កិច្ចប្រជុំផ្សព្វផ្សាយអំពីគម្រោងអភិវឌ្ឍន៍ហេដ្ឋារចនាសម្ព័នទីក្រុង លើការរៀបចំគ្រប់គ្រងប្រព័ន្ធទឹកកខ្វក់ ប្រព័ន្ធការពារទឹកជំនន់ និងការរៀបចំទីលានចាក់សំរាម ក្នុងក្រុងកំពង់ចាម កំពង់ចាម៖ ថ្ងៃពុធ ទី១៧ ខែកញ្ញា ឆ្នាំ២០២៥ ឯកឧត្តម ហេង ណន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ហេដ្ឋារចនាសម្ព័នទីក្រុង ក្រោមក្របខណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័នអាស៊ី (AIIB) អញ្ជើញដឹកនាំកិច្ចប្រជុំ និងចុះពិនិត្យស្ថានភាពទីតាំងគម្រោងក្នុងក្រុងកំពង់ចាម ខេត្តកំពង់ចាម ដោយមានការចូលរួមពី ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម លោក-លោកស្រី តំណាងមន្ទីរពាក់ព័ន្ធនានា។ កិច្ចប្រជុំនេះរៀបចំឡើងដើម្បីផ្សព្វផ្សាយអំពីគម្រោងអភិវឌ្ឍន៍ហេដ្ឋារចនាសម្ព័នទីក្រុង ដែលផ្តោតសំខាន់លើការរៀបចំគ្រប់គ្រងប្រព័ន្ធទឹកកខ្វក់ ប្រព័ន្ធការពារទឹកជំនន់ ការរៀបចំទីលានចាក់សំរាមក្នុងទីក្រុង និងបង្ហាញពីប្រភេទហេដ្ឋារចនាសម្ព័ន្ធអាទិភាពដែលត្រូវគាំទ្រ ព្រមទាំងស្នើសុំកិច្ចសហការពីរដ្ឋបាលខេត្ត ពេលអនុវត្តផងដែរ។ លើកឡើងក្នុងអង្គប្រជុំ ឯកឧត្តមអភិបាលខេត្ត គាំទ្រ និងបង្ហាញពីតម្រូវការជាក់ស្តែងនៅក្នុងក្រុង ហើយក៏បានស្នើសុំជាអាទិភាពលើការពិនិត្យលទ្ធភាពរៀបចំនូវច្រាំងទន្លេដែលជាប់នឹងសំណង់កំពង់ផែទេសចរណ៍ ដោយប្រែក្លាយជាសួនច្បារ ដើម្បីគាំទ្រដល់វិស័យទេសចរណ៍ក្នុងខេត្តកំពង់ចាម។ សំណើទាំងនេះនឹងត្រូវបានពិនិត្យលទ្ធភាពដាក់បញ្ចូលទៅក្នុងគម្រោង ដែលនឹងត្រូវអនុវត្តក្នុងពេលឆាប់ៗខាងមុខ៕