ជំនួបសម្តែងការគួរសម និងផ្តល់អនុសាសន៍ណែនាំដល់មន្រ្តីបច្ចេកទេសចំនួន ៤រូប មុននឹងទៅចូលរួមកម្មវិធីបណ្តុះបណ្តាល និងផ្លាស់ប្ដូរបទពិសោធន៍ការងារនៅប្រទេសអូស្រ្តាលី តាមរយៈកម្មវិធី Partnership for Infrastructure (P4I) ទីស្តីការក្រសួង៖ នាព្រឹកថ្ងៃសុក្រ ទី៣០ ខែឧសភា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានទទួលជួបសម្តែងការគួរសម និងផ្តល់អនុសាសន៍ណែនាំដល់មន្រ្តីបច្ចេកទេសចំនួន ៤រូប នៃក្រសួងសាធារណការ និងដឹកជញ្ជូន មុននឹងទៅចូលរួមក្នុងកម្មវិធីបណ្តុះបណ្តាល និងផ្លាស់ប្ដូរបទពិសោធន៍ការងារ រយៈពេល ៦ខែ នៅប្រទេសអូស្រ្តាលី តាមរយៈកម្មវិធី Partnership for Infrastructure (P4I) ដោយមានការចូលរួមពី ឯកឧត្តម ថ្នាក់ដឹកនាំក្រសួង និងមន្រ្តីពាក់ព័ន្ធ។ គោលបំណងចម្បងនៃកម្មវិធីនេះ គឺដើម្បីបង្កើនចំណេះដឹងលើជំនាញបច្ចេកទេសសំខាន់ចំនួន២ គឺបច្ចេកទេសកម្រាលផ្លូវថ្នល់ (Pavement Design) និងបច្ចេកទេសសំណង់ស្ពាន (Bridge Structural Design)។ កម្មវិធីនេះក៏រួមបញ្ចូលនូវមុខជំនាញបច្ចេកទេសពាក់ព័ន្ធផ្សេងទៀត រួមមានគោលការណ៍នៃការសិក្សាការសាងសង់ ការអង្កេតពិនិត្យ ការថែទាំ ការគ្រប់គ្រងហានិភ័យ ការគិតគូរលើផលប៉ះពាល់បរិស្ថាន និងការបន្សំទៅនឹងបម្រែបម្រួលអាកាសធាតុ នៃហេដ្ឋារចនាសម្ព័ន្ធដឹកជញ្ជូន ជាដើម។ ថ្លែងក្នុងអង្គពិធី ឯកឧត្តមរដ្ឋមន្រ្តី បានស្វាគមន៍ និងអបអរសាទរដល់មន្រ្តីបច្ចេកទេសទាំង ៤រូប ដែលទទួលបានឱកាសចូលរួមកម្មវិធីបណ្តុះបណ្តាល និងផ្លាស់ប្ដូរបទពិសោធន៍ការងារខាងលើ ដើម្បីពង្រឹងសមត្ថភាព ជំនាញរបស់ខ្លួន និងបានផ្តល់អនុសាសន៍ណែនាំឱ្យខិតខំសិក្សា រៀនសូត្រ ដកស្រង់ពិសោធន៍ល្អៗនូវហេដ្ឋារចនាសម្ព័ន្ធ និងការរៀបចំរបស់ប្រទេសអូស្រ្តាលីទាំងផ្នែកសាងសង់ផ្លូវថ្នល់ តំណភ្ជាប់ហេដ្ឋារចនាសម្ព័ន្ធស្ពាន និងការពង្រឹងស្តង់ដារបច្ចេកទេស ព្រមទាំងយន្តការអនុវត្តលើការថែទាំ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube