កិច្ចប្រជុំជំនាញបច្ចេកទេសដើម្បីពិនិត្យ និងពិភាក្សាលើសេចក្តីព្រាងអនុក្រឹត្យ ស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ទីស្តីការគណៈរដ្ឋមន្ត្រី៖ នាថ្ងៃសុក្រ ទី១០ ខែតុលា ឆ្នាំ២០២៥ ឯកឧត្តម ប៊ុន សុផាត អនុរដ្ឋលេខាធិការក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ចូលរួមកិច្ចប្រជុំជំនាញបច្ចេកទេសដើម្បីពិនិត្យ និងពិភាក្សាលើសសេចក្តីព្រាងអនុក្រឹត្យ ស្តីពីបែបទ និងនីតិវិធីនៃការប្របូលកម្រៃសេវាប្រើប្រាស់ប្រព័ន្ធលូ ក្រោមអធិបតីភាព ឯកឧត្តម លីវ សុវណ្ណា អនុប្រធាន និងជាប្រធានក្រុមទី៤នៃក្រុមប្រឹក្សាអ្នកច្បាប់ និងឯកឧត្តម នៅ បោនន័រ អនុប្រធាន និងជាប្រធានក្រុមទី១នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងមានការអញ្ជើញចូលរួមពីសំណាក់ឯកឧត្តម លោកជំទាវតំណាងសមាជិកក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងគណៈកម្មការភាសាវិទ្យាខ្មែរ ព្រមទាំងថ្នាក់ដឹកនាំ និងមន្ត្រីជំនាញនៃទីស្ដីការគណៈរដ្ឋមន្ត្រី។ កិច្ចប្រជុំជំនាញបច្ចេកទេសនេះ បានពិនិត្យ និងពិភាក្សាយ៉ាងយកចិត្តទុកដាក់លើទិដ្ឋភាពទូទៅ និងទិដ្ឋភាពច្បាប់ពាក់ព័ន្ធនឹងសេចក្តីព្រាងអនុក្រឹត្យរួចមក អង្គប្រជុំបានសម្រេចលទ្ធផលមួយចំនួនរួមមានៈ ១). ឯកភាពកែសម្រួលលើទម្រង់ ខ្លឹមសារ ពាក្យពេចន៍ និងអក្ខរាវិរុទ្ធមួយចំនួនត្រឹមមាត្រា៨ នៃសេចក្តីព្រាងអនុក្រឹត្យខាងលើ ២). ឯកភាពឱ្យក្រសួងសាធារណការ និងដឹកជញ្ជូន ពិនិត្យ កែសម្រួល និងបន្ថែមធាតុចូលក្នុងសេចក្តីព្រាងអនុក្រឹត្យ ស្របតាមស្មារតីនៃអង្គប្រជុំ និង ៣). នឹងដាក់បញ្ចូលសេចក្តីព្រាងអនុក្រឹត្យ ក្នុងកិច្ចប្រជុំជំនាញបច្ចេកទេសអន្តរក្រសួងចង្អៀត ដែលនឹងត្រូវជូនដំណឹងនៅពេលក្រោយ។ អនុក្រឹត្យនេះរៀបចំឡើងក្នុងគោលបំណងកំណត់អំពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ សំដៅធានាបាននូវថវិកាជួយទ្រទ្រង់សម្រាប់ប្រតិបត្តិការ និងការថែទាំប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ នៅក្នុងព្រះរាជាណាចក្រកម្ពុជា ឱ្យមានប្រសិទ្ធភាព គណនេយ្យភាព និងធានានិរន្តរភាព៕