ភ្នំពេញ៖ យោងតាមរបាយការណ៍សន្និបាតបូកសរុបការងារឆ្នាំ២០២៥ បានឲ្យដឹងថា ក្នុងឆ្នាំ២០២៥ ក្រសួងសាធារណការ និងដឹកជញ្ជូន បានចុះបញ្ជីរថយន្តបំពាក់ផ្លាកលេខពិសេស និងយានយន្តបំពាក់ផ្លាកលេខពិសេសផ្ទាល់ខ្លួន បានចំនួន ៥៦ ៣៨១គ្រឿង ដែលរកចំណូលបាន ១១៧ ៤២៤លានរៀល ស្មើប្រមាណ ២៩,៣៥លានដុល្លារ ខណៈឆ្នាំ២០២៤ រកបានត្រឹម ៨២ ០៥៥លានរៀលប៉ុណ្ណោះ។ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងក្នុងពិធីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ នៅថ្ងៃទី៥ កុម្ភៈនេះ ថា ការចុះបញ្ជីរថយន្តបំពាក់ផ្លាកលេខពិសេស និងយានយន្តបំពាក់ផ្លាកលេខពិសេសផ្ទាល់ខ្លួន មានការកើនឡើង បើធៀបនឹងឆ្នាំ២០២៤។ វិស័យសាធារណការ និងដឹកជញ្ជូន ក៏ជាផ្នែកមួយនៃអាទិភាពគន្លឹះនៅក្នុងយុទ្ធសាស្ត្របញ្ចកោណ ដែលបាននិងកំពុងដើរតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍប្រទេសជាតិ និងលើកកម្ពស់កំណើនសេដ្ឋកិច្ច តាមរយៈការតភ្ជាប់ឱ្យមានភាពប្រទាក់ក្រឡា និងសមាហរណកម្មផ្ទៃក្នុង និងតំបន់ ដើម្បីធានាប្រសិទ្ធភាពនៃការដឹកជញ្ជូន និងការរីកចម្រើននៃប្រព័ន្ធឡូជីស្លឹក។ លោក ប៉េង ពោធិ៍នា បានបន្តថា ក្រសួងសាធារណការ និងដឹកជញ្ជូន បានកំណត់នូវចក្ខុវិស័យសំខាន់ៗចំនួនពីរ រួមមាន ទី១.ការលើកកម្ពស់សេវាដឹកជញ្ជូនគ្រប់ប្រភេទ តាមរយៈការអភិវឌ្ឍនិងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថលក្នុ ងការ គ្រប់គ្រងនិងការផ្តល់សេវាឱ្យបានលឿនរហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត និង ទី២.ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និង ការអភិវឌ្ឍហេដ្ឋារចនាសម្ព័ន្ធដឹកជញ្ជូនឱ្យមានគុណភាព សុវត្ថិភាព ចីរភាព ភាពធន់ និងបរិយាបន្ន។ បើតាមរបាយការណ៍សន្និបាតបូកសរុបការងារឆ្នាំ២០២៥ រថយន្តបំពាក់ផ្លាកលេខពិសេស មានចំនួន ៣៨ ១៦៧គ្រឿង រកចំណូលបាន ៥៣ ២១៧លានរៀល។ ចំណែកឯ យានយន្តបំពាក់ផ្លាកលេខពិសេសផ្ទាល់ខ្លួន មានចំនួន ១៨ ២១៤គ្រឿង រកចំណូល ៦៤ ២០៧លានរៀល។ សូមបញ្ជាក់ថា ចាប់ពីឆ្នាំ២០២១ ដល់ឆ្នាំ២០២៥ ក្រសួងសាធារណការ និងដឹកជញ្ជូន បានចុះបញ្ជីរថយន្តបំពាក់ផ្លាកលេខពិសេស និងយានយន្តបំពាក់ផ្លាកលេខពិសេសផ្ទាល់ខ្លួនចំនួន ១៨៩ ៩២៧គ្រឿង ដែលរកចំណូលបាន ៤២៥ ១៥០លានរៀល ស្មើប្រមាណជាង ១០០លានដុល្លារ៕