កិច្ចប្រជុំប្រកាសសមាសភាពអង្គភាពគ្រប់គ្រងគម្រោងផ្លូវរបៀងសេដ្ឋកិច្ចតាមបណ្តោយឆ្នេរសមុទ្រពីទំនប់រលក ខេត្តព្រះសីហនុ ភ្ជាប់ទៅកាន់ស្រែអំបិល ខេត្តកោះកុង ទីស្ដីការក្រសួង៖ នាព្រឹកថ្ងៃពុធ ទី១៣ ខែឧសភា ឆ្នាំ២០២៦ ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង អញ្ជើញដឹកនាំកិច្ចប្រជុំប្រកាសសមាសភាពអង្គភាពគ្រប់គ្រងគម្រោងផ្លូវរបៀងសេដ្ឋកិច្ចតាមបណ្តោយឆ្នេរសមុទ្រពីទំនប់រលក ខេត្តព្រះសីហនុ ភ្ជាប់ទៅកាន់ស្រែអំបិល ខេត្តកោះកុង ដោយមានការចូលរួមពីឯកឧត្ដមអនុរដ្ឋលេខាធិការ ជាអនុគម្រោង លោក-លោកស្រី ជាសមាជិក-សមាជិកាគម្រោងផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីប្រកាសសមាសភាពអង្គភាពគ្រប់គ្រងគម្រោងផ្លូវរបៀងសេដ្ឋកិច្ចតាមបណ្តោយឆ្នេរសមុទ្រពីទំនប់រលក ខេត្តព្រះសីហនុ ភ្ជាប់ទៅកាន់ស្រែអំបិល ខេត្តកោះកុង ក្រោមក្របខ័ណ្ឌធនាគារអភិវឌ្ឍន៍អាស៊ី (ADB) ពីការអនុវត្តតួនាទី ភារកិច្ចទៅតាមបច្ចេកទេសដែលបានប្រកាសក្នុងសេចក្ដីសម្រេច។ បន្ថែមពីនេះ ឯកឧត្ដមរដ្ឋលេខាធិការ ប្រធានគម្រោង បានមានមតិណែនាំដល់សមាជិក-សមាជិការគម្រោងទាំងអស់ ត្រូវសហការគ្នាឱ្យបានល្អ និងចុះពិនិត្យការងារជាក់ស្ដែងឱ្យបានច្បាស់លាស់ទៅតាមផែនការដែលបានគ្រោងទុក៕