ការចុះអនុវត្តផ្ទាល់ទីតាំងស្ពាន ពីវិធីសាស្រ្តការដំឡើង និងការប្រើប្រាស់ឧបករណ៍វាស់សម្រុតស្ពាន ការវាស់ទទឹងស្នាមប្រេះ Scan 3D និងការត្រួតពិនិត្យស្ពានដោយប្រើ iPad ឬ Tablet ភ្នំពេញ៖ នាថ្ងៃអង្គារ ទី១៧ ខែមីនា ឆ្នាំ២០២៦ ក្រុមការងារបច្ចេកទេសនៃនាយកដ្ឋានផ្លូវថ្នល់ សហការជាមួយគ្រូបង្គោលមកពីសាកលវិទ្យាល័យ និងវិទ្យាស្ថានបច្ចេកវិទ្យានៃប្រទេសជប៉ុន ព្រមទាំងមន្ត្រីបច្ចេកទេសនៃនាយកដ្ឋានក្រោមចំណុះអគ្គនាយកដ្ឋានបច្ចេកទេស អគ្គនាយកដ្ឋានសាធារណការ អគ្គនាយកប្រព័ន្ធចម្រុះទឹកកខ្វក់ និងសិក្ខាកាមមកពីមន្ទីរសាធារណការ និងដឹកជញ្ចូនទាំង ២៥ខេត្ត-ក្រុង បានចុះអនុវត្តផ្ទាល់នៅទីតាំងស្ពាន ពីវិធីសាស្រ្តការដំឡើង និងការប្រើប្រាស់ឧបករណ៍វាស់សម្រុតស្ពាន, ការវាស់ទទឹងស្នាមប្រេះ, Scan 3D និងការត្រួតពិនិត្យស្ពានដោយប្រើ iPad ឬTablet។ ចុះអនុវត្តផ្ទាល់នេះជាសកម្មភាពថ្ងៃទី២ នៃវគ្គបណ្តុះបណ្តាលបច្ចេកទេសស្តីពី ប្រព័ន្ធគ្រប់គ្រងហេដ្ឋារចនាសម្ព័ន្ធឆ្លាតវៃ ដែលរៀបចំឡើងដោយអគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូន សហការជាមួយសាកលវិទ្យាល័យ និងវិទ្យាស្ថានបច្ចេកវិទ្យានៃប្រទេសជប៉ុន ក្រោមកម្មវិធីការលើកកម្ពស់យុទ្ធសាស្ត្រនវានុវត្ត (SIP) នៃប្រទេសជប៉ុន ដើម្បីផ្តល់ដើម្បីសិក្សាស្វែងយល់ពីយន្តការអនុវត្ត និងបទពិសោធន៍របស់ប្រទេសជប៉ុនក្នុងការថែទាំហេដ្ឋារចនាសម្ព័ន្ធផ្លូវថ្នល់៕