កិច្ចប្រជុំពិគ្រោះយោបល់ ស្ដីពីនីតិវិធីចងក្រងសៀវភៅមគ្គុទ្ទេសក៍ណែនាំស្ដីពីបរិយាបន្នពិការភាពនៅក្នុងសេវាដឹកជញ្ជូនផ្លូវគោក ផ្លូវទឹក និងផ្លូវដែក ទីស្ដីការក្រសួង៖ នាថ្ងៃព្រហស្បតិ៍ ទី២៨ ខែសីហា ឆ្នាំ២០២៥ ឯកឧត្ដម មាស ម៉ូនីកា អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាអនុប្រធានក្រុមការងារមនុស្សចាស់អន្តរជំនាន់ និងពហុមុខងារ បានអញ្ជើញដឹកនាំកិច្ចប្រជុំពិគ្រោះយោបល់ ស្ដីពីនីតិវិធីចងក្រងសៀវភៅមគ្គុទ្ទេសក៍ណែនាំស្ដីពីបរិយាបន្នពិការភាពនៅក្នុងសេវាដឹកជញ្ជូនផ្លូវគោក ផ្លូវទឹក និងផ្លូវដែក ដោយមានការអញ្ជើញចូលរួមពីថ្នាក់ដឹកនាំតំណាងអគ្គនាយកដ្ឋាន និងនាយកដ្ឋានជំនាញ តំណាងប្រធានមន្ទីរសាធារណការ និងដឹកជញ្ជូនរាជធានីភ្នំពេញ តំណាងមន្ទីរសាធារណការ និងដឹកជញ្ជូនខេត្តកណ្តាល តំណាងគណៈកម្មាធិការក្រុមប្រឹក្សាសកម្មភាពជនពិការនៃក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងអង្គការមូលនិធិអាស៊ី តំណាងអង្គការជនពិការកម្ពុជា និងមន្ត្រីជំនាញពាក់ព័ន្ធជាច្រើនរូប។ ឯកឧត្ដមអនុរដ្ឋលេខាធិការ បានផ្តល់អនុសាសន៍ណែនាំបន្ថែមដល់ថ្នាក់ដឹកនាំនៃអគ្គនាយកដ្ឋាន នាយកដ្ឋាន អង្គភាពពាក់ព័ន្ធ និងលេខាធិការដ្ឋាននៃក្រុមការងារមនុស្ស-ជនពិការ ត្រូវធ្វើការសហការ និងសម្របសម្រួលក្នុងការចងក្រងសៀវភៅនេះ ឱ្យមានលក្ខណៈគ្រប់ជ្រុងជ្រោយ ស្របតាមបទដ្ឋានគតិយុត្តរបស់ក្រសួងសាធារណការ និងដឹកជញ្ជូន និងស្របទៅតាមការណែនាំរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។ សូមបញ្ជាក់ថា សៀវភៅមគ្គុទ្ទេសក៍នេះមានសារៈសំខាន់នៅក្នុងការរៀបចំបំពាក់បរិក្ខារ និងស្លាកសញ្ញាប្រើប្រាស់សម្រាប់ជនពិការ មនុស្សចាស់ ស្ត្រីមានផ្ទៃពោះ និងកុមារតាមយានជំនិះ នៅតាមដងផ្លូវធ្វើដំណើរ និងតាមទីធ្លាលំហសាធារណៈ ស្របតាមការណែនាំដូចមានចែងនៅច្បាប់ស្តីពីកិច្ចការពារ និងលើកកំពស់សិទ្ធិជនពិការ ដើម្បីរួមចំណែកការអនុវត្តផែនការយុទ្ធសាស្រ្តស្តីពីពិការភាព ឆ្នាំ២០២៤-២០២៨ ទៅតាមការណែនាំរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។ នៅចុងបញ្ចប់នៃកម្មវិធីនេះដែរ ក៏មានការប្រគល់ទទួលឯកសារលើកទី១ ចំនួន៧ សម្រាប់តម្កល់ទុកនៅបណ្ណាល័យរបស់ក្រសួង ដែលឯកសារខាងលើនេះ អាចធ្វើជាមូលដ្ឋានក្នុងការរៀបចំផែនការសកម្មភាពអនុវត្តក្នុងវិស័យដឹកជញ្ជូន ដើម្បីជួយគាំទ្រ និងអនុវត្តផែនការយុទ្ធសាស្ត្រ ស្តីពីពិការភាព ឆ្នាំ២០២៤-២០២៨ និងគោលនយោបាយជាតិ ស្តីពីមនុស្សវ័យចាស់ ឆ្នាំ២០១៧-២០៣០ ក្នុងទិសដៅជួយសម្របសម្រួលដល់ការបម្លាស់ទី និងរបរអាជីវកម្មរបស់មនុស្សចាស់ និងជនមានពិការភាព៕