ក្រុមការងារគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែនកម្ពុជា (3CEP) ចុះសិក្សាស្វែងយល់ និងជួបពិភាក្សាការងារ ស្ដីពីស្ថានភាពច្រកទ្វារព្រំដែនអន្តរជាតិបាវិត ស្វាយរៀង៖ នាថ្ងៃពុធ ទី២៤ ខែមិថុនា ឆ្នាំ២០២៦ ឯកឧត្តម តាំង សាមឿន អនុរដ្ឋលេខាធិការ និងជានាយករងគម្រោង បានអញ្ជើញដឹកនាំក្រុមការងារនៃគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែននៅព្រះរាជាណាចក្រកម្ពុជា (Cambodia Cross-border Connectivity Enhancement Project, ហៅកាត់ថា 3CEP ) អមជាមួយលោក ណៃ ចំណង់ អគ្គនាយករងសាធារណការ និងជាប្រធានគ្រប់គ្រងគម្រោង អ្នកជំនាញការធនាគារវិនិយោគហេដ្ឋារចនាសម្ព័ន្ធអាស៊ី (AIIB) និងក្រុមការងារនៃសម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV ចុះសិក្សាស្វែងយល់ និងជួបពិភាក្សាការងារ ស្ដីពីស្ថានភាពច្រកទ្វារព្រំដែនអន្តរជាតិបាវិត ដើម្បីជារកធាតុចូលបន្ថែមឱ្យបានគ្រប់ជ្រុងជ្រោយ សម្រាប់សាងសង់ស្ថានីយ និងហេដ្ឋារចនាសម្ព័ន្ធច្រកទ្វារព្រំដែន ៤កន្លែងផ្សេងទៀត ដោយមានការអញ្ជើញចូលរួមពី លោកអភិបាលរងនៃគណៈអភិបាលក្រុងបាវិត លោកប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិបាវិត លោកប្រធានមន្ទីរសាធារណការ និងដឹកជញ្ជូនខេត្តស្វាយរៀង និងអាជ្ញាធរពាក់ព័ន្ធនៃច្រកទ្វារព្រំដែនអន្តរជាតិបាវិត។ គោលបំណងនៃការចុះសិក្សានេះ គឺដើម្បី (១). ស្វែងយល់បន្ថែមពីស្ថានភាពទូទៅ ប្រតិបត្តិការដ៏មមាញឹកនៃការដឹកជញ្ជូនឆ្លងកាត់ព្រំដែនរវាងកម្ពុជា-វៀតណាម គំរូស្ថាបត្យកម្មអគារច្រកទ្វារ និងឋាបនីយភណ្ឌ(Facilities)ក្នុងស្ថានីយច្រកទ្វារព្រំដែន និង (២). ប្រមូលធាតុចូលចាំបាច់ដែលជាតម្រូវការជាក់ស្ដែង សម្រាប់រៀបចំ និងបំពាក់ឱ្យបានគ្រប់ជ្រុងជ្រោយក្នុងស្ថានីយច្រកទ្វារព្រំដែនអន្តរជាតិ សំដៅអភិវឌ្ឍ និងពង្រីកស្ថានីយ និងហេដ្ឋារចនាសម្ព័ន្ធច្រកព្រំដែនអន្តរជាតិភ្នំដិន ត្រពាំងផ្លុង ត្រពាំងស្រែ និងអូរយ៉ាដាវ ឱ្យស្មើមុខស្មើមាត់ជាមួយនឹងប្រទេសជិតខាង ក៏ដូចជារួមចំណែកសម្រួលដល់ការដឹកជញ្ជូនឆ្លងកាត់ព្រំដែននិងភស្ដុភារកម្ម និងជំរុញទំហំពាណិជ្ជកម្មទ្វេភាគី កម្ពុជា-វៀតណាម ឱ្យឡើងដល់ ២០ពាន់លានដុល្លារអាម៉េរិក