កិច្ចប្រជុំពិភាក្សាបច្ចេកទេសស្តីពី ការគ្រប់គ្រងទ្រព្យសម្បត្តិផ្លូវថ្នល់ និងបច្ចេកវិទ្យាជួសជុលថែទាំផ្លូវជាមួយក្រុមហ៊ុន TOA Road Corporation នៃប្រទេសជប៉ុន ទីស្តីការក្រសួង៖ នាថ្ងៃពុធ ទី១៣ ខែឧសភា ឆ្នាំ២០២៦ លោក ឈឹម ផល្លា ប្រធាននាយកដ្ឋានផ្លូវថ្នល់ បានដឹកនាំកិច្ចប្រជុំជាមួយតំណាងក្រុមហ៊ុន TOA Road Corporation ដើម្បីពិភាក្សា និងស្វែងយល់អំពីបច្ចេកវិទ្យាថ្មីៗក្នុងការស្ថាបនា និងជួសជុលថែទាំផ្លូវថ្នល់ ។ ក្នុងកិច្ចប្រជុំនេះ ក្រុមហ៊ុន TOA បានធ្វើបទបង្ហាញអំពីបច្ចេកវិទ្យាសំខាន់ៗ រួមមាន៖ ១). ការជួសជុលតាមបច្ចេកវិទ្យាត្រជាក់ (Cold Type Repair): ជាសម្ភារៈដែលអាចជួសជុលសំបុកមាន់បានភ្លាមៗ ទោះក្នុងស្ថានភាពផ្លូវសើម ឬភ្លៀង ដែលជួយសន្សំសំចៃពេលវេលា និងថវិកា ២).បច្ចេកវិទ្យាកៅស៊ូកែច្នៃ (Polymer Modified Asphalt): ការប្រើប្រាស់សារធាតុបន្ថែមដើម្បីបង្កើនភាពធន់នៃកៅស៊ូអាស្វាល់ ជួយការពារការរេចរឹល និងការប្រេះស្រាំបានយ៉ាងមានប្រសិទ្ធភាព ៣).ប្រព័ន្ធអង្កេតស្ថានភាពផ្លូវតាមស្មាតហ្វូន (Low Cost Survey Method): ការប្រើប្រាស់បច្ចេកវិទ្យាឌីជីថលដើម្បីពិនិត្យស្ថានភាពផ្លូវក្នុងតម្លៃទាប ដែលងាយស្រួលក្នុងការគ្រប់គ្រង និងរៀបចំផែនការថែទាំ និង ៤). ការប្រើប្រាស់សម្ភារៈមេត្រីភាពបរិស្ថាន: ការណែនាំអំពីបច្ចេកវិទ្យា Recycle និងការប្រើប្រាស់ប្រេងរុក្ខជាតិក្នុងល្បាយជួសជុល ដើម្បីកាត់បន្ថយការបំភាយឧស្ម័នកាបូន (CO2) ។ លោកប្រធាននាយកដ្ឋាន បានវាយតម្លៃខ្ពស់ចំពោះបទបង្ហាញនេះ និងបានសង្កត់ធ្ងន់ថា ការសិក្សាអំពីបច្ចេកវិទ្យាថ្មីៗទាំងនេះ គឺជាផ្នែកមួយយ៉ាងសំខាន់ក្នុងការលើកកម្ពស់គុណភាពហេដ្ឋារចនាសម្ព័ន្ធផ្លូវថ្នល់នៅកម្ពុជា ឱ្យកាន់តែរឹងមាំ និងមាននិរន្តរភាពស្របតាមបទដ្ឋានបច្ចេកទេសខ្ពស់៕