ដំណើរទស្សនកិច្ចចុះពិនិត្យស្ថានីយប្រព្រឹត្តកម្មទឹកកខ្វក់ជើងឯក រាជធានីភ្នំពេញ ក្រោមកម្មវិធីសន្និបាតអេវ៉ាប់លើកទី៤ ស្តីពីភាពជាដៃគូលើការគ្រប់គ្រងទឹកកខ្វក់ក្នុងតំបន់អាស៊ី (AWaP) រាជធានីភ្នំពេញ៖ នាព្រឹកថ្ងៃពុធ ទី១៩ ខែវិច្ឆិកា ឆ្នាំ២០២៥ ក្រុមការងារបច្ចេកទេសរបស់អគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន បានសហការជាមួយក្រុមការងារបច្ចេកទេស JICA រៀបចំដំណើរទស្សនកិច្ច ដើម្បីចុះពិនិត្យ និងសិក្សាស្វែងយល់អំពីដំណើរការប្រតិបត្តិការរបស់ស្ថានីយប្រព្រឹត្តកម្មទឹកកខ្វក់ជើងឯក ក្រោមការសម្របសម្រួលពីមន្ទីរសាធារណការ និងដឹកជញ្ជូនរាជធានីភ្នំពេញ ដោយមានការចូលរួមពីគណៈប្រតិភូមកពីក្រសួងដែនដី ហេដ្ឋារចនាសម្ព័ន្ធដឹកជញ្ជូននៃប្រទេសជប៉ុន (MLIT) និងតំណាងប្រទេសជាសមាជិក AWaP ចំនួន ៤ប្រទេស រួមមាន៖ បង់ក្លាដេស ឥណ្ឌូណេស៊ី ហ្វីលីពីន និងវៀតណាម លើសពីនេះទៀត ក៏មានការចូលរួមពីនិស្សិតវិទ្យាស្ថានតេជោសែន សាធារណការ និងដឹកជញ្ជូនផងដែរ។ សូមបញ្ជាក់ផងដែរថា ស្ថានីយប្រព្រឹត្តកម្មទឹកកខ្វក់ជើងឯកនេះ ត្រូវបានសាងសង់លើផ្ទៃដីទំហំ ៣ហិកតា និងប្រើប្រាស់បច្ចេកវិទ្យា Pre-Trickling Filter System ដែលមានសមត្ថភាពប្រព្រឹត្តកម្មប្រមាណ ៥ ០០០ ម៣/ថ្ងៃ។ គម្រោងនេះ ត្រូវបានអភិវឌ្ឍក្រោមហិរញ្ញប្បទានជំនួយឥតសំណងពីរាជរដ្ឋាភិបាលជប៉ុន ជូនប្រជាជនកម្ពុជា ដែលមានតម្លៃប្រមាណ ២០លានដុល្លារអាមេរិក៕