ភ្នំពេញ៖ ផ្លូវជាតិលេខ១០ មានប្រវែង ១៩៨,៧១ គីឡូម៉ែត្រ ក្រោមហិរញ្ញប្បទានសម្បទានសហប្រតិបត្តិការពីរដ្ឋាភិបាលនៃសាធារណរដ្ឋប្រជាមានិតចិន និងក្របខណ្ឌថវិកាជាតិ នឹងសម្ពោធបើកឱ្យប្រជាពលរដ្ឋប្រើប្រាស់ នៅថ្ងៃទី៧ ខែសីហា ក្រោមអធិបតីភាពសម្តេច ហ៊ុន ម៉ាណែត។ នេះបើតាមក្រសួងសាធារណការ និងដឹកជញ្ជូន។ផ្លូវជាតិលេខ១០ ជាប្រភេទផ្លូវក្រាលកៅស៊ូពីរស្រទាប់ (DBST) តភ្ជាប់ពីស្រុកសំឡូត ខេត្តបាត់ដំបង ឆ្លងកាត់ខេត្តពោធិ៍សាត់ រហូតដល់ខេត្តកោះកុង ត្រូវបានប្រកាសបើកការដ្ឋានសាងសង់ជាផ្លូវការកាលពីថ្ងៃទី៩ ខែមីនា ឆ្នាំ២០២០។ ក្រោយសាងសង់ជាង៥ឆ្នាំ ផ្លូវប្រវែង ១៩៨,៧១ គីឡូម៉ែត្រនេះ នឹងដាក់ឱ្យប្រើប្រាស់ជាផ្លូវការនៅថ្ងៃទី៧ ខែសីហា។ តាមរយៈសមិទ្ធផលផ្លូវមួយខ្សែនេះ នឹងផ្តល់ផលចំណេញផ្នែកសេដ្ឋកិច្ចជាច្រើនសន្ធឹកតាមរយៈការកាត់បន្ថយពេលវេលា កាត់បន្ថយថ្លៃដើមក្នុងការដឹកជញ្ជូន និងសេវាភស្តុភារកម្ម ពិសេសក្នុងការដឹកជញ្ជូនកសិផល និងផលិតផលផ្សេងទៀតពីបណ្តាខេត្តជុំវិញទៅកាន់ច្រកទ្វារព្រំដែនអន្តរជាតិនានា និងទៅកាន់កំពង់ផែទំនិញកំពង់ផែទឹកជ្រៅជាដើម។ក្រៅពីនេះ ផ្លូវជាតិលេខ១០ នឹងផ្តល់អត្ថប្រយោជន៍ក្នុងការធ្វើដំណើរឆ្លងកាត់ និងជាផ្នែកមួយទាក់ទាញ ទេសចរផងដែរ ជាពិសេសស្ពានខ្ពស់ជាងគេនៅកម្ពុជានៃគម្រោងខ្សែផ្លូវជាតិលេខ១០ គឺជាស្ពានលេខ២៨ ស្ថិតក្នុងភូមិសាស្រ្តភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់។ ទន្ទឹមនឹងនេះ ក្រសួងសាធារណការ និងដឹកជញ្ជូន ក៏បានរៀបចំទីធ្លាសម្រាប់ចតយានយន្តនៅទាំងសងខាងក្បាលស្ពាន ដែលម្ខាងៗអាចចតរថយន្តប្រភេទទេសចរណ៍-គ្រួសារបានប្រមាណពី ៦០-៧០ គ្រឿង។ កាលពីថ្ងៃ ទី១៦ ខែកក្កដា លោក ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន ចូលរួមចុះពិនិត្យទីតាំងសម្រាប់ត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ១០ ដែលដឹកនាំដោយលោក យូ ស៊ុនឡុង នាយករងខុទ្ទកាល័យសម្ដេច ហ៊ុន ម៉ាណែត។ ការពិនិត្យទីតាំងនៅស្រុកសំឡូត ខេត្តបាត់ដំបងនេះ ដើម្បីធានាឱ្យដំណើរការកម្មវិធីខាងលើ អាចប្រព្រឹត្តទៅបានយ៉ាងរលូនតាមផែនការគ្រោងទុក។ រដ្ឋលេខាធិការក្រសួងសាធារណការរូបនេះ ក៏បានណែនាំឱ្យក្រុមការងារទទួលបន្ទុកគ្រប់ផ្នែកពាក់ព័ន្ធត្រៀមរៀបចំបំពេញភារកិច្ចរបស់ខ្លួននីមួយៗឱ្យបានច្បាស់លាស់ និងសហការគ្នាឱ្យបានជិតស្និទ្ធជាមួយគ្រប់ភាគីពាក់ព័ន្ធទាំងអស់ ដើម្បីឱ្យថ្ងៃដំណើរការកម្មវិធី ប្រព្រឹត្តទៅបានដោយរលូន ប្រកបដោយសុវត្ថិភាព៕