ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានអំពាវនាវឱ្យប្រជាពលចូលរូមថែរក្សាផ្លូវថ្នល់ សម្រាប់ជាប្រយោជន៍រួមក្នុងការធ្វើដំណើរ និងការដឹកជញ្ជូនកសិផលនានា ក្នុងគោលដៅលើកកម្ពស់សេដ្ឋកិច្ចគ្រួសារ និងសង្គមជាតិទាំងមូល។ ឯកឧត្តមបណ្ឌិត ជាម ច័ន្ទសោភ័ណ បានលើកឡើងបែបនេះ ក្នុងឱកាសពិនិត្យស្ថានភាពផ្លូវខូចខាត នៅក្នុងភូមិសាស្ត្រក្រុង/ស្រុកចំនួន៤ រួមមាន ក្រុងច្បារមន ស្រុកសំរោងទង ស្រុកគងពិសី និងស្រុកបសេដ្ឋ ក្នុងខេត្តកំពង់ស្ពឺ ដើម្បីវាយតម្លៃគុណភាព និងរៀបចំផែនការស្តារ ជួសជុល និងអភិវឌ្ឍន៍បន្ថែម នាថ្ងៃទី ១០ ខែកក្កដា ឆ្នាំ២០២៦។ ក្នុងឱកាសចុះពិនិត្យនោះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តបានសង្កត់ធ្ងន់ និងណែនាំដល់មន្ត្រីបច្ចេកទេស ក៏ដូចជាភាគីពាក់ព័ន្ធទាំងអស់ ត្រូវតែយកចិត្តទុកដាក់ខ្ពស់លើគុណភាពជាចម្បង។ រាល់ការស្ថាបនា ឬជួសជុលឡើងវិញ ត្រូវតែធ្វើឡើងតាមបទដ្ឋានបច្ចេកទេសត្រឹមត្រូវ រឹងមាំ និងមានប្រព័ន្ធរំដោះទឹកច្បាស់លាស់ ដើម្បីធានាឱ្យផ្លូវអាចប្រើប្រាស់បានយូរអង្វែង មិនមែនធ្វើហើយខូចៗនោះឡើយ។ ឯកឧត្តមបានបន្តទៀតថា មន្ត្រីជំនាញត្រូវសហការជាមួយអាជ្ញាធរមូលដ្ឋានតាមដាន និងត្រួតពិនិត្យជាប្រចាំនូវរាល់ប្រព័ន្ធលូ និងប្រឡាយរំដោះទឹកតាមសងខាងផ្លូវ ដោយមិនត្រូវទុកឱ្យមានការកកស្ទះដោយសារសំរាម ឬដីខ្សាច់ឡើយ ព្រោះទឹកជំនន់ទឹកភ្លៀងគឺជាសត្រូវធំបំផុតរបស់ផ្លូវថ្នល់។ ជាមួយគ្នានោះដែរ ភាគីពាក់ព័ន្ធត្រូវសហការជាមួយសមត្ថកិច្ច ដើម្បីរឹតបន្តឹងលើការត្រួតពិនិត្យរថយន្តដឹកជញ្ជូនធុនធ្ងន់ ដែលបើកបរឆ្លងកាត់ខ្សែផ្លូវក្នុងខេត្ត ដោយត្រូវអនុវត្តច្បាប់ និងផាកពិន័យឱ្យបានម៉ឺងម៉ាត់បំផុតចំពោះយានយន្តណាដែលផ្ទុកលើសទម្ងន់កំណត់។ ‎ ឯកឧត្តមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ មេត្តាចូលរួមថែរក្សាសម្បត្តិរដ្ឋទាំងអស់គ្នា ជាពិសេសការមិនផ្ទុកទម្ងន់លើសទម្ងន់កំណត់ ដើម្បីរក្សាខ្សែផ្លូវទាំងនោះឱ្យនៅល្អស្អាត សម្រាប់ជាប្រយោជន៍រួមក្នុងការធ្វើដំណើរ និងការដឹកជញ្ជូនកសិផលនានា ក្នុងគោលដៅលើកកម្ពស់សេដ្ឋកិច្ចគ្រួសារ និងសង្គមជាតិទាំងមូល។ ‎ គួបញ្ជាក់ផងដែរថាក្នុងដំណើរចុះពិនិត្យនេះរួមមាន៖ ក្នុងស្រុកសំរោងទង ខ្សែផ្លូវលេខ ១៤៤០ ចេញទៅផ្លូវជាតិលេខ៤ (ម្តុំមុខបុរីសុវណ្ណ) តភ្ជាប់រវាងស្រុកសំរោងទង និងក្រុងច្បារមន មានប្រវែង ១០ គីឡូម៉ែត្រ។ ‎ខ្សែផ្លូវលេខ ១៤០ ពីផ្លូវជាតិលេខ៤ តាមផ្សារព្រៃផ្តៅ ទៅដល់វត្តស្រះឃ្លាំង មានប្រវែង ៩,៩ គីឡូម៉ែត្រ។ ‎ខ្សែផ្លូវតភ្ជាប់ពីផ្លូវលេខ៥១ មានប្រវែង ៨,៤ គីឡូម៉ែត្រ ចាប់ពីមុខវត្តអង្គខ្មៅ ដោយតភ្ជាប់ពីផ្លូវបេតុងចាស់ (លេខ ១៦១០៣ ទទឹង ៨៣) ស្ថិតនៅក្នុងឃុំសំបូរ និងឃុំត្រពាំងគង ឆ្ពោះទៅកាន់ផ្លូវជាតិលេខ៤ ម្តុំមុខរោងចក្រសាព្រីណា។ ស្រុកគងពិសីខ្សែផ្លូវតភ្ជាប់ចន្លោះពីផ្លូវជាតិលេខ ៤១ ទៅដល់ផ្លូវជាតិលេខ ៣ មានប្រវែង ៨,៦ គីឡូម៉ែត្រ។ និងស្រុកបសេដ្ឋ ខ្សែផ្លូវពីផ្សារប៉ាង្កសី មកផ្សារស្លាបលែង៖ ផ្លូវមួយខ្សែនេះរងការខូចខាតច្រើន ដោយកាត់តាមឃុំចំនួន២ គឺឃុំស្តុក និងឃុំភារីមានជ័យ មានប្រវែងសរុប ១២ គីឡូម៉ែត្រ។ សរុបខ្សែផ្លូវសំខាន់ៗដែលត្រូវបានចុះពិនិត្យ និងវាយតម្លៃដើម្បីត្រៀមស្តារ និងជួសជុលឡើងវិញនៅក្នុងស្រុកទាំង៤ នេះមានប្រវែងសរុបប្រមាណជិត ៤៩ គីឡូម៉ែត្រ៕