ជំនួបពិភាក្សាការងារជាមួយគណៈប្រតិភូធនាគារពិភពលោក ដើម្បីពង្រឹងកិច្ចសហប្រតិបត្តិការក្នុងការកសាងហេដ្ឋារចនាសម្ព័ន្ធផ្លូវថ្នល់ ការតភ្ជាប់ និងភស្តុភារកម្មនៅកម្ពុជា ទីស្ដីការក្រសួង៖ នារសៀលថ្ងៃសុក្រ ទី១៩ ខែមិថុនា ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញទទួលជួបពិភាក្សាការងារជាមួយលោក Sadig Aliyev មន្ត្រីជំនាញជាន់ខ្ពស់ផ្នែកដឹកជញ្ជូន (TL, Lead transport specialist) និងក្រុមការងារ នៃធនាគារពិភពលោក(World Bank) ដើម្បីពិភាក្សាការងារក្នុងការពង្រីក និងពង្រឹងកិច្ចសហប្រតិបត្តិការរវាងក្រសួងសាធារណការ និងដឹកជញ្ជូន ជាមួយធនាគារពិភពលោក ក្នុងការកសាងហេដ្ឋារចនាសម្ព័ន្ធផ្លូវថ្នល់ ការតភ្ជាប់ និងភស្តុភារកម្មនៅកម្ពុជា ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ។ ជំនួបពិភាក្សានេះ រៀបចំឡើងក្នុងគោលបំណង ដើម្បីជម្រាបជូនអំពីលទ្ធផលនៃបេសកកម្ម និងសកម្មភាពសំខាន់ៗដែលត្រូវបន្តរបស់ធនាគារពិភពលោកក្នុងការគាំទ្រ ការអនុវត្តគម្រោងលើកកម្ពស់ការតភ្ជាប់ហេដ្ឋារចនាសម្ព័ន្ធក្នុងតំបន់នៅព្រះរាជាណាចក្រកម្ពុជា រួមទាំងវិស័យភស្តុភារកម្ម និងកិច្ចសហការប្រត្តិបត្តិការលើគម្រោងនានារបសធនាគារពិភពលោក(WB) ទាំងការគាំទ្រផ្នែកបច្ចេកទេស និងការងារគ្រប់គ្រងគម្រោងផ្សេងៗទៀត ដើម្បីរួមចំណែក និងលើកកម្ពស់កំណើនសេដ្ឋកិច្ចនៅក្នុងប្រទេសកម្ពុជាឱ្យកាន់តែរីកចម្រើនថែមទៀត។ ថ្លែងក្នុងជំនួបនេះ លោកជំទាវរដ្ឋលេខាធិការប្រចាំការ បានលើកឡើងពីការរីកចម្រើននៃការអភិវឌ្ឍវិស័យហេដ្ឋារចនាសម្ព័ន្ធនៅប្រទេសកម្ពុជា និងថ្លែងអំណរគុណដល់ធនាគារពិភពលោក ដែលបានដើរតួនាទីជាដៃគូសហការជាមួយក្រសួងសាធារណការ និងដឹកជញ្ជូន លើការគាំទ្រទាំងផ្នែកហិរញ្ញវត្ថុ និងបច្ចេកទេសដល់គម្រោងនានានៅកម្ពុជា៕