"ស្ត្រីត្រូវបន្តចូលរួមចំណែកឱ្យសកម្មបន្ថែមទៀត ព្រោះស្ត្រីជាផ្នែកដ៏សំខាន់ក្នុងការជួយអភិវឌ្ឍសង្គមគ្រួសារ និងសង្គមជាតិ" ជាមតិលើកឡើងរបស់ លោកជំទាវ មឹន មាណវី រដ្ឋលេខាធិការ និងជាប្រធានគណៈកម្មការទទួលបន្ទុកយេនឌ័រ និងយន្តការគាំទ្ររបស់ក្រសួងសាធារណការ និងដឹកជញ្ជូន ក្នុងវគ្គផ្សព្វផ្សាយស្តីពីអនុសញ្ញាស្ដីពីការលុបបំបាត់ទម្រង់ នៃការរើសអើងប្រឆាំងនឹងនារីភេទ(CEDAW) និងអនុសាសន៍ទាំង១២ចំណុចរបស់សម្ដេចមហាបវរធិបតី និងច្បាប់ពាក់ព័ន្ធមួយចំនួន នៅខេត្តកំពត កំពត៖ នាថ្ងៃព្រហស្បត៍ ទី២៣ ខែតុលា ឆ្នាំ២០២៥ លោកជំទាវ មឹន មាណវី រដ្ឋលេខាធិការ និងជាប្រធានគណៈកម្មការទទួលបន្ទុកយេនឌ័រ និងយន្តការគាំទ្ររបស់ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងវគ្គផ្សព្វផ្សាយស្តីពីអនុសញ្ញាស្ដីពីការលុបបំបាត់ទម្រង់ នៃការរើសអើងប្រឆាំងនឹងនារីភេទ(CEDAW) និងអនុសាសន៍ទាំង១២ចំណុចរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងច្បាប់ពាក់ព័ន្ធមួយចំនួន ដោយមានការចូលរួមពី លោកជំទាវ មុយ វិរ័ត្ន អភិបាលរង តំណាងឯកឧត្តមអភិបាល នៃគណៈអភិបាលខេត្តកំពត ឯកឧត្តមអនុរដ្ឋលេខាធិការ លោក-លោកស្រី ជាថ្នាក់ដឹកនាំតាមអង្គភាពក្រោមឱវាទក្រសួង និងថ្នាក់ដឹកនាំ មន្ត្រីរាជការនៃមន្ទីរសាធារណការ និងដឹកជញ្ជូនខេត្តកំពត ខេត្តព្រះសីហនុ ខេត្តកោះកុង ខេត្តកែប ខេត្តតាកែវ បន្ទាយមានជ័យ និងខេត្តឧត្តរមានជ័យ រួមទាំង គ្រូឧទ្ទេសជាតំណាងអគ្គលេខាធិការដ្ឋាន នៃក្រុមប្រឹក្សាជាតិកម្ពុជាដើម្បីស្ត្រី សរុបអ្នកចូលរួមប្រមាណជិត ១០០ នាក់។ វគ្គផ្សព្វផ្សាយនេះ រៀបចំឡើងក្នុងគោលបំណងបង្ហាញឱ្យឃើញថាប្រមុខរាជរដ្ឋាភិបាលកម្ពុជាបានយកចិត្តទុកដាក់ខ្ពស់ក្នុហការលើកកម្ពស់តួនាទី និងការចូលរួមរបស់ស្រ្តីនៅគ្រប់ស្ថាប័នរាប់តាំងពីក្រុម ភូមិ ឃុំ សង្កាត់ខណ្ឌ ស្រុក រាជធានីខេត្ត ក្រសួងមន្ទីរ និងក៏បានផ្សារភ្ជាប់ជាមួយអង្គការអន្តរជាតិ ដើម្បីជាការចូលរួមគោរពច្បាប់អន្តរជាតិ និងពង្រឹងកិច្ចសហប្រតិបត្តិការជាសកលដើម្បីសុខសន្តិភាព និងការអភិវឌ្ឍលើគ្រប់វិស័យ និងលើកកម្ពស់ជីវភាព សុខុមាលភាព និងសិទ្ធិពេញលេញរបស់ប្រជាពលរដ្ជនិងស្រ្តី។ ថ្លែងក្នុងឱកាសនោះ លោកជំទាវរដ្ឋលេខាធិការ បានពាំនាំក្តីនឹករលឹក ពី ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ជូនចំពោះសិក្ខាកាមដែលបានចូលរួមក្នុងពិធីនេះ ព្រមទាំងបានអំពាវនាវឱ្យបងប្អូនសិក្ខាកាមជាស្ត្រី ត្រូវបន្តចូលរួមចំណែកឱ្យសកម្មបន្ថែមទៀត ព្រោះស្ត្រីជាផ្នែកដ៏សំខាន់ក្នុងការជួយអភិវឌ្ឍសង្គមគ្រួសារ និងសង្គមជាតិ។ ជាមួយគ្នានោះដែរ លោកជំទាវគណៈអធិបតី បានក្រើនរំលឹកដល់អ្នកចូលរួមពិធីនេះជួយពញ្ញាក់ស្មារតីប្រជាពលរដ្ឋទាំងអស់ត្រូវគោរពច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន ក្នុងស្មារតីទទួលខុសត្រូវខ្ពស់ និងប្រកាន់យកគោលការណ៍សុវត្ថិភាពជាចម្បង ដើម្បីជៀសផុតពីគ្រោះថ្នាក់ចរាចរណ៍ មានសុវត្ថិភាពគ្រប់ក្រុមគ្រួសារ រួមជាមួយភាពសុខដុម មិនមានការើសអើងចំពោះនារីភេទ ដែលជាកត្តាឈានដល់ការរួមចំណែកជួយជំរុញនូវការអភិវឌ្ឍសង្គមជាតិ ក្នុងន័យឆ្លើយតបចំពោះការខិតខំរបស់ថ្នាក់ដឹកនាំគ្រប់លំដាប់ថ្នាក់ ដែលបានលះបង់កម្លាំងកាយ ប្រាជ្ញា ចិត្ត ក្នុងការអភិវឌ្ឍប្រទេស និងជាខែលការពារប្រទេសជាតិផងដែរ៕