ភ្នំពេញ ៖ ក្រសួងសាធារណការ និងដឹកជញ្ជូន បានតភ្ជាប់ និងអភិវឌ្ឍបណ្តាញហេដ្ឋារចនាសម្ព័ន្ធផ្លូវទឹក និងសមុទ្រ ឱ្យកាន់តែមានភាពប្រទាក់ក្រឡា ដើម្បីលើកកម្ពស់សកម្មភាពប្រកួតប្រជែង រួមចំណែកទ្រទ្រង់កំណើនសេដ្ឋកិច្ចជាតិរយៈពេលវែង។ ក្នុងពិធីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅឆ្នាំ២០២៦ នៅថ្ងៃទី៥ ខែកុម្ភៈ ឆ្នាំ២០២៦ នាទីស្តីការក្រសួងសាធារណការ និងដឹកជញ្ជូន ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា ការតភ្ជាប់និងការអភិវឌ្ឍហេដ្ឋារចនាសម្ព័ន្ធផ្លូវទឹក ផ្លូវសមុទ្រ និងកំពង់ផែ ក្រៅពីយុទ្ធសាស្ត្រនៃការតភ្ជាប់ផ្លូវថ្នល់ឱ្យមានភាពប្រទាក់ក្រឡា ក្រសួងបានដាក់ចេញនូវអាទិភាពគន្លឹះមួយចំនួនក្នុងគោលដៅធ្វើយ៉ាងណាឱ្យមធ្យោបាយដឹកជញ្ជូនតាមផ្លូវទឹក មានការតភ្ជាប់ ជាមួយផ្លូវគោក និងផ្លូវដែក តាមរយៈការអនុវត្តគម្រោងសាងសង់ហេដ្ឋារចនាសម្ព័ន្ធដឹកជញ្ជូនផ្លូវទឹក ផ្លូវសមុទ្រ និងកំពង់ផែ ជាពិសេសការជំរុញអនុវត្តគម្រោងសាងសង់ព្រែកជីកហ្វូណនតេជោ, គម្រោងអភិវឌ្ឍន៍ផែកុងតឺន័រទឹកជ្រៅថ្មី (ជំហាន១) នៅកំពង់ផែស្វយ័តក្រុងព្រះសីហនុ និងគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែនិងមជ្ឈមណ្ឌលឡូជីស្ទីកថ្នាក់តំបន់ ឱ្យសម្រេចជោគជ័យតាមផែនការកំណត់។ ឯកឧត្តម បានបន្តថា ក្រសួងក៏បានរៀបចំពិធីសម្ពោធបើកឱ្យប្រើប្រាស់ជាផ្លូវការកំពង់ផែទេសចរណ៍ អន្តរជាតិខេត្តកំពត និងបើកការដ្ឋានសាងសង់កំពង់ផែទេសចរណ៍កំពង់ចាម ដើម្បីជំរុញការដឹកជញ្ជូនតាមផ្លូវទឹក ឱ្យកាន់តែល្អប្រសើរ, មានភាពប្រទាក់ក្រឡា និងចូលរួមលើកកម្ពស់វិស័យទេសចរណ៍។ ឯកឧត្តម បានបន្តទៀតថា ចំពោះការលើកកម្ពស់សេវាដឹកជញ្ជូនសេវាដឹកជញ្ជូនផ្លូវទឹក ផ្លូវសមុទ្រ និងកំពង់ផែ ក្រសួងសម្រេចបានការចុះបញ្ជីនាវា ផ្លូវទឹកក្នុងប្រទេសគ្រប់ប្រភេទ និងនាវាសមុទ្រ, ការផ្តល់លិខិតអនុញ្ញាត និងបន្តសុពលភាព សេវាពាក់ព័ន្ធដឹកជញ្ជូនផ្លូវទឹក ហើយការដឹកជញ្ជូនទំនិញឆ្លងកាត់កំពង់ផែស្វយ័តក្រុង ព្រះសីហនុ និងកំពង់ផែស្វយ័តភ្នំពេញក៏មានការកើនឡើងដែរ៕