ភ្នំពេញ៖ នៅថ្ងៃទី៩ មិថុនានេះ លោក ឃួង ស្រេង អភិបាលរាជធានីភ្នំពេញ បានចូលរួមពិធីភ្ជាប់ស្ពានអាកាស សម្ដេចធិបតី ហ៊ុន ម៉ាណែត (ស្ពានអាកាសភ្លោះ៦០ម៉ែត្រ) ដែលមានព្រំប្រទល់ជាប់រាជធានីភ្នំពេញ និងខេត្តកណ្ដាល តាមបណ្ដោយផ្លូវ ៦០ម៉ែត្រ។ រហូតមកដល់ពេលនេះ ស្ពាននេះ ត្រូវបានសាងសង់រួចរាល់ ៨៥ភាគរយហើយ។ស្ពានអាកាសភ្លោះ៦០ម៉ែត្រ ដែលប្រសិទ្ធនាមថា «ស្ពានអាកាសសម្ដេចធិបតី ហ៊ុន ម៉ាណែត» មានព្រំប្រទល់ជាប់រាជធានីភ្នំពេញ និងខេត្តកណ្ដាល ត្រូវបានចាក់ភ្ជាប់នៅថ្ងៃនេះ។ លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានប្រាប់សារព័ត៌មានឌីជីថលថ្មីៗថា រហូតមកដល់ពេលនេះ ស្ពាននេះ សង់បាន ៨៥ភាគរយហើយ។ លោកស្រី ដោ សម្ផស្ស បញ្ជាក់បន្ថែមថា៖ «ស្ពាននេះ ចែកជាពីរ ស្ពានទិសដៅភ្នំពេញ ទៅព្រលានថ្មី គ្រោងបញ្ចប់នៅចុងខែមិថុនា ហើយស្ពានទិសដៅពីព្រលានមកភ្នំពេញ គ្រោងបញ្ចប់នៅចុងខែកក្កដា ២០២៥នេះ។»។ យ៉ាងណាអ្នកនាំពាក្យរូបនេះ មិនទាន់អាចបញ្ជាក់ពីកាលបរិច្ឆេទបើកសម្ពោធស្ពានភ្លោះនេះនៅ ឡើយទេ។ ស្ពានអាកាសសម្ដេចធិបតី ហ៊ុន ម៉ាណែត ជាស្ពានប្រភេទបេតុងអាមេ (ធ្នឹមរាងអក្សរ I) មានបណ្ដោយស្ពានសរុប៦២២ម៉ែត្រ, បណ្ដោយតួស្ពាន២៨១ម៉ែត្រ, ផ្លូវតភ្ជាប់ក្បាលស្ពានទៅមកខាងមហាវិថីសម្តេច ហ៊ុន សែន (ផ្លូវ៦០ម៉ែត្រ )ប្រវែង១៨០ម៉ែត្រ និងផ្លូវតភ្ជាប់ក្បាលស្ពានទៅមកខាងព្រលានយន្តហោះអន្តរជាតិតេជោ១៦១ម៉ែត្រ។ ស្ពានអាកាសភ្លោះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយគ្រោងចំណាយថវិកាចំនួន ១៦,២០០,៥០០ដុល្លារ។ ស្ពាននេះ នឹងបម្រើដល់ការធ្វើដំណើរទៅកាន់អាកាសយានដ្ឋានអន្តរជាតិតេជោ។ អាកាសយានដ្ឋានអន្តរជាតិតេជោ នឹងដាក់ឱ្យប្រើប្រតិបត្តិការជាផ្លូវការនៅថ្ងៃទី៩ ខែកញ្ញា ខណៈពិធីម្ពោធជាផ្លូវការ នឹងប្រព្រឹត្តទៅនៅ ថ្ងៃទី២០ ខែតុលា ក្រោមវត្តមានសម្ដេចនាយករដ្ឋមន្ត្រី ហ៊ុន ម៉ាណែត៕