តាកែវ៖ ឯកឧត្តម វ៉ី សំណាង អភិបាលខេត្តតាកែវ នៅថ្ងៃទី ៨ ខែកញ្ញា ឆ្នាំ២០២៥នេះ បានអញ្ជើញចុះពិនិត្យទីតាំង ជាក់ស្តែងនៃគម្រោងសាងសង់ផ្លូវក្រាលកៅស៊ូមួយខ្សែ ដែលតភ្ជាប់ពី ឃុំតាំងយ៉ាប ស្រុកព្រៃកប្បាស ទៅកាន់ ឃុំត្នោត ស្រុកបាទី។ ដំណើរចុះពិនិត្យនេះ ក៏មានវត្តមាន លោក ញ៉ែម ស្រស់ អភិបាលរងខេត្ត លោកនាយករដ្ឋបាលខេត្ត មន្ត្រីជំនាញពាក់ព័ន្ធ និងអាជ្ញាធរមូលដ្ឋានផងដែរ។ គម្រោងស្ថាបនាផ្លូវនេះ មានប្រវែងសរុបជិត ៦ គីឡូម៉ែត្រ ហើយនឹងចាប់ផ្តើមជួសជុលក្នុងដំណាក់កាលទី១ នាចុងឆ្នាំ ២០២៥ ខាងមុខនេះ។ ក្នុងដំណាក់កាលដំបូង គម្រោងនឹងត្រូវស្ថាបនាផ្លូវប្រវែង ៣ គីឡូម៉ែត្រ ទទឹង ៦ ម៉ែត្រ ដោយ ទទួលបានថវិកាពីក្រសួងអភិវឌ្ឍន៍ជនបទ។ ក្នុងឱកាសចុះពិនិត្យនេះ ឯកឧត្តមអភិបាលខេត្ត បានគូសបញ្ជាក់ពីសារៈសំខាន់នៃគម្រោងនេះថា៖ "ការស្ថាបនាផ្លូវនេះ មិនត្រឹមតែជួយសម្រួលដល់ការធ្វើដំណើររបស់ប្រជាពលរដ្ឋប៉ុណ្ណោះទេ តែវាក៏ជាកត្តាដ៏សំខាន់ក្នុងការជំរុញសេដ្ឋកិច្ច មូលដ្ឋាន តាមរយៈការដឹកជញ្ជូនកសិផល និងទំនិញផ្សេងៗបានទាន់ពេលវេលា និងប្រកបដោយសុវត្ថិភាពខ្ពស់"។ ឯកឧត្តមបានបន្ថែមថា ៖ "គម្រោងនេះ គឺជាការឆ្លើយតបទៅនឹងតម្រូវការជាក់ស្តែង របស់បងប្អូនប្រជាពលរដ្ឋ ហើយ រដ្ឋបាលខេត្ត នឹងបន្តខិតខំប្រឹងប្រែងដើម្បីអភិវឌ្ឍហេដ្ឋារចនាសម្ព័ន្ធផ្លូវថ្នល់ នៅតាមបណ្តាស្រុកនានាក្នុងខេត្តតាកែវ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង" ៕