ខេត្តកំពង់ឆ្នាំង ៖ មន្ទីរសាធារណការ និងដឹកជញ្ជូនខេត្តកំពង់ឆ្នាំង កាលពីរសៀលថ្ងៃទី ៦ ខែតុលា ឆ្នាំ២០២៥ បានចេញសេចក្តីជូនដំណឹងស្ដីពីការផ្អាកចរាចរណ៍ ជាបណ្ដោះអាសន្នលើយានយន្តគ្រប់ប្រភេទដែលធ្វើដំណើរឆ្លងកាត់លើកំណត់ផ្លូវលេខ៥០ស៊ី ចាប់ពីគីឡូម៉ែត្រលេខ00+000 ដល់គីឡូម៉ែត្រលេខ14+200 ស្ថិតក្នុងភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង ។មន្ទីរសាធារណការ និងដឹកជញ្ជូនខេត្តកំពង់ឆ្នាំង មានកិត្តិយសជម្រាបជូនដំណឹងដល់សាធា រណៈជន និងបងប្អូនប្រជាពលរដ្ឋ ដែលធ្វើដំណើរឆ្លងកាត់កំណត់ផ្លូវជាតិលេខ៥០ ស៊ីមេត្តាជ្រាបថា កំណត់ផ្លូវជាតិលេខ50ស៊ី តភ្ជាប់ពីស្រុកកំពង់លែង ខេត្តកំពង់ឆ្នាំងទៅកាន់ផ្លូវជាតិលេខ6 ខេត្តកំពង់ធំ ចាប់ពីគីឡូម៉ែត្រលេខ00+000 ដល់គីឡូម៉ែត្រលេខ 14+200 ស្ថិតនៅភូមិកង្កែបឃុំច្រណូក ស្រុកកំពង់លែង ខេត្តកំពង់ឆ្នាំង ត្រូវបានជន់លិចដោយទឹកទន្លេ ។ដើម្បីថែរក្សាកំណាត់ផ្លូវជាតិលេខ៥០ស៊ីឱ្យមានស្ថានភាពល្អប្រសើរ សម្រាប់ការប្រើប្រាស់ បន្ទាប់ពីទឹកទន្លេស្រកចុះ និងបង្ការកុំឱ្យមានគ្រោះថ្នាក់កើតឡើងជាយថាហេតុ មន្ទីរសាធារណៈការនិងដឹកជញ្ជូនខេត្តកំពង់ឆ្នាំង សូមធ្វើការផ្អាកចរាចរណ៍ សម្រាប់យានយន្តគ្រប់ប្រភេទដែលធ្វើដំណើរឆ្លងកាត់លើកំណត់ផ្លូវជាតិលេខ៥០ស៊ី ចាប់ពីថ្ងៃជូនដំណឹងតទៅ រហូតដល់មានការជូនដំណឹងសារជាថ្មី ។ អាស្រ័យហេតុដូចបានជម្រាបជូនខាងលើ សូមបងប្អូនអ្នកធ្វើដំណើរនិងប្រជាពលរដ្ឋជ្រាបជាព័ត៌មាន ។ដោយឡែក បើយោងទៅតាមស្ថានីយជលសាស្ត្រទន្លេផ្សារក្រោមរបស់មន្ទីរធនធានទឹក និងឧតុ និយមខេត្តកំពង់ឆ្នាំងបានបញ្ជាក់ថា នៅថ្ងៃទី៧ ខែតុលា ឆ្នាំ២០២៥ នេះ ស្ថានីយជលសាស្ត្រផ្សារក្រោមទឹកមានកម្ពស់៩,៨០ម៉ែត ខ្ពស់ជាងថ្ងៃម្សិលមិញ០,០៥ ម៉ែត្រ ។ កម្ពស់ទឹកប្រកាសអាសន្នគឺ ១០,៥០ម៉ែត្រ ដូច្នេះ នៅខ្វះតែ ០,៧០ម៉ែត្រ ទៀតប៉ុណ្ណោះនឹងត្រូវប្រកាសអាសន្នហើយ ។