សិក្ខាសាលាពិគ្រោះយោបល់ និងប្រមូលធាតុចូល លើសេចក្ដីព្រាងច្បាប់ស្ដីពី “ការគ្រប់គ្រង និងការអភិវឌ្ឍវិស័យភស្តុភារកម្ម” ទីស្ដីការក្រសួង ៖ នាព្រឹកថ្ងៃចន្ទ ទី៩ ខែមិថុនា ឆ្នាំ២០២៥ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ និងប្រមូលធាតុចូល លើសេចក្ដីព្រាងច្បាប់ស្ដីពី “ការគ្រប់គ្រង និងការអភិវឌ្ឍវិស័យភស្តុភារកម្ម “ដោយមានការអញ្ជើញចូលរួមពីថ្នាក់ដឹកនាំក្រសួង តំណាងអគ្គនាយកដ្ឋាន-នាយកដ្ឋាន ក្រោមឱវាទក្រសួង តំណាងទីភ្នាក់ងារបារាំងសម្រាប់អភិវឌ្ឍន៍ (AFD) តំណាងកំពង់ផែស្វយ័តភ្នំពេញ កំពង់ផែស្វយ័តក្រុងព្រះសីហនុ មន្ទីរសាធារណការ និងដឹកជញ្ជូនទាំង២៥ រាជធានី-ខេត្ត និងមន្ត្រីជំនាញពាក់ព័ន្ធ សរុបប្រមាណជាង១០០នាក់។ សិក្ខាសាលានេះ រៀបចំឡើងក្នុងគោលបំណង ដើម្បីពិនិត្យពិភាក្សា និងប្រមូលធាតុចូលបន្ថែមសម្រាប់ការរៀបចំសេចក្តីព្រាងច្បាប់ស្តីពី ការគ្រប់គ្រង និងការអភិវឌ្ឍវិស័យភស្តុភារកម្ម ឱ្យបានកាន់តែល្អប្រសើរនិងគ្រប់ជ្រុងជ្រោយ ដើម្បីជាឧត្តមប្រយោជន៍សម្រាប់ប្រទេសជាតិ តាមរយៈកាត់បន្ថយតម្លៃឡូជីស្ទីក និងបង្កើនភាពប្រកួតប្រជែងដោយស្នើភាពក្នុងវិស័យភស្តុភារកម្មផងដែរ។ ថ្លែងនាឱកាសនោះ ឯកឧត្តមរដ្ឋលេខាធិការ មានក្ដីសង្ឃឹមយ៉ាងមុតមាំថា តាមរយៈសិក្ខាសាលានេះ សិក្ខាកាមទាំងអស់ អាចទទួលបានចំណេះដឹងបន្ថែម និងយល់ដឹងពីសារៈសំខាន់ នៃការរៀបចំសេចក្តីព្រាងច្បាប់ស្តីពីការគ្រប់គ្រង និងការអភិវឌ្ឍវិស័យភស្តុភារកម្មនៅកម្ពុជា ដែលពាក់ព័ន្ធទៅនឹងបណ្តាអង្គភាព និងស្ថាប័នរបស់ខ្លួន ក្នុងគោលបំណងចូលរួមពង្រឹងពង្រីក និងអភិវឌ្ឍបន្ថែម ដើម្បីឆ្ពោះទៅកាន់ការអភិវឌ្ឍប្រកបដោយនិរន្តរភាព ទៅលើការប្រតិបត្តិការ និងការផ្តល់សេវាភស្តុភារកម្ម ឬឡូជីស្ទីកក្នុងប្រទេសកម្ពុជាឱ្យកាន់តែល្អប្រសើរឡើងថែមមួយកម្រិតទៀត។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube