តាកែវ៖ ប្រជាពលរដ្ឋនៅភូមិផ្សារគុម្ពឬស្សី ឃុំតាំងដូង ស្រុកបាទី ខេត្ដតាកែវ បានសម្ដែងការរីករាយ ដោយទទួលបានផ្លូវបេតុងមួយខ្សែប្រវែងមួយគីឡូម៉ែត្រ និងអំពូលភ្លើងសូឡាអមផ្លូវបេតុងនៅក្នុងមូលដ្ឋាន ដើម្បីងាយស្រួលក្នុងការធ្វើដំណើរ និងធានាសុវត្ថិភាពផងដែរ។ ថ្លែងប្រាប់អ្នកសារព័ត៌មានរបស់វិទ្យុជាតិនៅថ្ងៃទី២០ ខែតុលា ឆ្នាំ២០២៥ លោក ស៊ុំ សូនី ប្រជាពលរដ្ឋរស់នៅភូមិផ្សារគុម្ពឬស្សី ឃុំតាំងដូង ស្រុកបាទី ខេត្ដតាកែវ បានបង្ហាញការអបអរសាទរចំពោះសមិទ្ធផលផ្លូវបេតុងមួយខ្សែថ្មី ដើម្បីងាយស្រួលពួកគាត់ធ្វើចរាចរណ៍បានឆាប់រហ័សជាងមុន និងចំនេញពេលវេលាក្នុងការធ្វើដំណើរឆ្លងកាត់ទៅវិញទៅមក។ លោកបានបញ្ជាក់ថា កន្លងមកផ្លូវក្នុងភូមិមានការលំបាកធ្វើដំណើរដោយនៅរដូវវស្សាមានភក់ជ្រាំ រអិល និងពេលរដូវប្រាំងមានជង្ហុកច្រើន។ ចំណែកផ្លូវថ្មីដែលកំពុងស្ថាបនានេះជាផ្លូវបេតុងថ្មីនឹងជួយសម្រួល ការធ្វើដំណើរប្រជាពលរដ្ឋក្នុងការដឹកជញ្ជូនដំណាំកសិកម្ម ងាយ ស្រួលសិស្សានុសិស្សធ្វើដំណើរទៅសាលារៀន ពលរដ្ឋដើរហាត់ប្រាណ ជាពិសេសជួយលើកកម្ពស់ជីវភាព និងកាត់បន្ថយភាពក្រីក្ររបស់ពលរដ្ឋនៅតំបន់នេះផងដែរ។ ទន្ទឹមនឹងនេះ អំពូលភ្លើងសូឡាដាក់អមតាមផ្លូវបេតុង គឺធានាដល់សុវត្ថិភាពការធ្វើដំណើរថ្មើជើង ម៉ូតូឡាន និងធ្វើឱ្យភូមិឃុំមានមានសុវត្ថិភាព ជាពិសេស បង្កភាពស្រស់ស្អាត ដោយភ្លើងភ្លឺបែបស៊ីវីល័យផងដែរ។ សំឡេង«ក្នុងនាមជាប្រជាពលរដ្ឋនៅភូមិផ្សារគុម្ពឬស្សីក្រោយទទួលបានផ្លូវបេតុង និងអំពូលភ្លើងសូឡា…និងធានាសន្ដិសុខនៅមូលដ្ឋាន»។ ជាមួយគ្នានេះប្រជាពលរដ្ឋ បានថ្លែងអំណរគុណដល់ប្រធានក្រុមការងារគណបក្សប្រជាជនកម្ពុជាចុះជួយខេត្ដតាកែវ ដែលបានខិតខំអភិវឌ្ឍន៍ហេដ្ឋារចនា សម្ព័ន្ធ ឱ្យក្លាយជាទីរស់នៅដ៏ល្អរបស់ប្រជាពលរដ្ឋ។ ចំពោះការអភិវឌ្ឍរីកចម្រើនឥតឈប់ឈររបស់សម្ដេច បង្ហាញពីប្រទេសជាតិមានសន្ដិភាព និងការរស់នៅក្រោមដំបូលសន្តិភាព។ ក្នុងឱកាសនោះ ប្រជាពលរដ្ឋក៏បានស្នើសុំឱ្យអាជ្ញាធរជួយធ្វើទួលបន្ថយល្បឿន ដើម្បីបញ្ចៀសការគ្រោះថ្នាក់ចរាចរណ៍ ខណៈដែលផ្លូវស្អាតមានការជិះម៉ូតលឿនៗណាស់ ដោយមានការព្រួយបារម្ភជាខ្លាំង។ លោក ណុប សម្បត្ដិ មេឃុំតាំងដូង បានឲ្យដឹងថា ផ្លូវមួយខ្សែនេះមានទំហំទទឹង ៤ម៉ែត្រ និងបណ្ដោយ ១គីឡូម៉ែត្រ និងអំពូលភ្លើងសូឡា ៣០ ដើមសិន ដែលជាជំនួយរបស់ឯកឧត្ដម ជា វ៉ាន់ដេត រដ្ឋមន្រ្ដីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារគណបក្សប្រជាជនកម្ពុជាចុះជួយខេត្ដតាកែវ បានជួយស្ថានបនាផ្លូវបេតុងមួយខ្សែនៅភូមិផ្សារគុម្ពឬស្សី។ ឆ្លើយតបទៅសូមណូមពររបស់ប្រជាពលរដ្ឋនៅភូមិផ្សារគុម្ពឬស្សី លោកមេឃុំបានណែនាំឱ្យមេភូមិចុះទៅធ្វើទួលបន្ថយល្បឿនចរាចរណ៍ ដើម្បីបញ្ចៀសការគ្រោះថ្នាក់ចរាចរណ៍របស់ពលរដ្ឋ៕