ការចុះពិនិត្យ និងកែលម្អផាសុកវត្ថុសម្រាប់ជនមានពិការភាព នៅតាមទីតាំងចំណតឈប់សម្រាកនៃផ្លូវល្បឿនលឿនភ្នំពេញ-ព្រះសីហនុ គឺជាកិច្ចការសំខាន់ដើម្បីធានាបាននូវ បរិយាបន្ន និងផាសុកភាពសម្រាប់អ្នកដំណើរគ្រប់រូប ភ្នំពេញ៖ នាថ្ងៃពុធ ទី១១ ខែមីនា ឆ្នាំ២០២៦ តាមសំណើពីក្រសួងសង្គមកិច្ច អតីតយុទ្ធជន និងយុវនីតិសម្បទា ក្រុមការងារក្រសួងសាធារណការ និងដឹកជញ្ជូន ដឹកនាំដោយ ឯកឧត្តម ស៊ឹង សុគង់ អនុរដ្ឋលេខាធិការ និងក្រុមការងារក្រសួងសង្គមកិច្ច អតីតយុទ្ធជន និងយុវនីតិសម្បទា ដឹកនាំដោយឯកឧត្តម អ៊ុង សម្បត្តិ អគ្គលេខាធិការ ក្រុមប្រឹក្សាសកម្មភាពជនពិការ បានរួមគ្នាចុះពិនិត្យការរៀបចំ និងកែលម្អហេដ្ឋារចនាសម្ព័ន្ធផាសុកវត្ថុ សម្រាប់ជនមានពិការភាព និងមនុស្សចាស់នៅតាមទីតាំង ឈប់សម្រាកទាំង ៨ កន្លែង នៃផ្លូវល្បឿនលឿនភ្នំពេញ-ក្រុងព្រះសីហនុ។ កម្មវិធីនេះក៏មានការចូលរួមពីថ្នាក់ដឹកនាំ និងមន្រ្តីបច្ចេកទេសរបស់ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ផងដែរ ។ ដំណើរការបេសកកម្មនេះគឺធ្វើឡើងដើម្បីចុះទៅពិនិត្យ ១). ហេដ្ឋារចនាសម្ព័ន្ធតាមទីតាំងជាក់ស្តែងដូចជាចំណតរថយន្ត ផ្លាកសញ្ញា ជម្រាល បន្ទប់អនាម័យ បន្ទប់ទឹក និងធ្នាក់ដៃជាដើម ២).បង្កើនការយល់ដឹងអំពីផាសុកវត្ថុសម្រាប់ជនមានពិការភាព ជនចាស់ជរា កុមារ និងស្រ្តីមានផ្ទៃពោះ ដល់ភាគីពាក់ព័ន្ធ ថ្នាក់ដឹកនាំ និងមន្រ្តីបច្ចេកទេស ជាពិសេសផ្តោតលើការរចនាជាសាកលសម្រាប់មនុស្សគ្រប់រូប (Universal Design for Everyone) ៣).កត់ត្រានូវចំណុចដែលបានរកឃើញដើម្បីធ្វើជារបាយការណ៍ និងលើកអនុសាសន៍កែលម្អនៅពេលខាងមុខដើម្បីឱ្យមនុស្សគ្រប់គ្នាអាចចេញចូលនឹងប្រើប្រាស់បាន។ ក្រុមការងារក្រុមប្រឹក្សាសកម្មភាពជនពិការ ក៏បានចែកជូនសៀវភៅបទដ្ឋានបច្ចេកទេស ហេដ្ឋារចនាសម្ព័ន្ធរូបវន្ត ដើម្បីបង្កលក្ខណៈងាយស្រួលសម្រាប់ជនមានពិការភាព ដល់ក្រុមការងារចូលរួមផងដែរ ដើម្បីជាមូលដ្ឋានសម្រាប់ការសាងសង់គម្រោងនានាដែលគិតគូរដល់ជនមានពិការភាព។ សូមបញ្ជាក់ផងដែរថា ផ្លូវល្បឿនលឿនមានចម្ងាយ ១៨៧,៥គីឡូម៉ែត្រ ពីរាជធានីភ្នំពេញទៅក្រុងព្រះសីហនុ មានចំណតឈប់សម្រាកចំនួន៤ គឺចំណតទី១ (កំពង់ស្ពឺកើត) ត្រង់គីឡូម៉ែត្រលេខ៤០ ចំណតទី២ (កំពង់ស្ពឺលិច) ត្រង់គីឡូម៉ែត្រលេខ៦៣ ចំណតទី៣ (កំពង់សិលា) ត្រង់គីឡូម៉ែត្រលេខ១០៩ និងចំណតទី៤ ត្រង់គីឡូម៉ែត្រលេខ១៥៦ (ព្រៃនប់)៕