ភ្នំពេញៈ រថយន្តជាង១,៦លានគ្រឿងត្រូវបានត្រួតពិនិត្យ លើការដឹកជញ្ជូនលើសទម្ងន់កម្រិតកំណត់ ក្នុងឆមាសទី១ ឆ្នាំ២០២៥នេះ ក្នុងនោះ រកឃើញមានផ្ទុកលើសទម្ងន់កំណត់ជាង៤០ម៉ឺនគ្រឿង។ របាយការណ៍ នៃការអនុវត្តការងារក្នុងឆមាសទី១ ឆ្នាំ២០២៥ លើការងារត្រួតពិនិត្យរថយន្តដឹកជញ្ជូនលើសទម្ងន់កម្រិតកំណត់បានឱ្យដឹងថា រថយន្តសរុបចំនួន ១ ៦២៦ ៣៣៣ គ្រឿង ត្រូវបានត្រួតពិនិត្យ។ ក្នុងនោះ មានរថយន្តលើសទម្ងន់កម្រិតកំណត់ចំនួន ៤០៤ ២០៦ គ្រឿង ដែលស្មើនឹង ២៤,៨៥%។ក្នុងចំណោមរថយន្ត ដែលដឹកលើសទម្ងន់ទាំងនោះ មានរថយន្តផ្ទុកលើសទម្ងន់ក្រោម ៥% ចំនួន ៤០៣ ៤២៥ គ្រឿង និងរថយន្តផ្ទុកលើសទម្ងន់ពី ៥% ទៅ ១០% ចំនួន ២៩០គ្រឿង។ បន្ថែមពីនោះ រថយន្តផ្ទុកលើសទម្ងន់ពី ១០% ទៅ២០% មានចំនួន ៣៣៦ គ្រឿង និងរថយន្តផ្ទុកលើសទម្ងន់លើសពី ២០% ចំនួន ១៥៥គ្រឿងផងដែរ។រថយន្តដែលដឹកលើស ត្រូវបានពិន័យជាប្រាក់ទាំងផ្ទុកលើសទម្ងន់សរុប និងផ្ទុកលើសទម្ងន់នៃភ្លៅនីមួយៗ តាមច្បាប់ស្តីពីផ្លូវថ្នល់ តាមមាត្រា២៦ និងមាត្រា៦០ជាដើម។ របាយការណ៍នេះត្រូវបានបង្ហាញនៅក្នុងកិច្ចប្រជុំបូកសរុបលទ្ធផលការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ប្រចាំឆមាសទី១ ឆ្នាំ២០២៥ របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ កាលពីថ្ងៃចន្ទ ទី៧ ខែកក្កដានេះ។កិច្ចប្រជុំនេះត្រូវបានដឹកនាំដោយ រដ្ឋលេខាធិការក្រសួងសាធារណការ និងដឹកជញ្ជូន លោកសេង ឈួន ដែលជាប្រធានគណៈកម្មាធិការសម្របសម្រួលអចិន្ត្រៃយ៍។ កិច្ចប្រជុំនេះ ក៏មានការចូលរួមពី អនុរដ្ឋលេខាធិការទទួលបន្ទុក ប្រធាន អនុប្រធាន សមាជិក សមាជិកាលេខាធិការដ្ឋាន អនុប្រធាន និងសមាជិកក្រុមត្រួតពិនិត្យយានយន្តចល័ត និងប្រធាន អនុប្រធានស្ថានីយជញ្ជីងអចល័តនៅទូទាំងប្រទេស។ក្នុងឱកាសនោះ លោករដ្ឋលេខាធិការបានកោតសសើរដល់មន្រ្តី ដែលបានខិតខំអនុវត្តការងារកន្លងមក និងជំរុញមន្រ្តីទាំងអស់ឱ្យខិតខំបន្តរឹតបន្តឹងការអនុវត្តការងារទប់ស្កាត់បទល្មើសដឹកលើសទម្ងន់កម្រិតកំណត់ឱ្យកាន់តែប្រសើរឡើង។ កិច្ចប្រជុំក៏បានលើកឡើងពីទិសដៅការងារ ដែលត្រូវអនុវត្តក្នុងឆមាសបន្ទាប់ ដូចជាការបង្កើតទីតាំងស្ថានីយថ្មីៗនៅផ្លូវជាតិសំខាន់ៗ ដែលពុំទាន់មានស្ថានីយជញ្ជីងត្រួតពិនិត្យ និងធ្វើទំនើបកម្មប្រព័ន្ធបច្ចេកវិទ្យានៅតាមស្ថានីយឱ្យកាន់តែប្រសើរឡើងបន្ថែមទៀត។ លោកសេង ឈួន បានណែនាំដល់មន្ត្រីតាមស្ថានីយនីមួយៗ ឱ្យអនុវត្តការងារឱ្យបានខ្ជាប់ខ្ជួន ព្រមទាំងអនុវត្តទៅតាមប្រសាសន៍ណែនាំ និងការចង្អុលបង្ហាញរបស់ រដ្ឋមន្ត្រីក្រសួងសាធារណការ លោកប៉េង ពោធិ៍នា ដោយត្រូវប្រកាន់ខ្ជាប់នូវក្រមសីលធម៌ វិន័យ សាមគ្គីភាព និងអនុលោមតាមច្បាប់ លិខិតបទដ្ឋានគតិយុត្តជាធរមាន ដើម្បីអនុវត្តការងារឱ្យកាន់តែមានប្រសិទ្ធភាព។ ដើម្បីពង្រឹងការអនុវត្តការងារត្រួតពិនិត្យនេះ ឱ្យកាន់តែមានប្រសិទ្ធភាព ក្រសួងសាធារណការ បានកំពុងតែធ្វើការកែសម្រួលមន្ត្រីប្រចាំស្ថានីយជញ្ជីងថ្លឹងនៅទូទាំងប្រទេសផងដែរ។ កាលពីឆ្នាំ២០២៤កន្លងមក ក្រសួងបានផ្តល់សេវាចុះបញ្ជីយានយន្ដចំនួន ៣៧៣ ០៦៩គ្រឿង។ ក្នុងនោះ មានម៉ូតូ ៣១៧ ៧១២គ្រឿង និងរថយន្ត ៥៥ ៣៥៧គ្រឿង។ លើសពីនេះ ក៏បានចុះបញ្ជីរថយន្ដបំពាក់ផ្លាកលេខពិសេស និងពិសេសផ្ទាល់ខ្លួនចំនួន ៣០ ៣៧១គ្រឿង ដែលទទួលបានចំណូលសរុបប្រមាណ១៨,៥១លានដុល្លារផងដែរ៕