វិស័យកសិកម្មនៅខេត្តមណ្ឌលគិរី ត្រូវគេសម្លឹងឃើញថាបាន និងកំពុងរីកដុះដាលជាខ្លាំង គ្រាដែលប្រភេទដី និងអាកាសធាតុអំណោយផលទៅលើការដាំដុះបន្លែផ្លែឈើគ្រប់មុខ រួមទាំងដំណាំកសិឧស្សាហកម្មក៏លូតលាស់ល្អផងដែរ។ ជាក់ស្តែងក្នុងតំបន់ណាមលៀរ យើងបានស្គាល់ និងយល់ច្បាស់ពីសក្តានុពលនៃធនធានដីសម្រាប់ដំណាំ ដូចជាកាហ្វេ ដែលផ្តល់ទាំងគុណតម្លៃសេដ្ឋកិច្ចខ្ពស់ និងលើកកម្ពស់ជីវភាពរស់នៅរបស់បងប្អូនជនជាតិដើមភាគតិចក្នុងមូលដ្ឋានផងដែរ។ កាហ្វេនៅក្នុងតំបន់នេះ ជាកាហ្វេធម្មជាតិ មានគុណភាពខ្ពស់ និងមានតម្លៃលក់ល្អនៅលើទីផ្សារ ហើយត្រូវបានមើលឃើញជាផលិតផលដែលបង្ហាញអត្តសញ្ញាណ និងសេរីភាពរបស់ជនជាតិដើមភាគតិចផងដែរ។ ទេសចរណ៍កាហ្វេក៏កំពុងក្លាយជាកត្តាចំណូលសំខាន់សម្រាប់សហគមន៍ ដែលភ្ញៀវទេសចរអាចស្វែងយល់ពីវិធីដាំកាហ្វេ ធ្វើកាហ្វេ និងភ្លក្សកាហ្វេដោយផ្ទាល់ពីជនជាតិដើម៕ ប្រភពរូបភាពពី៖ សាយ សំអាល់ - Say Samal