ជំនួបពិភាក្សាការងារជាមួយគណៈប្រតិភូធនាគារអភិវឌ្ឍន៍អាស៊ី លើប្រធានបទយេនឌ័រ និងការបម្រែបម្រួលអាកាសធាតុ ទីស្ដីការក្រសួង ៖ នាថ្ងៃពុធ ទី២៦ ខែមីនា ឆ្នាំ២០២៥ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញទទួលជួបពិភាក្សាការងារជាមួយគណៈប្រតិភូធនាគារអភិវឌ្ឍន៍អាស៊ី លើប្រធានបទយេនឌ័រ និងការបម្រែបម្រួលអាកាសធាតុ ដោយមានការចូលរួមពីមន្ត្រីពាក់ព័ន្ធផងដែរ។ កិច្ចប្រជុំបានពិភាក្សាទៅលើការបញ្ជ្រាបយេនឌ័រទៅក្នុងផែនការជាតិរួមចំណែកឆ្លើយតបនឹងការប្រែប្រែលអាកាសធាតុនៅកម្ពុជា ដំណាក់កាលទី៣ (NDC 3.0) និងវឌ្ឍនភាព សមិទ្ធផល បញ្ហាប្រឈម និងវិធានការនានាក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តី ក៏ដូចជាដើម្បីបញ្ជាក់អំពីតម្លៃនៃការទទួលបានសមភាពរវាងស្រ្តី និងបុរសសម្រាប់ការអភិវឌ្ឍវិស័យសាធារណការ និងដឹកជញ្ជូន។ ការចូលរួមជំរុញឱ្យគ្រប់ដៃគូពាក់ព័ន្ធបន្តអនុវត្តវិធានការផ្នែកគោលនយោបាយ កម្មវិធី និងសកម្មភាពជាក់លាក់នានា ជាពិសេសលើកកម្ពស់ការចូលរួមរបស់ស្ត្រីក្នុងយុទ្ធសាស្ត្រជាតិក្នុងការឆ្លើយតបនឹងការប្រែប្រួលអាកាសធាតុ។ បន្ថែមពីនេះទៀត លោកជំទាវរដ្ឋលេខាធិការ បានគូសបញ្ជាក់អំពីតួនាទីដ៏សំខាន់របស់ស្ត្រីក្នុងការកសាង និងអភិវឌ្ឍន៍ប្រទេសជាតិ និងជំរុញលើកទឹកចិត្តស្ត្រីឱ្យបន្តអភិវឌ្ឍន៍ខ្លួន តាមរយៈការអប់រំ បណ្តុះបណ្តាល និងទទួលយកតួនាទីជាអ្នកដឹកនាំកាន់តែច្រើនថែមទៀត នៅក្នុងវិស័យសាធារណការ និងដឹកជញ្ជូន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube