កិច្ចប្រជុំពិភាក្សាលើការសិក្សាសមិទ្ធិលទ្ធភាពគម្រោងកែលម្អកំណាត់ផ្លូវជាតិលេខ១ និងសាងសង់ស្ពានថ្មីឆ្លងកាត់ទន្លេមេគង្គ ទីស្តីការក្រសួង៖ នាថ្ងៃសុក្រ ទី២៥ ខែកក្កដា ឆ្នាំ២០២៥ ឯកឧត្តម តូច ចាន់កុសល រដ្ឋលេខាធិការ នៃក្រសួងសាធារណការនិងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាលើការសិក្សាសមិទ្ធិលទ្ធភាពគម្រោងកែលម្អកំណាត់ផ្លូវជាតិលេខ១ និងសាងសង់ស្ពានថ្មីឆ្លងកាត់ទន្លេមេគង្គ ជាជំនួយរបស់រដ្ឋាភិបាលជប៉ុន ដោយមានការចូលរួមពីតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) តំណាងអគ្គនាយកដ្ឋានសហប្រតិបត្តិការ និងគ្រប់គ្រងបំណុល តំណាងអគ្គនាយកដ្ឋានដោះស្រាយផលប៉យពាល់ដោយសារគម្រោងអភិវឌ្ឍន៍ នៃក្រសួងសេដ្ឋកិច្ចនិងហិរញ្ញវត្ថុ ក្រុមហ៊ុនទីប្រឹក្សាបច្ចេកទេសរបស់ JICA រួមជាមួយថា្នក់ដឹកនាំ និងមន្ត្រីបច្ចេកទេស នៃក្រសួងសាធារណការ និងដឹកជញ្ជូន។ កិច្ចប្រជុំបានផ្តោតសំខាន់ចំពោះការឌីហ្សាញរបស់ផ្លូវ និងស្ពាន ដែលត្រូវធ្វើការគិតគូឱ្យបានម៉ត់ចត់តាមបទដ្ឋាន ស្ដង់ដារបច្ចេកទេស និងកាត់បន្ថយឱ្យបានខ្ពស់បំផុតលើផលប៉ះពាល់នានាដែលអាចនឹងកើតមានចំពោះប្រជាពលរដ្ឋ និងបរិស្ថាន។ ឯកឧត្តមប្រធានអង្គប្រជុំ បានណែនាំហើយគ្រប់ភាគីពាក់ព័ន្ធទាំងអស់ ជាពិសេសមន្ត្រីនៃក្រសួងសាធារណការ និងដឹកជញ្ជូនចូលរួមផ្តល់កិច្ចសហការជាមួយនឹងទីប្រឹក្សាបច្ចេកទេសរបស់ JICA ដើម្បីឱ្យការសិក្សាសមិទ្ធិលទ្ធកម្មនេះទទួលបាននូវលទ្ធផលគ្រប់ជ្រុងជ្រោយ ពេញលេញ និងស្របតាមតម្រូវការនៃការអភិវឌ្ឍប្រទេសជាតិ៕