កិច្ចប្រជុំពិនិត្យវឌ្ឍនភាពការងារប្រចាំខែមិថុនា ឆ្នាំ២០២៦ និងទិសដៅការងារសម្រាប់ខែកក្កដា ឆ្នាំ២០២៦ របស់អគ្គនាយកដ្ឋានបច្ចេកទេស ទីស្តីការក្រសួង៖ នាថ្ងៃចន្ទ ទី២៩ ខែមិថុនា ឆ្នាំ២០២៦ ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារប្រចាំខែមិថុនា ឆ្នាំ២០២៦ និងទិសដៅការងារសម្រាប់ខែកក្កដា ឆ្នាំ២០២៦ របស់អគ្គនាយកដ្ឋានបច្ចេកទេស ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមទីប្រឹក្សាក្រសួង ឯកឧត្តមអគ្គនាយកបច្ចេកទេស លោកអគ្គនាយករង និងលោកប្រធាន-អនុប្រធាននាយកដ្ឋាន ព្រមទាំងមន្ត្រីជំនាញពាក់ព័ន្ធមកពីនាយកដ្ឋានក្រោមឱវាទអគ្គនាយកដ្ឋានជាច្រើនរូប។ កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យ និងវាយតម្លៃលើវឌ្ឍនភាពនៃការអនុវត្តការងារប្រចាំខែមិថុនា ឆ្នាំ២០២៦ ព្រមទាំងពិនិត្យឡើងវិញនូវផែនការសកម្មភាពការងារដែលអគ្គនាយកដ្ឋានត្រូវបន្តអនុវត្តក្នុងខែកក្កដា។ទន្ទឹមនឹងនេះ អង្គប្រជុំក៏បានពិភាក្សាលើបញ្ហាប្រឈមនានាដែលបានជួបប្រទះក្នុងដំណើរការអនុវត្តការងារកន្លងមក និងបានលើកឡើងនូវយន្តការ និងដំណោះស្រាយសមស្រប ដើម្បីបង្កើនប្រសិទ្ធភាព និងប្រសិទ្ធផលនៃការអនុវត្តការងារឱ្យកាន់តែប្រសើរឡើង។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានផ្តល់អនុសាសន៍ និងការណែនាំដល់ថ្នាក់ដឹកនាំ និងមន្ត្រីជំនាញពាក់ព័ន្ធឱ្យបន្តសហការគ្នាក្នុងការបំពេញភារកិច្ច និងខិតខំអនុវត្តការងារឱ្យសម្រេចបានតាមផែនការដែលបានគ្រោងទុក ស្របតាមផែនការសកម្មភាពប្រចាំឆ្នាំ២០២៦ របស់អគ្គនាយកដ្ឋានបច្ចេកទេស និងទិសដៅអភិវឌ្ឍវិស័យសាធារណការ និងដឹកជញ្ជូន ប្រកបដោយប្រសិទ្ធភាព៕