(កោះកុង)៖ អាជ្ញាធរខេត្ត និងមន្ទីរសាធារណការ និងដឹកជញ្ជូនខេត្ត បានចុះត្រួតពិនិត្យ និងស្ដារប្រឡាយទឹកដែលកកស្ទះ ដើម្បីហេដ្ឋារចនាសម្ព័ន្ធប្រព័ន្ធផ្លូវទឹកនៅក្នុងក្រុងខេមរភូមិន្ទ ដែលមានប្រវែង ៩១០ម៉ែត្រ ឲ្យរួចរាល់មុនរដូវវស្សា ដើម្បីបញ្ជាផ្លូវទឹកឲ្យហូរបានលឿន ក្នុងការជម្លៀសទឹកជំនន់ ដែលធ្វើឲ្យមានផលប៉ះពាល់ក្នុងការធ្វើចរាចរណ៍ និងខូចខាតទ្រព្យសម្បត្តិរបស់ប្រជាពលរដ្ឋ នៅក្នុងមូលដ្ឋាន។ លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្ត បានឲ្យដឹងថា ដោយមានការចង្អុលបង្ហាញពីអាជ្ញាធរខេត្ត មន្ទីរសាធារណការ បានសហការជាមួយអាជ្ញាធរក្រុង អាជ្ញាធរមូលដ្ឋាន បានដឹកនាំគ្រឿងចក្រចុះកាយប្រព័ន្ធផ្លូវទឹកមួយខ្សែ ដែលមានប្រវែង៩១០ម៉ែត្រ ស្ថិតនៅសង្កាត់ស្មាច់មានជ័យ ក្រុងខេមរភូមិន្ទ។ លោកបានបន្ថែមថា ការចុះស្ដារប្រព័ន្ធផ្លូវទឹកនេះ មន្ដ្រីបានសង្កេតឃើញថា លំនៅឋានប្រជាពលរដ្ឋដែលនៅក្បែរប្រឡាយផ្លូវទឹកក៏មានការរំលោភចំណីប្រឡាយ អូរ លូ និងចំណីផ្លូវធ្វើឲ្យមានការកកស្ទះ និងលិចលង់លំនៅដ្ឋាន បណ្ដាលឲ្យខូចខាតទ្រព្យសម្បត្តិមួយចំនួន។ សម្រាប់ឆ្នាំនេះប្រជាពលរដ្ឋ ដែលបានរំលោភបំពាន បានចូលរួមសហការជាមួយអាជ្ញាធរ និងប្តេជ្ញាចិត្តធ្វើជាពលរដ្ឋគំរូ ដើម្បីឲ្យផ្ទះពួកគាត់មានសោភ័ណ្ឌភាពស្អាត បរិស្ថានល្អ និងមិនមានការលិចលង់បន្តទៀត។ សម្រាប់គម្រោងវិនិយោគខេត្ត បានបន្តស្តារ និងរៀបចំកែលម្អប្រព័ន្ធប្រឡាយ អូរ និងលូមិនឲ្យស្ទះ និងលិចលង់ សម្រាប់រដូវវស្សាបន្តឡើយ។ ដូច្នេះសូមអាជ្ញាធរសង្កាត់ ក្រុង និងមន្ទីរ បន្តពិនិត្យលទ្ធភាព ក្នុងការស្តារ កែលម្អប្រព័ន្ធប្រឡាយ អូរ និងលូ ព្រមទាំងផ្សព្វផ្សាយដល់ប្រជាពលរដ្ឋ ចូលរួមថែរក្សា អនាម័យ បរិស្ថាន និងត្រូវចេះសម្អាតផ្ទះ សហគមន៍ និងខេត្តឲ្យបានល្អប្រសើរជាប្រចាំ ដើម្បីឲ្យមានសុខភាព និងមានសោភ័ណ្ឌភាពស្រស់ស្រាយបន្ថែមទៀត ដើម្បីលើកស្ទួយផ្នែកវិស័យទេសចរណ៍ផងដែរ៕