វេទិកា "ផ្សព្វផ្សាយជាសាធារណៈអំពីគម្រោងអភិវឌ្ឍន៍ប្រព័ន្ធចម្រោះទឹកកខ្វក់ ក្នុងក្រុងតាខ្មៅ ខេត្តកណ្ដាល និងការងារតភ្ជាប់បណ្តាញលូទឹកកខ្វក់តាមខ្នងផ្ទះ កណ្ដាល៖ នាព្រឹកថ្ងៃព្រហស្បតិ៍ ទី២៤ ខែមេសា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញចូលរួមជាអធិបតីក្នុងវេទិកា "ផ្សព្វផ្សាយជាសាធារណៈអំពីគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្រុងតាខ្មៅ និងការងារតភ្ជាប់បណ្តាញលូទឹកកខ្វក់តាមខ្នងផ្ទះ ដោយមានការអញ្ជើញចូលរួមពី ឯកឧត្តមនាយករងគម្រោង ប្រធានគម្រោង សមាជិក-សមាជិកាគម្រោង តំណាងឯកឧត្តមអភិបាលខេត្តកណ្តាល តំណាងលោកអភិបាលក្រុងតាខ្មៅ ប្រធាន-អនុប្រធានមន្ទីរ មន្ត្រីពាក់ព័ន្ធ តំណាងក្រសួងសេដ្ឋកិច្ចនិងហិរញ្ញវត្ថុ មន្ទីរ-ស្ថាប័នពាក់ព័ន្ធជុំវិញខេត្ត តំណាងក្រុមហ៊ុនទីប្រឹក្សាគម្រោង តំណាងក្រុមហ៊ុនសាងសង់ អជ្ញាធរ និងប្រជាពលរដ្ឋក្នុងមូលដ្ឋានជាច្រើនរូប។ កម្មវិធីនេះរៀបចំឡើងដើម្បីធ្វើការផ្សព្វផ្សាយដល់អាជ្ញាធរមូលដ្ឋាន ក៏ដូចជាបងប្អូនប្រជាពលរដ្ឋ ឱ្យបានជ្រាប និងយល់ច្បាស់អំពីគម្រោងអភិវឌ្ឍន៍ប្រព័ន្ធចម្រោះទឹកកខ្វក់ ក្នុងក្រុងតាខ្មៅ ខេត្តកណ្តាល។ ឆ្លៀតក្នុងឱកាសនោះ ឯកឧត្តមរដ្ឋលេខាធិការ និងជានាយកគម្រោង បានគូសបញ្ជាក់អំពីអត្ថប្រយោជន៍ដែលបងប្អូនប្រជាពលរដ្ឋនឹងទទួលបានផ្នែកអនាម័យ សុខុមាលភាពសាធារណ: កាត់បន្ថយចំណាយក្នុងការព្យាបាលជំងឺ បង្កើនសោភ័ណភាពក្នុងតំបន់ដែលអាចទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាក្នុងតំបន់របស់ខ្លួន ដែលអាចបង្កើនប្រាក់ចំណូលបន្ថែមក្នុងគ្រួសារផងដែរ។ ម៉្យាងវិញទៀតបងប្អូនប្រជាពលរដ្ឋនឹងទទួលបានការតភ្ជាប់បណ្តាញលូតាមខ្នងផ្ទះ ចូលប្រព័ន្ធលូសាធារណៈដោយមិនគិតថ្លៃ(ករណីការដាក់ពាក្យស្នើសុំ ឋិតក្នុងរយៈពេលដែលគម្រោងកំពុងដំណើរការ) ហើយបន្ទាប់ពីគម្រោងត្រូវបានបញ្ចប់ ប្រសិនបងប្អូនប្រជាពលរដ្ឋមានបំណងចង់តភ្ជាប់បណ្តាញលូ ត្រូវគិតថ្លៃសេវាតាមជាក់ស្តែង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube