ពិធីបិទវគ្គអប់រំនយោបាយសម្រាប់មន្ត្រីគណបក្សតាមបណ្តាការិយាល័យ-អង្គភាពជុំវិញស្រុកកោះធំ ជំនាន់ទី៣៥ លើកទី៤ ឆ្នាំ២០២៥ ក្រោមអធិបតីភាព ឯកឧត្តម ហេង ណន សមាជិកគណៈកម្មាធិការកណ្តាល ជាសមាជិកគណៈអចិន្រ្តៃយ៍យុវជនគណបក្សថ្នាក់កណ្តាល និងជាអនុប្រធានក្រុមការងារគណបក្សចុះមូលដ្ឋានស្រុកកោះធំ កណ្តាល ៖ នាថ្ងៃសៅរ៍ ១០កើត ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៥ ខែកក្កដា ឆ្នាំ២០២៩ ឯកឧត្តម ហេង ណន សមាជិកគណៈកម្មាធិការកណ្តាល ជាសមាជិកគណៈអចិន្រ្តៃយ៍យុវជនគណបក្សថ្នាក់កណ្តាល និងជាអនុប្រធានក្រុមការងារគណបក្សចុះមូលដ្ឋានស្រុកកោះធំ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា សមាជិកគណៈអចិន្រ្តៃយ៍គណៈកម្មាធិការកណ្តាល គណបក្សប្រជាជនកម្ពុជា ប្រធានគណៈកម្មាធិការគណបក្សក្រសួងសាធារណការ និងដឹកជញ្ជូន និងជាប្រធានក្រុមការងារគណបក្សចុះមូលដ្ឋានស្រុកកោះធំ បានអញ្ជើញជាអធិបតីភាពក្នុងពិធីបិទវគ្គអប់រំនយោបាយសម្រាប់មន្ត្រីគណបក្សតាមបណ្តាការិយាល័យ-អង្គភាពជុំវិញស្រុកកោះធំ ជំនាន់ទី៣៥ លើកទី៤ ឆ្នាំ២០២៥ ជូនដល់សិក្ខាកាមជាមន្ត្រីគណបក្សមកពីគណៈកម្មាធិការគណបក្ស ស្រុក ឃុំ ថ្នាក់មូលដ្ឋាន និងសាខាគណបក្សសរុបចំនួនជាង ១០០នាក់ បន្ទាប់ពីវគ្គសិក្សាបានដំណើរការប្រកបដោយជោគជ័យ អស់រយៈពេល ៣ថ្ងៃ នៅសាលប្រជុំទីស្នាក់ការគណបក្សប្រជាជនកម្ពុជា ស្រុកកោះធំ ខេត្តកណ្តាល។ ឯកឧត្តមគណអធិបតី បានកត់សម្គាល់ថា តាមរយៈការរៀនសូត្ររយៈពេល ៣ថ្ងៃនេះ សិក្ខាកាមពិតជាទទួលបាននូវចំណេះដឹងថ្មីៗបន្ថែមទៀត ដែលមានលក្ខណៈជាប្រព័ន្ធ និងមានមូលដ្ឋានរឹងមាំខាងនយោបាយ សតិអារម្មណ៍ និងចាត់តាំង ជាពិសេសយល់ដឹងកាន់តែច្បាស់ថែមទៀត អំពីការទទួលខុសត្រូវរបស់មន្រ្តីគណបក្សម្នាក់ៗក្នុងការចូលរួមកសាងពង្រឹងអង្គការចាត់តាំងគណបក្សនៅថ្នាក់របស់ខ្លួន ក៏ដូចក្នុងការអនុវត្តតួនាទី ភារកិច្ចរបស់ខ្លួនក្នុងអង្គការរដ្ឋតាមថ្នាក់ និងតាមផ្នែកនីមួយៗ ដើម្បីចូលរួមបង្កើនប្រសិទ្ធភាពនៃការដឹកនាំរបស់គណបក្ស។ ឯកឧត្តមបន្តថា តាមរយៈការយល់ដឹងនេះ នឹងជួយឱ្យមន្រ្តីយើងម្នាក់ៗឆ្លុះបញ្ចាំងមើលដោយខ្លួនឯងនូវចំណុចល្អដែលត្រូវពង្រឹងពង្រីកបន្ត និងចំណុចខ្សោយ ឬកង្វះខាតត្រូវពុះពារជម្នះ ដើម្បីអភិវឌ្ឍខ្លួនឱ្យកាន់តែមានលក្ខណៈសម្បត្តិល្អប្រសើរឡើងថែមទៀត។ ថ្លែងក្នុងឱកាសនោះផងដែរ ឯកឧត្តម បានពាំនាំការសួរសុខទុក្ខ និងជូនពរពីសំណាក់ ឯកឧត្តមប្រធាន ជូនចំពោះសិក្ខាកាម ក៏ដូចមន្រ្តីបុគ្គលិកបម្រើការងារបក្ស ដែលបានចូលរួមក្នុងវគ្គសិក្សានេះ អំពី ក្តីនឹករឭក និងស្រឡាញ់ដ៏ជ្រាលជ្រៅ។ ជាមួយនោះដែរ ឯកឧត្តម បានថ្លែងអំណរគុណដល់លោកគ្រូ-អ្នកគ្រូ បង្គោល ដែលបានចំណាយពេលវេលាដ៏មានតម្លៃ ចែករំលែកចំណេះជំនាញ គោលនយោបាយរបស់បក្ស ដល់សិក្ខាកាមដែលបានចូលរួមក្នុងវគ្គនេះ ក្នុងនោះដែរ។ ផ្អែកលើមូលដ្ឋាននៃការយល់ដឹងនេះ ឯកឧត្តម សង្ឃឹមថា នៅពេលត្រឡប់ទៅកាន់ស្ថាប័ន អង្គភាព មូលដ្ឋានវិញ សិក្ខាកាមនឹងអាចអនុវត្តកិច្ចការងារសម្រេចបាននូវលទ្ធផលដ៏ល្អប្រសើរថ្មីៗថែមទៀត ក្នុងការបំពេញភារកិច្ចរបស់ខ្លួនដែលឆ្លើយតបទៅនឹងស្មារតីដឹកនាំរបស់គណៈអចិន្រ្តៃយ៍នៃគណៈកម្មាធិការកណ្តាល។ ជាចុងក្រោយ ឯកឧត្តមគណអធិបតី បានសំណូមពរឱ្យសិក្ខាកាមទាំងអស់ត្រូវចេះចែករំលែក ធ្វើការផ្សព្វផ្សាយបន្ត នៅអ្វីដែលបានរៀន ដល់អ្នកដែលមិនបានចូលរួមផ្ទាល់ក្នុងវគ្គអប់រំនេះ នៅពេលត្រឡប់ទៅកាន់មូលដ្ឋានរៀងៗខ្លួនវិញ និងត្រូវយកនូវបទពិសោធន៍ដែលបានរៀននៅរយៈពេលប៉ុន្មានថ្ងៃមកនេះ យកទៅអនុវត្ត ឱ្យបានខ្ជាប់ខ្ជួន ពេលចុះបំពេញការងារតាមមូលដ្ឋាន ឱ្យសមស្របជាមន្ត្រីបក្ស៕