មន្រ្តីក្រសួងសាធារណការនិងដឹកជញ្ជូន បានបង្ហាញវឌ្ឍនភាពនៃដំណើរការសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ដែលសម្រេចបានលទ្ធផលគ្រោងបញ្ចប់ទៅតាមផែនការដែលបានគ្រោងទុក។លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា គិតត្រឹមដើមខែតុលា ឆ្នាំ២០២៥ ដំណើរការសាងសង់ស្ពានឆ្លងកាត់ទន្លេមេគង្គដីឥដ្ឋ-ថ្មគរ សម្រេចលទ្ធផលបានប្រមាណ ២៧% ខណៈតាមផែនការគ្រោងប្រើប្រាស់រយៈពេលសាងសង់ចំនួន ៤៨ ខែ ហើយគ្រោងបញ្ចប់នៅឆ្នាំ ២០២៨។កាលពីម្សិលមិញនេះ ថ្នាក់់ដឹកនាំក្រសួងសាធារណការនិងដឹកជញ្ជូន បានដឹកនាំប្រតិភូនិងមន្រ្តីជំនាញចុះទៅពិនិត្យការដ្ឋានសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ដើម្បីពន្លឿនការសាងសង់ឱ្យបានឆាប់រហ័ស។លោក ភី សុភាត់ អនុរដ្ឋលេខាធិការក្រសួងសាធារណការនិងដឹកជញ្ជូនបានបញ្ជាក់ថា ការចុះទៅពិនិត្យនេះក្នុងគោលបំណងចំនួន ៤ សំខាន់ៗរួមមាន៖ ១). ការពិនិត្យវិធានការណ៍សុវត្ថិភាពនៅផ្នែកផ្លូវក្រវាត់ក្រុងទី ៣ ដែលបិទបណ្ដោះអាសន្ននិងចំណុចប្រសព្វនៃផ្លូវ ១១៦ ២). ត្រួតពិនិត្យតំបន់សំណង់សសរគ្រឹះនៃស្ពានលើអាកាសត្រង់ PK1+540 និងយល់ដឹងអំពីវឌ្ឍនភាពសំណង់ និងការតេស្តសាកល្បងលទ្ធភាពទ្រទ្រង់របស់សសរគ្រឹះ ៣).ពិនិត្យរោងចក្រជួសជុលដែកខាងលិចទន្លេ និងពិនិត្យការប្រតិបត្តិការលុបច្រែះដែកដោយម៉ាស៊ីនឡេស៊ែរ និង ៤). ពិនិត្យតំបន់សំណង់គ្រឹះសសរក្នុងទឹកនៅខាងលិចទន្លេ ដើម្បីយល់ដឹងអំពីបច្ចេកទេសសាងសង់សសរគ្រឹះ។គម្រោងសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) មានទីតាំងស្ថិតក្នុងខេត្តនៅក្នុងខេត្តកណ្តាល មានប្រវែងសរុប ១ ៦០០ ម៉ែត្រ និងទទឹង ២៦ ម៉ែត្រ (៤គន្លងផ្លូវ)។ ផ្លូវតភ្ជាប់ក្បាលស្ពានប្រវែង ២ ១០០ ម៉ែត្រ ទទឹងផ្លូវ ២៦ ម៉ែត្រ ក្រាលបេតុងកៅស៊ូ (AC) និងសាងសង់ផ្លូវបង្វែរទិសចរាចរណ៍ចំនួន ៤ ខ្សែ (គ្រោងនឹងបញ្ចប់ក្នុងឆ្នាំ ២០២៨) ខាងមុខនេះ៕