ភ្នំពេញ៖ សួនសុវត្ថិភាពចរាចរណ៍ ទំហំ២ពាន់ម៉ែត្រការ៉េ នៅក្រុងកំពង់ឆ្នាំង ត្រូវបានដាក់ឱ្យប្រើប្រាស់ ដើម្បីឱ្យសិស្សសាលា បានឈ្វេងយល់ពីសញ្ញាចរាចរណ៍ និងច្បាប់ចរាចរណ៍កាន់តែច្បាស់ សម្រាប់ធ្វើដំណើរប្រកបដោយសុវត្ថិភាពលើដងផ្លូវ។នៅថ្ងៃទី២៨មីនា លោក ស សុខា រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានសម្ពោធដាក់ឱ្យប្រើប្រាស់សួនសុវត្ថិភាពចរាចរណ៍ផ្លូវគោក នៅបរិវេណ វិទ្យាល័យក្រុងកំពង់ឆ្នាំង ខេត្តកំពង់ឆ្នាំង។ ពិធីនេះ ធ្វើឡើងក្នុងឱកាសទិវាអន្តរជាតិរំលឹកជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី២០។ បើតាមការចេញផ្សាយរបស់ក្រសួងមហាផ្ទៃ សួនសុវត្ថិភាពចរាចរណ៍ផ្លូវគោកនៅកំពង់ឆ្នាំង រៀបចំជាហេដ្ឋារចនាសម្ព័ន្ធ ផ្លូវ ស្ពាន បំពាក់ដោយស្លាកសញ្ញា ភ្លើងសញ្ញា គំនូសសញ្ញាចរាចរណ៍ សម្រាប់ជាថ្នាលបណ្តុះបណ្តាលច្បាប់ស្តីពីចរាចរណ៍ផ្លូវគោក។ ពិសេសជាងទៅទៀត ក្រសួងមហាផ្ទៃ បញ្ជាក់ថា៖ «សួនសុវត្ថិភាពចរាចរណ៍ផ្លូវគោកនេះ មានការអនុវត្តប្រើប្រាស់ផ្លូវជាក់ស្តែងដល់សិស្សានុសិស្ស យុវវ័យ និងកុមារ សំដៅផ្តល់ចំណេះដឹងពីសុវត្ថិភាពចរាចរណ៍ ក្នុងការធ្វើដំណើរដោយថ្មើរជើង ការបើកបរម៉ូតូ និងអាចជាចំណេះដឹងមូលដ្ឋាន ក្នុងការបើកបរយានយន្តផ្សេងៗ នាពេលអនាគត»។ ពាក់ព័ន្ធនឹងចរាចរណ៍ លោក ស សុខា ក៏បានអំពាវនាវដល់ប្រជាពលរដ្ឋ ក៏ដូចក្រុមហ៊ុនដឹកជញ្ជូន និងអាណាព្យាបាលគ្រប់រូប យកចិត្តទុកដាក់អប់រំសមាជិកគ្រួសារ និងបុគ្គលិកឱ្យមានការប្រុងប្រយ័ត្នខ្ពស់ក្នុងការបើកបរ។ ទន្ទឹមនឹងនេះ រដ្ឋមន្ត្រីមហាផ្ទៃ ណែនាំឱ្យអង្គភាពអនុវត្តច្បាប់ ត្រូវពង្រឹងសីលធម៌វិជ្ជាជីវៈមន្ត្រីឱ្យបានល្អប្រសើរ និងបន្តកិច្ចសហការជាមួយគ្រប់ស្ថាប័នដៃគូ ដើម្បីបង្កើនការផ្សព្វផ្សាយអប់រំពីចំណេះដឹងសុវត្ថិភាពចរាចរណ៍។ លោក ស សុខា ក៏ចង្អុលបង្ហាញឱ្យមន្ត្រីពាក់ព័ន្ធទៀត យកបទពិសោធន៍នៃការកសាងសួនសុវត្ថិភាពចរាចរណ៍នៅខេត្តកំពង់ឆ្នាំង ធ្វើជាគំរូសម្រាប់រាជធានី-ខេត្តដទៃទៀតផងដែរ ក្នុងគោលដៅរួមគ្នាកាត់បន្ថយគ្រោះថ្នាក់។ សួនសុវត្ថិភាពចរាចរណ៍ផ្លូវគោក បានចាប់ផ្តើមបើកការដ្ឋានសាងសង់កាលពីថ្ងៃទី១២មីនា ឆ្នាំ២០២៥ ហើយបានបញ្ចប់ការសាងសង់ជាស្ថាពរនៅថ្ងៃទី១១វិច្ឆិកា ឆ្នាំ២០២៥។ សួនសុវត្ថិភាពចរាចរណ៍ផ្លូវគោកនៅកំពង់ឆ្នាំ ចំណាយថវិកាអស់ជាង៦ម៉ឺនដុល្លារសហរដ្ឋអាម៉េរិក។ សូមជម្រាបថា គ្រោះថ្នាក់ចរាចរណ៍ទូទាំងប្រទេស ក្នុងឆ្នាំ២០២៥ បានកើតឡើងចំនួន ២៣៤៥ករណី ធៀបនឹងឆ្នាំ២០២៤ មានចំនួន ២៨៤៤ករណី។ ចំនួននេះ បានថយចុះ ៤៩៩ករណី ស្មើ ១៨ភាគរយ។ ចំណែកចំនួនអ្នកស្លាប់បានថយចុះ ៤២នាក់ ស្មើនឹង ៣ភាគរយ និងចំនួនអ្នករបួស ក៏បានថយចុះ ៥០៧នាក់ ស្មើ ១៤ភាគរយ៕