កំណាត់ផ្លូវលេខ១៥៤ លូទឹកភ្លៀង ខឿនបេតុងចិញ្ចើមផ្លូវ និងអណ្តូងលូចំនួន ៦២កន្លែងនៅក្នុងសង្កាត់វត្តគរ ក្រុងបាត់ដំបង ត្រូវបានប្រកាសបើកការដ្ឋានជាផ្លូវការហើយ កាលថ្ងៃទី៩ ខែមីនា ឆ្នាំ២០២៦ ក្រោមវត្តមានឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ព្រមទាំងភាគីពាក់ព័ន្ធ។ ឯកឧត្តម សុខ លូ បានឱ្យដឹងថា រដ្ឋបាលខេត្តបានបើកការដ្ឋានជួសជុលស្តារឡើងវិញកំណាត់ផ្លូវលេខ១៥៤ ដោយជួសជុលពង្រីកតួផ្លូវ ក្រាលបេតុងប្រវែង៧៧៥ម៉ែត្រ ទទឹង១២ម៉ែត្រ និងស្ថាបនាលូទឹកភ្លៀងបណ្តោយផ្លូវ មុខកាត់១ម៉ែត្រសងខាងផ្លូវ ប្រវែង១៧៥៦ម៉ែត្រ អណ្តូងលូចំនួន៦២កន្លែង និងខឿនបេតុងចិញ្ចើមផ្លូវប្រវែង១៨២០ម៉ែត្រ ស្ថិតនៅក្នុងសង្កាត់វត្តគរ ក្រុងបាត់ដំបង។ ឆ្លៀតក្នុងឱកាសនោះ ឯកឧត្តម សុខ លូ បាថ្លែងថា ផ្លូវនៅក្នុងក្រុងបាត់ដំបងទាំងអស់ នឹងត្រូវបើកការដ្ឋានជួសជុល និងសាងសង់ថ្មីឡើងវិញជាបន្តបន្ទាប់ទៅតាមដំណាក់កាល ដើម្បីសម្រួលដល់ធ្វើការដំណើររបស់ប្រជាពលរដ្ឋ។ ឯកឧត្តម ក៏ស្នើប្រជាពលរដ្ឋចូលរួមគោរពច្បាប់ចរាចរណ៍ និងថែរក្សាអនាម័យបរិស្ថាន។ ទន្ទឹមគ្នានេះ ឯកឧត្តម ក៏បានណែនាំដល់អាជ្ញាធរសង្កាត់ ក្រុង ត្រូវជំរុញពន្លឿនការរំដោះដីចំណីផ្លូវ កាត់សំយាប និងរុះរើរសំណង់ផ្សេងៗដែលសង់រំលោភដីចំណីផ្លូវសាធារណៈរបស់រដ្ឋ ខណៈឯកឧត្តម ក៏ណែនាំដល់ប្រជាពលរដ្ឋបញ្ឈប់ការសាងសង់សំយាប និងសំណង់ផ្សេងៗលើដីចំណីផ្លូវ រៀបចំការលក់ដូរនៅក្នុងផ្ទះឱ្យមានរបៀបរៀបរយមិនត្រូវលក់ដូរលើដីចំណីផ្លូវឡើយ។ជាថ្មីម្តងទៀត រដ្ឋបាលខេត្តបាត់ដំបង ក៏បានបង្ហាញចក្ខុវិស័យក្នុងការរៀបចំក្រុងបាត់ដំបងឱ្យក្លាយទៅជាទីក្រុងស៊ីវិល័យ ស្អាត ឆ្លាតវៃ បៃតង និងងាយស្រួលសម្រាប់ដំណើរថ្មើជើងផងដែរ។ យ៉ាងនេះក្តី តម្លៃនៃគម្រោង ប្រភពថវិកា អ្នកទទួលការសាងសង់ និងនីតិវិធីលទ្ធកម្មមិនត្រូវបានបង្ហាញលម្អិតនោះទេ។ ថ្មីនេះៗ ដើម្បីជំរុញសន្ទុះនៃការអភិវឌ្ឍន៍ក្នុងខេត្តបាត់ដំបង ឯកឧត្តមអភិបាលខេត្តបាត់ដំបងក៏បានស្នើសុំឯកអគ្គរដ្ឋទូតចិនជួយកៀរគរអ្នកវិនិយោគចិនមកបណ្ដាក់ទុនវិនិយោគលើការកែច្នៃកសិផលនិងឈានទៅបង្កើតឱ្យមានតំបន់សេដ្ឋកិច្ចពិសេសចិននៅខេត្តបាត់ដំបង។