ជំនួបសម្តែងការគួរសមជាមួយគណៈប្រតិភូនៃក្រុមនិស្សិតស្ម័គ្រចិត្ត (JHP) ជប៉ុន ទីស្ដីការក្រសួង៖ នារសៀលថ្ងៃព្រហស្បតិ៍ ទី៣១ ខែកក្កដា ឆ្នាំ២០២៥ ឯកឧត្ដម នឹម សុធា អនុរដ្ឋលេខាធិការក្រសួងសាធារណការ និងដឹកជញ្ជូន អញ្ជើញទទួលជួបសម្តែងការគួរសមជាមួយគណៈប្រតិភូនៃក្រុមនិស្សិតស្ម័គ្រចិត្ត (JHP) ជប៉ុន ដោយមានការអញ្ជើញចូលរួមពីលោកអគ្គនាយករង លោកប្រធាននាយកដ្ឋាន និងមន្ត្រីពាក់ព័ន្ធ។ ជំនួបនេះមានគោលបំណងសិក្សាស្វែងយល់ពីការអភិវឌ្ឍហេដ្ឋារចនាសម្ព័ន្ធនានា ក្នុងការជួយគាំទ្រវិស័យអប់រំនៅកម្ពុជា និងពង្រឹងចំណងភាពជាដៃគូរវាងកម្ពុជា- ជប៉ុន។ ឯកឧត្ដមអនុរដ្ឋលេខាធិការ បានថ្លែងអំណរគុណដល់ប្រជាជនជប៉ុន ដែលតែងតែលើកស្ទួយស្ថានភាពអប់រំនៅកម្ពុជា ដូចជាសាងសង់សាលារៀន ជំនួយលើការអប់រំជាដើម បន្ថែមពីនេះឯកឧត្ដមអនុរដ្ឋលេខាធិការ បានសង្ឃឹមយ៉ាងមុតមាំថាប្រទេសជប៉ុននឹងជួយផ្នែកអប់រំនៅកម្ពុជាឱ្យរឹតតែប្រសើរឡើងបន្ថែមទៀត។ សូមបញ្ជាក់ផងដែរថា Japan Team of Young Human Power (JHP) គឺជាអង្គការដែលមានមូលដ្ឋាននៅប្រទេសជប៉ុន និងការិយាល័យនៅប្រទេសកម្ពុជា ដែលមានគោលបំណងផ្ដល់ការគាំទ្រផ្នែកអប់រំ និងជំនួយមនុស្សធម៌នៅប្រទេសកម្ពុជា៕