ក្រោយវត្ដមានផ្លូវល្បឿនលឿនខ្សែទី១ ភ្នំពេញ-ព្រះសីហនុ ទទួលបានជោគជ័យដោយបានសម្រួលដល់ការដឹកជញ្ជូន និងការធ្វើដំណើររបស់ប្រជាពលរដ្ឋរួចមក រាជរដ្ឋាភិបាលកម្ពុជាក៏បានដាក់ចេញផែនការអភិវឌ្ឍន៍ផ្លូវល្បឿនលឿន ខ្សែទី២ និងខ្សែទី៣ បន្ថែមទៀតផងដែរ។ ដោយគម្រោងផ្លូវល្បឿនលឿនទាំង ២ ខ្សែនេះនឹងសាងសង់ឆ្លងកាត់រាជធានី-ខេត្ដចំនួន ៨ រួមមាន៖ រាជធានីភ្នំពេញ ខេត្ដកណ្ដាល ព្រៃវែង ស្វាយរៀង កំពង់ចាម កំពង់ធំ សៀមរាប និងបន្ទាយមានជ័យ។ ផ្លូវល្បឿនលឿនខ្សែទី២ (ភ្នំពេញ-បាវិត) គម្រោងផ្លូវល្បឿនលឿនទី២ នេះមានប្រវែងសរុប ១៣៥.១ គីឡូម៉ែត្រ ឆ្លងកាត់រាជធានីភ្នំពេញ ខេត្ដកណ្ដាល ខេត្ដព្រៃវែង និងខេត្ដស្វាយរៀង។ ហើយអ្វីដែលពិសេសផ្លូវនេះក៏នឹងត្រូវតភ្ជាប់ជាមួយផ្លូវល្បឿនលឿនរបស់ប្រទេសវៀតណាមផងដែរ។ តាមការគ្រោងទុកផ្លូវល្បឿនលឿនភ្នំពេញ-បាវិត នឹងត្រូវបញ្ចប់ការសាងសង់នៅចុងឆ្នាំ២០២៦ ឬដើមឆ្នាំ២០២៧ ខាងមុខ បន្ទាប់ពីគម្រោងនេះត្រូវបានបើកការដ្ឋានសាងសង់កាលពីអំឡុងឆ្នាំ២០២៣។ ផ្លូវល្បឿនលឿនខ្សែទី៣ (ភ្នំពេញ-សៀមរាប-ប៉ោយប៉ែត) គម្រោងផ្លូវល្បឿនលឿនភ្នំពេញ-សៀមរាប-ក្រុងប៉ោយប៉ែត គឺជាគម្រោងផ្លូវល្បឿនលឿនទី៣ នៅកម្ពុជា ខណៈគម្រោងមួយបាននិងកំពុងសិក្សាដើម្បីឆ្ពោះទៅកាន់ការបើកការដ្ឋានសាងសង់ដោយក្រុមហ៊ុន CRBC នាពេលខាងមុខ។ តាមការសិក្សាគម្រោងផ្លូវល្បឿនលឿននេះមានប្រវែងផ្លូវសរុបប្រមាណ ៤២០គីឡូម៉ែត្រ មានចំណុចចាប់ផ្តើមពីភាគខាងជើង(មហាវិថីឈ្នះឈ្នះ)រាជធានីភ្នំពេញ និងចំណុចបញ្ចប់នៅក្រុងប៉ោយប៉ែត ខេត្តបន្ទាយមានជ័យ(ព្រំដែនកម្ពុជា-ថៃ)។ ខណៈគម្រោងនេះឆ្លងកាត់ភ្នំពេញ ប្រវែង ៣ គីឡូម៉ែត្រ ខេត្តកណ្ដាល ១៨ គីឡូម៉ែត្រ ខេត្តកំពង់ចាម ៤៣ គីឡូម៉ែត្រ ខេត្តកំពង់ធំ ១៣១ គីឡូម៉ែត្រ ខេត្តសៀមរាប ១៣០ គីឡូម៉ែត្រ និងខេត្តបន្ទាយមានជ័យ ៩៥ គីឡូម៉ែត្រ។ យោងតាមការបញ្ជាក់ពីក្រសួងសាធារណការ និងដឹកជញ្ជូន គម្រោងផ្លូវល្បឿនលឿនថ្មីនេះ ត្រូវបានចែកចេញជាពីរជំហាន ដោយជំហានទី១ រាជធានីភ្នំពេញ-សៀមរាប ប្រវែង២៤៩ គីឡូម៉ែត្រ ចំណាយថវិកាប្រមាណ ២.៥ ពាន់លានដុល្លារ និងជំហានទី២ សៀមរាប-ប៉ោយប៉ែត ប្រវែង ១៥១ គីឡូម៉ែត្រ ចំណាយថវិកាប្រមាណ១.៧ ពាន់លានដុល្លារ៕