ខេត្តកណ្ដាល:ដើម្បីថែរក្សាសណ្តាប់ធ្នាប់និងអាជីវករដែលដាក់តាំងលក់ទំនិញនៅលើចិញ្ចើ មឬលុបលូប្រឡាយត្រូវរើនិងកាយចេញជាបន្ទាន់ដើម្បីសោភណ័ភាពនិងសម្រួលដល់ទឹកហូរនៅពេលមានភ្លៀងធ្លាក់កាត់បន្ថយការលិច។ លោក ម៉ឹង យូឡេង បានឱ្យដឹងថា ៖”ដើម្បីធ្វើឲ្យកាន់តែមានគុណភាព ប្រសិទ្ធភាព និងប្រើប្រាស់បានយូរអង្វែង ទើបយើងបង្កើតជាយុទ្ធនាការនេះឡើង ជិះកង់ដើម្បីមើលឱ្យបានច្បាស់ថាតើថ្នល់របស់យើង វាមានសម្បុកមាន់ មានស្នាមប្រេះ និងមើលតាមមាត់លូ តើវាយ៉ាងមិច ទទួលយកបានហើយឬនៅ? នៅលើចិញ្ចើម តើការដាក់តាំងលក់វត្ថុផ្សេងៗនៅ​លើ​​ចិ​ញ្ចើម ការដាំបង្គោលផ្សាយពានិជ្ជកម្មផ្សេងៗដែលធ្វើប៉ះពាល់ដល់ថ្នល់ មន្ទីរសំណូមពរឱ្យប្រជាពលរដ្ឋយកចេញ ហើយចំពោះប្រជាពលរដ្ឋណាដែលបានលុបប្រឡាយ លុបលូ មន្ទីរស្នើសុំឱ្យពួកគាត់កាយចេញវិញ និងប្រជាពលរដ្ឋដែលយកចិញ្ចើមធ្វើជាកន្លែងលក់ដូរ យើងស្នើសុំឱ្យគាត់រើចេញ ដើម្បីធ្វើយ៉ាងណាឱ្យយើងបានធំ ស្រឡះ កាត់បន្ថយការណ៍ដែលកើតមានជាយថាហេតុ ។ លោកបន្តថា៖”ការចុះពិនិត្យជាតិលេខ២ គឺចាប់ពីរង្វង់មូលព្រះនរាយ៍ មុខសាលាខេត្ត មកដល់ព្រំប្រទល់ ខេត្តកណ្តាល-តាកែវ ដែលមានប្រវែងសរុប ២១គីឡូម៉ែត្រ និងមានមួយទៀត បែកខ្នែងពីផ្សារសៀមរាប ទៅផ្សារកំពង់កន្ទួត ដែលមានប្រវែង ៦គីឡូម៉ែត្រ ដូច្នេះ ថ្ងៃនេះ មន្ទីរធ្វើការពិនិត្យ និងបាញ់គំនូសនៅកន្លែងណាដែលមានសម្បុកមាន់។ លោកប្រធានមន្ទីរបានបន្តទៀតថា៖” មិនមែនតែជាតិលេខ២តែប៉ុណ្នោះទេ ដែលត្រូវធ្វើការត្រួតពិនិត្យ មន្ទីរបានធ្វើការត្រួតពិនិត្យ ថែទាំនិងជួសជុលជាប្រចាំ ទាំងជាតិ និងខេត្តក្នុងដែនសមត្ថកិច្ចរបស់ខ្លួន ឲ្យកាន់តែមានគុណភាព ប្រសិទ្ធភាព និងការធ្វើដំណើររបស់បងប្អូនប្រជាពលរដ្ឋធ្វើដំណើរប្រកបដោយសុវត្ថិភាព។ លោក ម៉ឹង យូឡេង ក៏បានអំពាវនាវដល់អ្នកដែលបានសាងសង់បូរី ក៏ដូចជាអ្នកទិញដីពុះឡូត៍លក់ នៅក្នុងទឹកដីខេត្តកណ្តាល សូមមេត្តាគោរពច្បាប់ដោយដាក់ពាក្យមក ខេត្តកណ្តាល មន្ទីររង់ចាំសម្រួលជូន ដើម្បីកុំឱ្យពួកគាត់ចេះតែយកលូទឹកស្អុយ មកភ្ជាប់ជាមួយលូទឹកភ្លៀង ព្រោះលូនៅតាមថ្នល់នេះ គឺលូរំដោះទឹកភ្លៀង មិនមែនរំដោះទឹកស្អុយទេ ដូច្នេះ អ្នកដែលសាងសង់បូរី គឺត្រូវតែមានអាងចម្រោះ ច្រោះឱ្យស្អាត ចាំបង្ហូរធ្លាក់ទៅលូ ព្រោះទឹកលូហូរទៅ ធ្លាក់ទៅទន្លេ ព្រែក បណ្តាលឲ្យប៉ះពាល់បរិស្ថាន៕