ពិធីបិទវគ្គបណ្ដុះបណ្ដាលស្ដីពី «នីតិវិធីក្នុងការស្នើសុំហិរញ្ញប្បទានពីដៃគូអភិវឌ្ឍន៍អន្តរជាតិ» ទីស្ដីការក្រសួង៖ នាព្រឹកថ្ងៃអង្គារ ទី១៤ ខែតុលា ឆ្នាំ២០២៥ ឯកឧត្តម កែន រដ្ឋា អគ្គនាយករដ្ឋបាល និងហិរញ្ញវត្ថុ បានអញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពី “នីតិវិធីក្នុងការស្នើសុំហិរញ្ញប្បទានពីដៃគូអភិវឌ្ឍន៍អន្តរជាតិ» ដែលបានប្រព្រឹត្តទៅដោយភាពជោគជ័យ និងមានការចូលរួមយ៉ាងផុសផុលពីសិក្ខាកាមដែលអញ្ជើញមកពីគ្រប់អង្គភាព រដ្ឋបាលកណ្តាលរបស់ក្រសួង និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត។ វគ្គបណ្តុះបណ្តាលនេះមានគោលបំណងបង្កើនការយល់ដឹងដល់មន្ត្រីរាជការ នឹងផ្តល់ចំណេះដឹង និងជំនាញបន្ថែម ទាំងផ្នែកទ្រឹស្តី និងការអនុវត្តផ្ទាល់ជូនដល់សិក្ខាកាមជាមន្រ្តីរាជការក្រសួងលើតម្រូវការ និងនិតីវិធីគន្លឹះក្នុងការរៀបចំសំណើគម្រោង ដើម្បីទទួលបានហិរញ្ញប្បទានពីដៃគូអភិវឌ្ឍន៍អន្តរជាតិនានា ប្រកបដោយភាពជោគជ័យ ផ្តោតលើការលើកកម្ពស់ប្រសិទ្ធភាពការងាររបស់មន្រ្តី និងអង្គភាពក្រោមឱវាទក្រសួង ដោយមានការចូលរួមចែករំលែកដោយគ្រូឧទ្ទេស និងវាគ្មិនដែលអញ្ជើញមកពីក្រសួង-ស្ថាប័នពាក់ព័ន្ធដូចជាក្រុមប្រឹក្សាអភិវឌ្ឍន៍កម្ពុជា ការិយាល័យតំណាងធនាគារ Korea Eximbank នៃមូលនិធិសហប្រតិបត្តិការអភិវឌ្ឍសេដ្ឋកិច្ច (EDCF) របស់រដ្ឋាភិបាលនៃសាធារណរដ្ឋកូរ៉េ វិទ្យាស្ថានអភិវឌ្ឍន៍បៃតងសកល (GGGI) ប្រចាំកម្ពុជា និងទីប្រឹក្សាបច្ចេកទេសជាន់ខ្ពស់របស់JICAនៃគម្រោងប្រចាំនៅក្រសួងសាធារណការ និងដឹកជញ្ជូន។ ថ្លែងទៅកាន់អង្គពិធី ឯកឧត្ដមអគ្គនាយក បានបង្ហាញនូវក្ដីសង្ឃឹម និងភាពជឿជាក់ថាសិក្ខាកាមជាមន្រ្តីបង្គោលនឹងទទួលបាននូវចំណេះដឹងបន្ថែមទាក់ទងនឹងការរៀបចំសំណើគម្រោង និងបទពិសោធន៍នៃការស្វែងរកធនធានហិរញ្ញវត្ថុ ដើម្បីទទួលបានជោគជ័យក្នុងការស្នើសុំ និងទទួលបានហិរញ្ញប្បទានយកមកអនុវត្តគម្រោងរបស់ខ្លួនពីដៃគូអភិវឌ្ឍន៍អន្តរជាតិ។ ជាទិសដៅបន្ត ក្រសួងនឹងបន្តជំរុញឱ្យមានការរៀបចំវគ្គបណ្ដុះបណ្ដាលរយៈពេលខ្លី មធ្យម និងវែងបន្ថែមទៀត ដែលស្របទៅនឹងអាទិភាពគន្លឹះរបស់រាជរដ្ឋាភិបាល និងចក្ខុវិស័យរបស់ក្រសួងសាធារណការនិងដឹកជញ្ជូន ក្នុងការអភិវឌ្ឍធនធានមនុស្ស និងពង្រឹងសមត្ថភាពរបស់មន្រ្តីរាជការ៕