទេសចម្រុះនឹងត្រូវបង្កើតឡើង ដើម្បីសិក្សា និងវាយតម្លៃទីតាំងដែលមានភាពចាំបាច់សម្រាប់ការដំឡើងអំពូលភ្លើងប្រើថាមពលព្រះអាទិត្យ។ការសិក្សានេះនឹងផ្តោតលើផ្លូវជាតិសំខាន់ៗ ក្នុងនោះមានផ្លូវជាតិលេខ៥ និងលេខ៦ ព្រមទាំងកំណាត់ផ្លូវផ្សេងទៀតដែលមានចរាចរណ៍មមាញឹក និងកើតមានគ្រោះថ្នាក់ចរាចរណ៍ញឹកញាប់។ លោកបានថ្លែងថា៖ «ផ្លូវដែលមានចរាចរណ៍មមាញឹក ដូចអ្វីដែលយើងបានគិតនេះ គឺផ្លូវលេខ៥ លេខ៦ ហើយនិងកំណាត់ផ្លូវមួយចំនួនទៀត»។ លោកបន្តថា៖ «ផ្លូវដែលមានគ្រោះថ្នាក់ចរាចរណ៍ច្រើន ផ្លូវទីប្រជុំជន ផ្លូវជនបទ មន្ទីរពេទ្យ សាលារៀន ឬមួយក៏ទៅតាមផ្សារ គឺក៏សំខាន់ក្នុងការដំឡើងអំពូលភ្លើងប្រើថាមពលព្រះអាទិត្យនេះ។ ហើយជាពិសេសទៀត គឺកាត់បន្ថយគ្រោះថ្នាក់ចរាចរណ៍»។ យោងតាមលោក ប៉េង ពោធិ៍នា ការសិក្សារបស់វិទ្យាស្ថានអន្តរជាតិដែលពាក់ព័ន្ធនឹងវិស័យផ្លូវថ្នល់បានបង្ហាញថា ការមានពន្លឺភ្លើងគ្រប់គ្រាន់នៅតាមផ្លូវជាតិ និងផ្លូវសំខាន់ៗ អាចជួយកាត់បន្ថយគ្រោះថ្នាក់ចរាចរណ៍បានចន្លោះពី ២០ ទៅ ៣០ភាគរយ។ លោកថ្លែងថា៖ «ពន្លឺអំពូលភ្លើងដែលមានភ្លើងគ្រប់គ្រាន់ទៅតាមដងផ្លូវជាតិ ឬមួយក៏ផ្លូវសំខាន់ៗមួយចំនួន អាចកាត់បន្ថយគ្រោះថ្នាក់ចរាចរណ៍ចន្លោះពី ២០ ទៅ ៣០ភាគរយ»។ ការបំភ្លឺផ្លូវឱ្យបានគ្រប់គ្រាន់មានសារៈសំខាន់ជាពិសេសសម្រាប់អ្នកធ្វើដំណើរនៅពេលយប់ ខណៈការមើលឃើញមានកម្រិតអាចបង្កើនហានិភ័យនៃការប៉ះទង្គិច និងធ្វើឱ្យអ្នកបើកបរពិបាកមើលឃើញអ្នកថ្មើរជើង យានយន្តផ្សេងទៀត ឬឧបសគ្គនៅលើដងផ្លូវ។ លោក ប៉េង ពោធិ៍នា បានចាត់ទុកការពង្រីកការដំឡើងភ្លើងបំភ្លឺផ្លូវថា ជាផ្នែកមួយនៃការយកចិត្តទុកដាក់កាន់តែខ្លាំងលើសុវត្ថិភាព និងសោភ័ណភាពនៃហេដ្ឋារចនាសម្ព័ន្ធផ្លូវថ្នល់។ លោកបានថ្លែងថា៖ «ពីមុនយើងធ្វើផ្លូវ គឺយើងមានសង្ឃឹម ប៉ុន្តែឥឡូវនេះ បន្ទាប់មកយើងធ្វើផ្លូវហើយ មានសង្ឃឹម គឺមានសុវត្ថិភាព។ បន្ថែមពីនេះទៀត មានសង្ឃឹម មានសុវត្ថិភាពហើយ គឺត្រូវមានសោភ័ណភាពបន្ថែមទៀត»។ ការប្រើប្រាស់អំពូលភ្លើងដើរដោយថាមពលព្រះអាទិត្យក៏អាចជាជម្រើសមួយសម្រាប់កំណាត់ផ្លូវជាតិ និងផ្លូវជនបទមួយចំនួន ដែលការតភ្ជាប់ទៅបណ្តាញអគ្គិសនីអាចមានការលំបាក។ ទោះយ៉ាងណា លោក ប៉េង ពោធិ៍នា បានបញ្ជាក់ថា ទីតាំងសម្រាប់ដំឡើងអំពូលភ្លើងនឹងត្រូវឆ្លងកាត់ការសិក្សា និងវាយតម្លៃរបស់ក្រុមការងារបច្ចេកទេសជាមុន ដោយផ្តោតលើភាពចាំបាច់ជាក់ស្តែងនៅតាមទីតាំងនីមួយៗ។ កត្តាដូចជា កម្រិតចរាចរណ៍ ស្ថានភាពគ្រោះថ្នាក់ចរាចរណ៍ និងទីតាំងនៅជិតមន្ទីរពេទ្យ សាលារៀន និងផ្សារ ត្រូវបានលើកឡើងជាចំណុចសំខាន់ៗសម្រាប់ការពិចារណា។ ការផ្តោតលើតំបន់ជុំវិញសាលារៀន មន្ទីរពេទ្យ និងផ្សារ ក៏អាចជួយពង្រឹងសុវត្ថិភាពដល់អ្នកថ្មើរជើង និងប្រជាពលរដ្ឋក្នុងមូលដ្ឋាន ដែលធ្វើដំណើរ ឬឆ្លងកាត់ផ្លូវជាប្រចាំ ជាពិសេសនៅពេលព្រឹកព្រលឹម និងពេលយប់។ គ្រោះថ្នាក់ចរាចរណ៍នៅតែជាបញ្ហាសុវត្ថិភាពសាធារណៈដ៏សំខាន់មួយនៅកម្ពុជា ខណៈអាជ្ញាធរតែងតែអំពាវនាវឱ្យអ្នកបើកបរគោរពល្បឿនកំណត់ មិនបើកបរក្រោមឥទ្ធិពលគ្រឿងស្រវឹង និងគោរពច្បាប់ចរាចរណ៍។ ក្រៅពីការអនុវត្តច្បាប់ និងឥរិយាបថរបស់អ្នកបើកបរ ការលើកឡើងរបស់លោក ប៉េង ពោធិ៍នា ក៏បង្ហាញពីតួនាទីនៃហេដ្ឋារចនាសម្ព័ន្ធផ្លូវថ្នល់ និងការបំភ្លឺគ្រប់គ្រាន់ ក្នុងការចូលរួមបង្ការគ្រោះថ្នាក់ចរាចរណ៍។ លោកបានឱ្យដឹងថា កិច្ចសហការកំពុងត្រូវបានធ្វើឡើង ដើម្បីធ្វើឱ្យផ្លូវជាតិនៅតាមរាជធានី-ខេត្តមានភាពល្អប្រសើរបន្ថែមទៀត ទាំងផ្នែកសុវត្ថិភាព និងសោភ័ណភាព។ លោកថ្លែងថា៖ «នេះគឺជាអ្វីដែលយើងខ្ញុំទាំងអស់គ្នាកំពុងតែសហការគ្នា ធ្វើយ៉ាងណាឱ្យផ្លូវជាតិរបស់យើងទៅតាមបណ្តារាជធានី-ខេត្ត ឱ្យមានភាពល្អប្រសើរបន្ថែមទៀត»។