កិច្ចប្រជុំប្រចាំខែមករា ដើម្បីត្រួតពិនិត្យវឌ្ឍនភាពការងារនៃគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត) ទីស្តី្កការក្រសួង៖នាថ្ងៃពុធ ទី៤ ខែកុម្ភៈ ឆ្នាំ២០២៦ ឯកឧត្តម តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគ្រប់គ្រង និងសម្របសម្រួលគម្រោង អញ្ជើញដឹកនាំកិច្ចប្រជុំប្រចាំខែមករា ដើម្បីត្រួតពិនិត្យវឌ្ឍនភាពការងារនៃគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ ពីសិរីសោភ័ណ ទៅប៉ោយប៉ែត និងការស្ថាបនាស្ថានីយថ្លឹងយានយន្តចំនួន ៦កន្លែង ដោយមានការចូលរួមពីប្រធានគ្រប់គ្រងគម្រោង តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) ក្រុមហ៊ុនទីប្រឹក្សាបច្ចេកទេស និងក្រុមហ៊ុនម៉ៅការសាងសង់ ព្រមទាំងមន្ត្រីពាក់ព័ន្ធជាច្រើនរូប។ កិច្ចប្រជុំបានពិភាក្សា និងវាយតម្លៃលើលទ្ធផលការងារដែលសម្រេចបានក្នុងខែមករា ព្រមទាំងដាក់ចេញនូវទិសដៅការងារបន្តដើម្បីធានាឱ្យគម្រោងដំណើរការទៅតាមផែនការដែលបានកំណត់ និងបញ្ហាប្រឈមចំពោះមុខ ដោយសារស្ថានភាពសង្គ្រាមនៅតាមព្រំដែនកម្ពុជា-ថៃ បានធ្វើឱ្យប៉ះពាល់ដល់ការសាងសង់ ជាពិសេសបានបណ្តាលឱ្យមានការផ្អាកការងារបណ្តោះអាសន្នលើផ្នែកមួយចំនួន ដើម្បីធានាសុវត្ថិភាពដល់បុគ្គលិក និងកម្មករ។ ឯកឧត្តមប្រធានអង្គប្រជុំ បានកោតសរសើរដល់ក្រុមការងារទាំងអស់ដែលបានខិតខំបំពេញភារកិច្ចក្នុងកាលៈទេសៈដ៏លំបាកនេះ និងបានជំរុញឱ្យគ្រប់ភាគីពាក់ព័ន្ធត្រូវបង្កើនការប្រុងប្រយ័ត្នខ្ពស់បំផុត ដោយតម្កល់សុវត្ថិភាពជីវិតមនុស្សជាអាទិភាពចម្បង៕