ពិធីបើកជាផ្លូវការនៃកិច្ចប្រជុំរដ្ឋមន្រ្តីដឹកជញ្ជូនអាស៊ាន លើកទី៣១ និងកិច្ចប្រជុំពាក់ព័ន្ធបានប្រព្រឹត្តទៅក្រោមអធិបតីភាព ឯកឧត្តម U Nyo Saw នាយករដ្ឋមន្រ្តីនៃប្រទេសមីយ៉ាន់ម៉ា ទីក្រុងណៃពិដោ ៖ តបតាមការអញ្ជើញរបស់ឯកឧត្តម Mya Tun Oo រដ្ឋមន្ត្រីដឹកជញ្ជូន និងគមនាគមន៍ នៃប្រទេសមីយ៉ាន់ម៉ា និងដោយទទួលបានការអនុញ្ញាតដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នាថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូកម្ពុជាអញ្ជើញចូលរួមកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី៣១ និងកិច្ចប្រជុំពាក់ព័ន្ធ ដែលបានប្រព្រឹត្តទៅនៅទីក្រុងណៃពិដោ ប្រទេសមីយ៉ាន់ម៉ា។ កិច្ចប្រជុំនេះត្រូវបានរៀបចំឡើងក្នុងគោលបំណង៖ (១) ពិនិត្យការអនុវត្តផែនការសកម្មភាពក្នុងក្របខណ្ឌអាស៊ានដែលបានអនុវត្តក្នុងឆ្នាំ២០២៥ និងកំណត់ទិសដៅ, គោលនយោបាយ និងផែនការសកម្មភាពសម្រាប់អនុវត្តក្នុងឆ្នាំ២០២៦ (២) ពិនិត្យ និងអនុម័តផែនការវិស័យដឹកជញ្ជូនអាស៊ាន ឆ្នាំ២០២៦-២០៣០ (ASEAN Transport Sectoral Plan) និង (៣) ពិនិត្យ និងអនុម័តផែនការវិស័យដឹកជញ្ជូនអាស៊ានជាមួយដៃគូសន្ទនា ដែលរួមមាន៖ ចិនជប៉ុន, និង កូរ៉េ។ ក្នុងឱកាសនៃកិច្ចប្រជុំពេញអង្គរដ្ឋមន្រ្តីដឹកជញ្ជូនអាស៊ានលើកទី៣១នេះ ឯកឧត្តម ប៉េង ពោធិ៍នា បានធ្វើបទអន្តរាគមន៍ដោយបាន (១) ស្វាគមន៍ការចូលជាសមាជិកពេញសិទ្ធិរបស់ប្រទេសទីម័រឡេស្តេក្នុងសមាគមអាស៊ាន និង (២) បញ្ជាក់ពីការប្តេជ្ញាចិត្តរបស់កម្ពុជាក្នុងការចូលរួមអនុវត្តផែនការវិស័យដឹកជញ្ជូនអាស៊ាន ឆ្នាំ២០២៦-២០៣០ ដែលនឹងពង្រឹងការតភ្ជាប់ដោយរលូន, ជំរុញសមាហរណកម្មការដឹកជញ្ជូនពហុរូបភាព និងការពារភាពធន់នៃខ្សែច្រវាក់ផ្គត់ផ្គង់។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube