បាត់ដំបង៖ ដើម្បីផ្តល់ឱកាសដល់ភ្ញៀវទេសចរជាតិ អន្តរជាតិ ជាពិសេសប្រជាពលរដ្ឋ បានទៅចូលរួមកម្សាន្តសប្បាយរីករាយ ជាមួយក្រុមគ្រួសារ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៨ គ.ស២០២៥នេះ ក្រុមហ៊ុន ROYAL RAIWAY CAMBODIA របស់អ្នកឧកញ៉ា គិត ម៉េង បានដាក់ឱ្យដំណើរការនូវទូរថភ្លើង KIHA រយៈពេល៦ថ្ងៃ សម្រាប់ការធ្វើដំណើរទាំងទៅ និងមកវិញ រាជធានីភ្នំពេញ និងខេត្តបាត់ដំបង ។ ការបើកឱ្យដំណើរការទូរថភ្លើង សម្រាប់ដឹកភ្ញៀវទេសចរជាតិ អន្តរជាតិ និងប្រជាពលរដ្ឋរបស់ក្រុមហ៊ុន ROYAL RAIWAY CAMBODIA នាពេលនេះបានធ្វើឡើងមានរយៈពេល៦ថ្ងៃ គឺចាប់ពីថ្ងៃទី១០ ដល់ថ្ងៃទី១៣ ខែមេសា ឆ្នាំ២០២៥ និងថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៥ ជាមួយនឹងតម្លៃគឺនៅដដែល ។ ក្រុមគ្រួសារអ្នកស្រី ប៊ុត ផល្លី រស់នៅឃុំអន្លង់វិល ស្រុកសង្កែ សុទ្ធតែបានបង្ហាញនូវភាពសប្បាយរីករាយនឹងការធ្វើដំណើរតាមរថភ្លើងប្រកបដោយសុវត្ថិភាព និងបានគយគន់ទេសភាពបែបធម្មជាតិតាមដងផ្លូវជាហូរហែរ ខណៈពួកគាត់ធ្លាប់ជិះរថភ្លើង បានចំនួន៤ដងមកហើយ គឺមិនចេះធុញទ្រាន់នោះឡើយ ។ ចំពោះប្អូនប្រុស ហ៊ុល លីហេង រស់នៅភ្នំពេញ ក្នុងពេលមកលេងម្តាយរបស់ខ្លួននៅខេត្តបាត់ដំបង បានបញ្ជាក់ដែរថា ការជិះរថភ្លើង គឺពិតជាមានភាពងាយស្រួល មានភាពសប្បាយ និងប្លែកភ្នែកនឹងការបានឃើញទេសភាពតាមដងផ្លូវ មិនស្ទះចរាចរណ៍នោះឡើយ ។ គួររម្លឹកដែរថា ក្រុមហ៊ុន ROYAL RAIWAY CAMBODIA របស់អ្នកឧកញ៉ា គិត ម៉េង កាលពីពេលកន្លងទៅនេះ បាននាំចូលទូរថភ្លើងជាច្រើនគ្រឿងពីប្រទេសជប៉ុន ដែលទូរថភ្លើងប្រភេទថ្មី និងទំនើបនេះ ត្រូវបានបំពាក់ដោយម៉ាស៊ីនត្រជាក់ ជាមួយកៅអីអង្គុយងាយស្រួល និងមានផាសុខភាពផងដែរ ហើយការធ្វើវឌ្ឍនភាពនេះ គឺជាដំណើរឆ្ពោះទៅមុខមួយជំហានទៀតសម្រាប់ក្រុមហ៊ុន ROYAL RAIWAY CAMBODIA ក្នុងបេសកកម្មរបស់ខ្លួន ដើម្បីធ្វើជាឆ្អឹងខ្នងនៃបណ្តាញដឹកជញ្ជូនរបស់ប្រទេសកម្ពុជា ដោយធានាបាននូវដំណោះស្រាយដឹកជញ្ជូនប្រកបដោយសុវត្ថិភាព និងគួរឱ្យទុកចិត្តសម្រាប់អនាគតរបស់ប្រទេសជាតិ ។ សូមបញ្ជាក់ថា ការដាក់ឱ្យដំណើរការនូវទូរថភ្លើង KIHA រយៈពេល៦ថ្ងៃរបស់ក្រុមហ៊ុន ROYAL RAIWAY CAMBODIA សម្រាប់ថ្ងៃទី១០ ដល់១៣ ខែមេសា និងថ្ងៃទី១៧ ដល់១៨ ខែមេសា ឆ្នាំ២០២៥ គឺទិសដៅពីភ្នំពេញ ទៅបាត់ដំបង ចេញដំណើរនៅម៉ោង ៦ និង៤០នាទីព្រឹក រីឯទិសដៅពីបាត់ដំបង មកភ្នំពេញ ចេញដំណើរនៅម៉ោង៣ និង០០នាទីរសៀល ។ ការជ្រើសរើសយកការជិះរថភ្លើងពីរាជធានីភ្នំពេញ ទៅខេត្តបាត់ដំបង និងពីខេត្តបាត់ដំបង ទៅរាជធានីភ្នំពេញ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលនេះ គឺជាជម្រើសដ៏ល្អសម្រាប់ការធ្វើដំណើរប្រកបដោយសុវត្ថិភាព និងមានជំនឿទុកចិត្តខ្ពស់ ។ ជាងនេះទៀតនោះ ការជិះរថភ្លើងអាចគយគន់ទេសភាពតាមដងផ្លូវដ៏ស្រស់ស្អាត កៅអីធំទូលាយ ម៉ាស៊ីនត្រជាក់ មានផាសុខភាព មានភាពងាយស្រួល មានសុវត្ថិភាព ជួយកាត់បន្ថយការកកស្ទះចរាចរណ៍ រីឯសំបុត្រក៏មានតម្លៃទាបថែមទៀតផង៕