កិច្ចប្រជុំក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន ទីស្តីការក្រសួង៖ នាថ្ងៃអង្គារ ទី៧ ខែតុលា ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកកិច្ចការនីតិកម្ម និងជាប្រធានក្រុមការងារ បានអញ្ជើញដឹកនាំកិច្ចប្រជុំក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួង និងសមាជិក សមាជិកាក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្ត។ ឯកឧត្តមប្រធានអង្គប្រជុំ បានមានប្រសាសន៍គូសបញ្ជាក់ថា ក្រុមការងារនេះបង្កើតឡើងស្របតាមសេចក្តីសម្រេចលេខ១៣២ សសរ ចុះថ្ងៃទី២៦ ខែធ្នូ ឆ្នាំ២០១៦ របស់រាជរដ្ឋាភិបាលស្តីពីការបង្កើតក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្ត ដើម្បីត្រួតពិនិត្យ តាមដាន និងកែសម្រួលលើលិខិតបទដ្ឋានគតិយុត្ត កិច្ចសន្យា និងកិច្ចព្រមព្រៀងនៅក្នុងក្របខណ្ឌក្រសួងសាមី ដែលនៅខ្វះចន្លោះ និង/ឬ លែងអាចអនុវត្តបាន ស្របតាមការវិវឌ្ឍរបស់សង្គមជាតិនាពេលបច្ចុប្បន្ន។ ទន្ទឹមនឹងនេះ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់សមាជិកសមាជិកានៃក្រុមការងារ ដែលបានសហការល្អប្រកបដោយស្មារតីទទួលខុសត្រូវខ្ពស់ និងបានស្នើឱ្យលេខាធិការដ្ឋាននៃក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តនៃក្រសួងសាធារណការ និងដឹកជញ្ជូន ពង្រឹងដំណើរការនីតិវិធីការងារនេះ ដោយអនុលោមតាមច្បាប់ និងលិខិតបទដ្ឋានពាក់ព័ន្ធ ដើម្បីរៀបចំរបាយការណ៍វាយតម្លៃលើផលប៉ះពាល់នៃលិខិតបទដ្ឋានគតិយុត្តឱ្យមានគុណភាពកាន់តែល្អប្រសើរថែមមួយកម្រិតទៀត។ សូមជម្រាបផងដែរថា៖ ក្រុមការងារនេះបង្កើតឡើងក្នុងគោលបំណងលើកកម្ពស់គុណភាព និងឧត្តមភាពនៃច្បាប់ កិច្ចសន្យា កិច្ចព្រមព្រៀងសំខាន់ៗ និងលិខិតបទដ្ឋានគតិយុត្តពាក់ព័ន្ធក្នុងវិស័យសាធារណការ និងដឹកជញ្ជូន និងមានវិសាលភាពអនុវត្តការងាររៀបចំ កសាង កែសម្រួល និងពិនិត្យឡើងវិញនូវច្បាប់កិច្ចសន្យា កិច្ចព្រមព្រៀង លិខិតបទដ្ឋានគតិយុត្ត ក្នុងដែនសមត្ថកិច្ច របស់ក្រសួងសាធារណការ និងដឹកជញ្ជូន៕