ស្របតាមចក្ខុវិស័យរបស់ថ្នាក់ដឹកនាំកំពូលនៃប្រទេសទាំងពីរដែលនឹងបម្រើដល់ការអភិវឌ្ឍសេដ្ឋកិច្ចឆ្លងកាត់ព្រំដែននៃព្រះរាជាណាចក្រកម្ពុជាប្រកបដោយភាពធន់គ្រប់គ្រាន់ក្នុងបរិបទភូមិសាស្ត្រនយោបាយតំបន់ និងពិភពលោកកំពុងមានភាពស្រពេចស្រពិល។ ជាលទ្ធផល ក្រុមការងារនៃគម្រោង 3CEP សហការជាមួយនឹងក្រុមការងារនៃសម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV នឹងយកធាតុចូលទាំងអស់ដែលទទួលបានពីការចុះសិក្សា និងពីអាជ្ញាធរនៃច្រកទ្វារព្រំដែនអន្តរជាតិបាវិតនេះ មកប្រើប្រាស់ឬនិងបញ្ចូលទៅក្នុងការសិក្សាសមិទ្ធិលទ្ធភាព (Feasibility Study - FS) និងរៀបចំគំនូសប្លង់វិស្វកម្មលម្អិត (Detailed Engineering Designs - DEDs) សម្រាប់គម្រោង 3CEP រួចនឹងបន្តពិភាក្សាការងារ FS និងDEDs របស់ច្រកទ្វារអន្តរជាតិទាំង៤កន្លែងខាងលើ តាមរយៈយន្តការពិគ្រោះយោបល់ពីគ្រប់ភាគីពាក់ព័ន្ធ (ប្រព័ន្ធជវភាពនៃតួអង្គតែមួយ) រួមមានក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ អគ្គនាយកដ្ឋានគយ និងរដ្ឋាករកម្ពុជា អគ្គនាយកដ្ឋានអន្តោប្រវេសន៍ អាជ្ញាធរមូលដ្ឋាននៃខេត្តទាំង៤ ។ល។ សូមបញ្ជាក់ជូនបន្ថែមថា៖ គម្រោង 3CEP នេះ នឹងប្រើប្រាស់ហិរញ្ញប្បទានសហប្រតិបត្តិការពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ដែលត្រូវបានរំពឹងទុកថា សមិទ្ធផលនៃគម្រោងនេះ នឹងជួយគាំទ្រដល់វិស័យដឹកជញ្ជូនក្នុងការពង្រឹងការតភ្ជាប់ និងជំរុញកំណើននៃរំហូរប្រតិបត្តិការដឹកញ្ជូនក្នុងតំបន់ភូមិភាគឦសាន និងឆ្លងកាត់ព្រំដែន ប្រកបដោយប្រសិទ្ធភាពនិងប្រសិទ្ធផល។ ជាពិសេស គម្រោងនេះក៏នឹងជម្រុញការតភ្ជាប់ និងធ្វើឱ្យប្រសើរឡើងស្ថានីយនិងហេដ្ឋារចនាសម្ព័ន្ធច្រកទ្វារព្រំដែនអន្តរជាតិ(CBF) សម្រួលការដឹកជញ្ជូន ពាណិជ្ជកម្ម ទេសចរណ៍ឆ្លងកាត់ព្រំដែនអន្តរជាតិនិងការតភ្ជាប់សេដ្ឋកិច្ចក្នុងក្របខ័ណ្ឌ៖ (១)-កិច្ចសហប្រតិបត្តិការក្នុងមហាអនុតំបន់មេគង្គ(GMS) (២)-កិច្ចសហប្រតិបត្តិការទ្វេភាគីកម្ពុជា-វៀតណាម (៣)-ចូលរួមចំណែក អនុវត្តផែនការមេ អភិវឌ្ឍតំបន់ភូមិភាគឦសាន (ប៉ូលសេដ្ឋកិច្ចទី៥) និង (៤)-អនុវត្តយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកកម្ពុជា ផងដែរ៕