ផ្លូវថ្មីមួយខ្សែត្រូវបានឈូសសម្រួលតភ្ជាប់ការធ្វើដំណើរពីតំបន់អេកូទេសចរណ៍ជីផាត ទៅដល់តំបន់អេកូទេសចរណ៍អារ៉ែងក្នុងស្រុកថ្មបាំងខេត្តកោះកុង។លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានប្រាប់កម្ពុជាថ្មីថា ផ្លូវពីជីផាតទៅអារ៉ែងបច្ចុប្បន្ននេះត្រូវបានឈូសទម្លុះ ដែលអាចឲ្យពលរដ្ឋឬភ្ញៀវទេសចរអាចធ្វើដំណើរពីភូមិជីផាតទៅដល់តំបន់អេកូទេសចរណ៍អារ៉ែងក្នុងស្រុកថ្មបាំង ដែលផ្លូវតភ្ជាប់គ្នានេះមានចម្ងាយជាង ៣០ គីឡូម៉ែត្រ។យ៉ាងណាមិញ លោកបញ្ជាក់ថា ផ្លូវដែលអាជ្ញាធរបានឈូសទម្លុះនេះអាចធ្វើដំណើរបើកបរបាននៅរដូវប្រាំង ប៉ុន្តែនៅរដូវវស្សាអាចប្រឈមមានការដាច់ខ្លះៗ។ក្រៅពីផ្លូវថ្មីដែលអាជ្ញាធរបានឈូសសម្រួលធ្វើដំណើរបណ្តោះអាសន្ន ផ្លូវមួយខ្សែថ្មីទៅអារ៉ែងក្នុងស្រុកថ្មបាំងក៏កំពុងស្ថាបនាជាផ្លូវកៅស៊ូនិងបេតុងចេញពីផ្លូវជាតិលេខ ៤៨ ដោយប្រើប្រាស់គម្រោងមូលនិធិពីដៃគូអភិវឌ្ឍ។ផ្លូវដែលក្រសួងអភិវឌ្ឍន៍ជនបទកំពុងស្ថាបនាទៅអារ៉ែងចេញពីផ្លូវជាតិលេខ ៤៨ ត្រង់គីឡូម៉ែត្រលេខ ១១៥ មាន ៣ កំណាត់ ដោយកំណាត់ទី ១ ប្រវែង ២៦ គីឡូម៉ែត្រ ដែលជាគម្រោងរបស់ AIB សម្រេចបានការស្ថាបនាប្រហែល ៩០% ខណៈកំណាត់ពីស្រុកថ្មបាំងដល់ស្ទឹងអារ៉ែងប្រវែង ១៦ គីឡូម៉ែត្រជាគម្រោងរបស់ CSLEP ទើបបើកការដ្ឋានសាងសង់គ្រោងចំណាយពេលប្រហែល ១ ឆ្នាំ។ កន្លងទៅកំណាត់ផ្លូវជាង ១០ គីឡូម៉ែត្រក្នុងស្រុកថ្មបាំងដែលជាគម្រោងរបស់រដ្ឋាភិបាលតាមរយៈក្រសួងអភិវឌ្ឍន៍ជនបទ បានបញ្ចប់ដាក់ឲ្យប្រើប្រាស់។ លោក អៀង ដារ៉ាវុធ បានបញ្ជាក់ថា ផ្លូវដែលកំពុងសាងសង់ទៅតំបន់ស្ទឹងអារ៉ែងជាផ្លូវយុទ្ធសាស្ត្រដ៏សំខាន់ ដែលរាប់សិបឆ្នាំមកហើយមិនមានផ្លូវធ្វើដំណើរបានស្រួលនោះទេ។ បើតាមមន្រ្តីរូបនេះ ផ្លូវកំពុងស្ថាបនានេះថ្ងៃខាងមុខក៏នឹងតភ្ជាប់ផ្លូវមួយខ្សែដែលគ្រោងសាងសង់ចេញតំបន់ទេសចរណ៍ខ្នងផ្សារក្នុងខេត្តកំពង់ស្ពឺ និងតភ្ជាប់ទៅបណ្ដាខេត្តផ្សេងៗនៅតំបន់កណ្តាល៕