បច្ចុប្បន្ន ការងារចុះផ្ទៀងផ្ទាត់និយាមកា និងបោះបង្គោលព្រំដី តាមបណ្តោយគម្រោងព្រែកជីកហ្វូណនតេជោ ដែលដឹកនាំផ្ទាល់ដោយឧបនាយករដ្ឋមន្ត្រី លោក ស៊ុន ចាន់ថុល គឺសម្រេចបានប្រមាណ ១១៤ គីឡូម៉ែត្រ នៅក្នុងខេត្តកណ្តាល តាកែវ និងកំពត។ ទិសដៅការងារបន្ទាប់គឺខេត្តកែប ដែលជាភូមិសាស្ត្រត្រូវចុះអនុវត្តចុងក្រោយគេ។ បើតាមលោក ស៊ុន ចាន់ថុល បន្ទាប់ការងារបោះបង្គោលនេះចប់ទាំងស្រុងហើយនោះ ការសាងសង់ព្រែកជីកហ្វូណន នឹងត្រូវអនុវត្តនៅឆ្នាំ២០២៥ នេះ តាមផែនការកំណត់។បង្គោលព្រំដីតាមបណ្តោយគម្រោងព្រែកជីកហ្វូណនដែលបានបោះរួច មានសរុប ១,០៧៩បង្គោល។ ក្នុងនោះនៅខេត្តកណ្តាលមាន៣៨៧បង្គោល និង ខេត្តតាកែវមាន ៥៥០បង្គោល។ នេះយោងតាមរបាយការណ៍បឋមដែលលោក ស៊ុន ចាន់ថុល បានផ្សព្វផ្សាយនៅលើបណ្តាញទំនាក់ទំងសង្គមនាថ្ងៃទី៣ ខែកក្កដា ដែលការងារបោះបង្គោលព្រំដីក្នុងខេត្តទាំងពីរនេះ ត្រូវបានបញ្ចប់ទាំងស្រុងហើយ។ ក្រៅពីនេះ ខេត្តកំពត ក៏ត្រូវបានក្រុមការងារបច្ចេកទេសនៃគម្រោងព្រែកជីកហ្វូណនបោះបង្គោលព្រំដី បានចំនួន ១៤២ បង្គោល ផងដែរ។ សេចក្តីប្រកាសព័ត៌មានរបស់លោក ស៊ុន ចាន់ថុល បានបញ្ជាក់ថា ៖ « បច្ចុប្បន្នក្រុមការងារបាននិងកំពុងបន្តអនុវត្តការងារក្នុងភូមិសាស្រ្តខេត្តកំពត និងខេត្តកែប ហើយគ្រោងនឹងបញ្ចប់ទាំងស្រុងក្នុងពេលឆាប់ៗខាងមុខនេះ»។ គម្រោងព្រែកជីកហ្វូណន ត្រូវបានប្រកាសបើកការដ្ឋានជាផ្លូវការក្រោមវត្តមានសម្តេចនាយកមន្ត្រី ហ៊ុន ម៉ាណែត កាលពីថ្ងៃទី៥ ខែសីហា ឆ្នាំ២០២៤។ បច្ចុប្បន្ន គម្រោងត្រូវបានអនុវត្តតាមផែនការសកម្មភាពជាដំណាក់កាលបន្តបន្ទាប់ ពោលគឺមានវឌ្ឍនភាពក្នុងទិសដៅវិជ្ជមាន ស្របទៅតាមផែនការដែលបានគ្រោងទុក។ លោក ស៊ុន ចាន់ថុល ដែលជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (CDC) ដែរនោះ បានបញ្ជាក់ថា ៖ « ចំពោះការចល័តគ្រឿងចក្រចូល ដើម្បីចាប់ផ្ដើមសាងសង់ជាផ្លូវការ គ្រោងនឹងអនុវត្តក្នុងរដូវទឹកស្រក អំឡុងចុងឆ្នាំ២០២៥នេះ បន្ទាប់ពីក្រុមការងារដោះស្រាយផលប៉ះពាល់ នៃក្រសួងសេដ្ឋកិច្ច និងហិរញ្ញវត្ថុ បានបញ្ចប់ការដោះស្រាយផលប៉ះពាល់ និងទូទាត់សំណងរួចរាល់ជូនដល់បងប្អូនប្រជាពលរដ្ឋដែលរងផលប៉ះពាល់ជាក់ស្តែង»។ គួរជម្រាបថា គម្រោង«ព្រែកជីកហ្វូណន» ត្រូវបានរដ្ឋាភិបាលអនុម័តជាផ្លូវការ កាលពីថ្ងៃទី១៩ ខែឧសផា ឆ្នាំ២០២៣។ ព្រែកជីកប្រវត្តិសាស្ត្រមួយនេះ មានប្រវែង១៨០គីឡូម៉ែត្រ ត្រូវចំណាយទុនវិនិយោគ១៧០០លានដុល្លារ និងចំណាយពេលសាងសង់ រយៈពេល៤ឆ្នាំ៕