ត្រឹមដំណាច់ខែមីនា ឆ្នាំ២០២៦ វឌ្ឍនភាពនៃការងារសាងសង់ចំណតផែកុងតឺន័រទឹកជ្រៅថ្មីជំហានទី ១ សម្រេចបានប្រមាណ ៦៤,៥៣% នៃផែនការគ្រោងទុក។ នេះបើតាមកិច្ចប្រជុំប្រចាំខែមីនាឆ្នាំ ២០២៦ ស្តីពីការត្រួតពិនិត្យវឌ្ឍនភាព និងសុវត្ថិភាពការដ្ឋានសាងសង់នៃការអនុវត្តគម្រោងអភិវឌ្ឍន៍ចំណតផែកុងតឺន័រទឹកជ្រៅថ្មី-ជំហានទី ១ ក្រោមវត្តមានលោក ទី សាគុណ អគ្គនាយករងទទួលបន្ទុកបច្ចេកទេស ជាមួយក្រុមហ៊ុនសាងសង់ TOA Corporation។ តាមផែនការដំណើរការសាងសង់កំពង់ផែទឹកជ្រៅជំហានទី ១ ដែលមានជម្រៅ ១៤,៥ ម៉ែត្រ គ្រោងបញ្ចប់ការសាងសង់នៅឆ្នាំ ២០២៨។ រដ្ឋាភិបាលកម្ពុជាបានវិនិយោគទឹកប្រាក់ប្រមាណ ៧៥០ លានដុល្លារ ដើម្បីអភិវឌ្ឍកំពង់ផែទឹកជ្រៅខេត្តព្រះសីហនុទាំង ៣ ដំណាក់កាល ដើម្បីឆ្លើយតបទៅកំណើនការដឹកជញ្ជូនទំនិញតាមផ្លូវសមុទ្រ និងការធ្វើពាណិជ្ជកម្មរបស់ប្រទេសកម្ពុជា។ ប្រមុខរដ្ឋាភិបាលបានបញ្ជាក់ថា ការវិនិយោគអភិវឌ្ឍកំពង់ផែស្វយ័តក្រុងព្រះសីហនុ គឺជាយុទ្ធសាស្ត្រយកលុយបង្កើតលុយ។ ការអភិវឌ្ឍចំណតផែកុងតឺន័រថ្មីទាំង ៣ ដំណាក់កាល នឹងប្រែក្លាយកំពង់ផែស្វយ័តក្រុងព្រះសីហនុទៅជាកំពង់ផែអន្តរជាតិខ្នាតធំ (Hub Port) ដែលអនុញ្ញាតឱ្យនាវាកុងតឺន័រធុនធំៗមានផ្លូវដឹកជញ្ជូនពីគ្រប់តំបន់នៅក្នុងពិភពលោកអាចចូលចតបាន ដោយពុំមានឧបសគ្គលើជម្រៅទឹក៕