គម្រោងស្ពានឆ្លងទន្លេមេគង្គ «ដីឥដ្ឋ-ថ្មគរ» សម្រេចបានជាង ៥០% ហើយ គិតត្រឹមពាក់កណ្តាលខែឧសភានេះ គម្រោងសាងសង់ស្ពានឆ្លងកាត់ទន្លេមេគង្គ តភ្ជាប់ពីឃុំដីឥដ្ឋ ទៅកាន់ឃុំថ្មគរ នៃខេត្តកណ្តាល បាននិងកំពុងបោះជំហានទៅមុខយ៉ាងរលូន ដោយសម្រេចលទ្ធផលការងារបាន ៥០,៨% ហើយ គិតត្រឹមពាក់កណ្តាលខែឧសភា ឆ្នាំ២០២៦ នេះ។ សមិទ្ធផលហេដ្ឋារចនាសម្ព័ន្ធដ៏ធំមួយនេះ បានចាប់ផ្តើមបើកការដ្ឋានសាងសង់កាលពីថ្ងៃទី៧ ខែមិថុនា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា (និងជាអតីតនាយករដ្ឋមន្រ្តី) រួមជាមួយ ឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា ដោយធ្វើឡើងទន្ទឹមគ្នានឹងពិធីបើកការដ្ឋានគម្រោងផ្លូវល្បឿនលឿនភ្នំពេញ-បាវិត។ ស្ពានឆ្លងទន្លេមេគង្គ (ដីឥដ្ឋ-ថ្មគរ) គឺជាខ្សែភ្ជាប់សេដ្ឋកិច្ចដ៏សំខាន់ ដោយមានទីតាំងស្ថិតនៅក្នុងភូមិសាស្ត្រខេត្តកណ្តាល ដោយត្រើយខាងលិច ស្ថិតក្នុងឃុំដីឥដ្ឋ តភ្ជាប់ផ្ទាល់ទៅនឹងមហាវិថី ស៊ី ជីនពីង (ផ្លូវក្រវាត់ក្រុងទី៣) និងផ្លូវជាតិលេខ១។ ចំពោះត្រើយខាងកើត ស្ថិតក្នុងឃុំថ្មគរ ដែលនឹងត្រូវតភ្ជាប់ទៅនឹងខ្សែផ្លូវល្បឿនលឿនភ្នំពេញ-បាវិត។ គម្រោងហេដ្ឋារចនាសម្ព័ន្ធមួយនេះ មានប្រវែងសរុប ៣,៧ គីឡូម៉ែត្រ ដែលរួមបញ្ចូលទាំងស្ពានឆ្លងកាត់ទន្លេ ស្ពានអាកាសតភ្ជាប់ផ្លូវ ប្រព័ន្ធលូ និងការងារវិស្វកម្មបន្ទាប់បន្សំផ្សេងៗ។ ក្នុងនោះ ទិន្នន័យបច្ចេកទេសសំខាន់ៗនៃតួស្ពានមានដូចជា តួស្ពានឆ្លងទន្លេមេគង្គមានប្រវែងសរុប ១,៦០០ ម៉ែត្រ និងមានទទឹង ២៦ ម៉ែត្រ។ ស្ពាននេះមានគន្លងផ្លូវសម្រាប់រថយន្ត ផ្លូវទោចក្រយានយន្ត និងផ្លូវដើរសម្រាប់ថ្មើរជើង។ ដើម្បីសម្រួលដល់ការធ្វើដំណើរតាមផ្លូវទឹក ស្ពាននេះត្រូវបានរចនាឡើងដោយមានគន្លងនាវាចរណ៍ចំនួន ៣ គន្លង ដែលគន្លងនីមួយៗមានចន្លោះសុវត្ថិភាពទទឹង ១១០ ម៉ែត្រ និងកម្ពស់ ១៥ ម៉ែត្រ។ នៅពេលសាងសង់រួចរាល់ ស្ពានឆ្លងទន្លេមេគង្គ (ដីឥដ្ឋ-ថ្មគរ) នឹងដើរតួនាទីយ៉ាងសំខាន់ក្នុងការសម្រួលដល់ការធ្វើដំណើររបស់ប្រជាពលរដ្ឋ កាត់បន្ថយការកកស្ទះចរាចរណ៍ និងជម្រុញលំហូរពាណិជ្ជកម្មរវាងរាជធានីភ្នំពេញ ទៅកាន់បណ្តាខេត្តទិសអាគ្នេយ៍ ជាពិសេសតភ្ជាប់ការដឹកជញ្ជូនអន្តរជាតិទៅកាន់ព្រំដែនប្រទេសវៀតណាម តាមរយៈផ្លូវល្បឿនលឿនភ្នំពេញ-បាវិត ផងដែរ៕