អន្តរខេត្ត៖ គិតចាប់ពីថ្ងៃទី១៧ដល់១៩ឧសភា ឆ្នាំ២០២៦ មន្រ្តីក្រសួងសាធារណការ បានចុះត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ រកឃើញមានចំនួន១៥គ្រឿងដែលម្ចាស់ដាក់លើសទម្ងន់រហូតដល់ទៅ២៩តោន...។មន្រ្តីសាធារណការ បានឱ្យដឹងថា ការចុះត្រួតពិនិត្យយានយន្តដឹកជញ្ជូននេះដែរ ធ្វើទ្បើងដោយសមាជិកក្រុមការងារចល័តចម្រុះ សហការជាមួយស្ថានីយជញ្ជីងរាជានុកូល ស្ថានីយកាំពី ស្ថានីយព្រៃព្នៅ ស្ថានីយព្រែកឯង ស្ថានីយបឹងឃុនឆាង ស្ថានីយរំចេក និងស្ថានីយថ្នល់ទទឹង បានត្រួតពិនិត្យយានយន្តសរុបចំនួន១៥គ្រឿងដែលលើសទម្ងន់អនុញ្ញាតចន្លោះពី៥តោនដល់២៩តោន ហើយជាមួយគ្នានោះ ក៏បានពិន័យដល់ម្ចស់រថយន្តធន់ធំទាំងនោះផងដែរ។ មន្រ្តីជំនាញអះអាងថា នៅតែបន្តចុះត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅទូទាំងប្រទេស ដើម្បីទប់ស្កាត់ និងចាត់វិធានការរឹតបន្តឹងការអនុវត្តច្បាប់យ៉ាងតឹងរ៉ឹង ដោយគ្មានការលើកលែងឡើយ។ គួរជ្រាបថា ទម្ងន់ដឹកជញ្ជូនអតិបរមាលើបណ្តាញផ្លូវថ្នល់ ត្រូវអនុញ្ញាតតាមប្រភេទយានយន្ត ដូចជា យានយន្តភ្លៅ២ ទម្ងន់អនុញ្ញាត ១៦តោន, យានយន្តភ្លៅ៣ ទម្ងន់អនុញ្ញាត ២៥តោន, យានយន្តភ្លៅ៤ ទម្ងន់អនុញ្ញាត ៣០តោន, យានយន្តសណ្តោងរ៉ឺម៉កមានភ្លៅ៥ ទម្ងន់អនុញ្ញាត៤០តោន, និងយានយន្តសណ្តោងរ៉ឺម៉កមានភ្លៅ៦ឡើងទៅ ទម្ងន់អនុញ្ញាត ៤៥តោន។ ក្រសួងសាធារណការតែងបញ្ជាក់ថា ការចូលរួមគោរពច្បាប់ដោយផ្ទុកទម្ងន់ត្រឹមត្រូវតាមច្បាប់កំណត់ គឺជាការចូលរួមចំណែកមួយយ៉ាងសំខាន់ ដើម្បីការពារផ្លូវថ្នល់មិនឱ្យខូចខាតមុនអាយុកំណត់ និងកាត់បន្ថយគ្រោះថ្នាក់ចរាចរណ៍ ដែលនាំឱ្យខូចខាតដល់ទ្រព្យសម្បត្តិ និងអាយុជីវិតអ្នកធ្វើដំណើរតាមដងផ្លូវ។ សូមជម្រាបថា កាលពីថ្ងៃទី១២ ដល់ថ្ងៃទី១៧ ខែឧសភា ឆ្នាំ២០២៦ មន្រ្តីនៃក្រសួងសាធារណការ និងដឹកជញ្ជូន បានចុះត្រួតពិនិត្យរថយន្តដឹកលើសទម្ងន់កម្រិតកំណត់នៅខេត្តស្វាយរៀង ព្រៃវែង កំពង់ឆ្នាំង កណ្ដាល និងខេត្តពោធិ៍សាត់ រកឃើញចំនួន៧គ្រឿង៕