សិក្ខាសាលាបញ្ចប់លើរបាយការណ៍ផែនការអនាម័យ(CWIS) និងការសិក្សាសមិទ្ធិលទ្ធភាពនៅក្នុងក្រុងតាខ្មៅ ខេត្តកណ្តាល ក្រោមក្របខ័ណ្ឌគម្រោងការពន្លឿនការផ្គត់ផ្គង់ទឹកស្អាត និងអនាម័យ(WASAC) ក្រោមឥណទានសម្បទានរបស់ធនាគារពិភពលោក(WB) ភ្នំពេញ៖ នាថ្ងៃព្រហស្បតិ៍ ទី២២ ខែឧសភា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញជាអធិបតីភាពក្នុងសិក្ខាសាលាបញ្ចប់លើរបាយការណ៍ផែនការអនាម័យ(CWIS) និងការសិក្សាសមិទ្ធិលទ្ធភាពនៅក្នុងក្រុងតាខ្មៅ ខេត្តកណ្តាល ក្រោមក្របខ័ណ្ឌគម្រោងការពន្លឿនការផ្គត់ផ្គង់ទឹកស្អាត និងអនាម័យ(WASAC) ក្រោមឥណទានសម្បទានរបស់ធនាគារពិភពលោក(WB) ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ តំណាងធនាគារពិភពលោក តំណាងមន្ទីរសាធារណការ និងដឹកជញ្ជូន ខេត្តកណ្តាល ខេត្តបាត់ដំបង និងខេត្តពោធិ៍សាត់ តំណាងក្រុមហ៊ុនទីប្រឹក្សា CTI និង PPIC តំណាងក្រសួងសេដ្ឋកិច្ច និងហិរញ្ញវត្ថុ និងក្រុមការងារបច្ចេកទេសពាក់ព័ន្ធ។ សិក្ខាសាលានេះរៀបចំឡើងដើម្បីសិក្សាផែនការអនាម័យ និងសិក្សាសមិទ្ធិលទ្ធភាពនៅក្នុងក្រុងតាខ្មៅ ខេត្តកណ្តាល ក្នុងការដោះស្រាយបញ្ហាប្រព័ន្ធលូរំដោះទឹកកខ្វក់ពីគេហដ្ឋាន ភោជនីយដ្ឋាន ផ្ទះសំណាក់ សណ្ឋាគារ។តាមរយៈការរៀបចំប្រព័ន្ធលូដាច់ដោយឡែកនៅក្នុងក្រុងតាខ្មៅ ដើម្បីបង្ហូរទៅចម្រោះក្នុងស្ថានីយប្រព្រឹត្តកម្មទឹកកខ្វក់ ដែលការងារនេះទទួលអនុវត្តដោយក្រុមហ៊ុនទីប្រឹក្សាអន្តរជាតិ CTI Engineering International Co.,Ltd (CTII) ប្រទេសជប៉ុន និងសហការជាមួយទីប្រឹក្សាក្នុងស្រុក Phnom Penh International Consultant Co.,Ltd (PPIC) ដោយគ្របដណ្តប់សង្កាត់ចំនួន៣គឺ ៖ សង្កាត់ស្វាយរលំ សង្កាត់សិត្បូ និងសង្កាត់រការខ្ពស់ ដែលការសិក្សាផ្តោតទៅលើការងារបច្ចេកទេសសំខាន់ៗមួយចំនួនរួមមាន ៖ ការសាងសង់បណ្តាញលូទឹកកខ្វក់ថ្មី ដូចជាបណ្តាញលូមេ បណ្តាញលូខ្នែង និងខ្នែងរង តំណភ្ជាប់តាមផ្ទះ ស្ថានីយបូមទឹកកខ្វក់ និងស្ថានីយព្រឹត្តកម្មទឹកកខ្វក់ថ្មីជាដើម។ល។ ថ្លែងក្នុងឱកាសនោះ ឯកឧត្តមរដ្ឋលេខាធិការ ស្នើដល់អង្គពិធីទាំងមូលចូលរួមជាមតិយោបល់ និងផ្ដល់ជាធាតុចូលសម្រាប់ធ្វើការកែលម្អ ធ្វើយ៉ាងណាឱ្យការអនុវត្តគម្រោងនេះទទួលបានជោគជ័យ។ ឯកឧត្តមរដ្ឋលេខាធិការ បានគូសបញ្ជាក់បន្ថែមថា ការគ្រប់គ្រងអនាម័យឱ្យបានត្រឹមត្រូវតាមបទដ្ឋានបច្ចេកទេស អាចជួយឱ្យប្រជាពលរដ្ឋកាត់បន្ថយការឆ្លងជំងឺផ្សេងៗ និងកាត់បន្ថយចំណាយប្រចាំគ្រួសារ ហើយប្រសិនបើក្នុងសង្គមពោរពេញទៅដោយប្រជាពលរដ្ឋដែលមានជំងឺច្រើន នោះរាជរដ្ឋាភិបាលក៏នឹងត្រូវចំណាយថវិកាជាច្រើន លើវិស័យសុខាភិបាលផងដែរ ហើយកត្តានេះនាំឱ្យរាំងស្ទះ ដល់ការអភិវឌ្ឍវិស័យដទៃទៀត។ ដូចនេះហើយ ទើបរាជរដ្ឋាភិបាលបានខិតខំយកចិត្តទុកដាក់លើវិស័យអនាម័យនេះជាកត្តាអាទិភាព ហើយគម្រោងការពន្លឿនការផ្គត់ផ្គង់ទឹកស្អាត និងអនាម័យនេះ នឹងត្រូវអនុវត្តទៅលើខេត្តគោលដៅចំនួន២ទៀតគឺ ខេត្តបាត់ដំបង និងខេត្តពោធិ៍សាត់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube