ដើមផ្កាត្របែកព្រៃដែលបានដាំនៅកណ្ដាលទ្រូងផ្លូវតាមបណ្ដោយផ្លូវជាតិលេខ ៥ ចាប់ពីផ្លូវបំបែកហាយវេ ក្នុងទឹកដីស្រុកសង្កែរហូតដល់ស្រុកមោងឬស្សីត្រង់ព្រំប្រទល់ខេត្តពោធិ៍សាត់ ហើយដែលបានងាប់ប្រមាណជាង ១ ពាន់ ដើម ត្រូវបានមន្រ្តីជំនាញបានដាំជួសឡើងវិញជាបណ្ដើរៗ។ការដាំដើមផ្កាត្របែកព្រៃនេះ គឺជានាទីរបស់ក្រុមហ៊ុនម៉ៅការស្ថាបនាផ្លូវជាតិលេខ ៥ ចាប់ពីភ្នំពេញដល់ក្រុងប៉ោយប៉ែត។ ប៉ុន្តែក្រោយមកគេសង្កេតឃើញដើមផ្កាត្របែកព្រៃបានងាប់ដោយអន្លើនៅតាមដងផ្លូវ ដោយមិនដឹងមូលហេតុព្រោះកន្លែងខ្លះគេសង្កេតឃើញពុំមានការស្រោចទឹក ឬយកចិត្តទុកដាក់ថែទាំនោះឡើយ ធ្វើឱ្យស្មៅដុះទ្រុបទ្រុលសឹងតែមើលមិនឃើញដើមផ្កាត្របែកព្រៃ។ចាប់តាំងពីថ្ងៃ១ មករា ឆ្នាំ២០២៥ រហូតមក ក្រុមហ៊ុនបានបញ្ចប់គម្រោង ហើយក៏បានប្រគល់មកឲ្យមន្ទីរសាធារណការ និងដឹកជញ្ជូនខេត្តបាត់ដំបងជាអ្នកគ្រប់គ្រងបន្ត ខណៈដែលលោក ព្រួញ រិទ្ធថា ប្រធានមន្ទីរសាធារណការនិងដឹកជញ្ជូនខេត្ត ក៏បានចាត់កម្លាំងឲ្យចុះទៅពិនិត្យមើលដើមផ្កាត្របែកព្រៃដែលងាប់គ្មានមូលហេតុ។ក្រោយពីពិនិត្យជាបន្តបន្ទាប់ កម្លាំងជំនាញបានសង្កេតឃើញថា ការងាប់ដើមផ្កាត្របែកព្រៃនេះគឺភាគច្រើនឌួងស៊ីនៅខាងក្រោមគល់ ហើយមន្រ្តីបច្ចេកទេសបានដាក់ថ្នាំនៅខាងក្រោមគល់មុននឹងដាំដើមថ្មីជំនួសវិញ។លោក ព្រួញ រិទ្ធថា បានសង្កត់ធ្ងន់ថា នៅលើចម្ងាយផ្លូវប្រមាណជាង ៦០ គីឡូម៉ែត្រក្នុងភូមិសាស្រ្តខេត្តបាត់ដំបង ដើមផ្កាត្របែកព្រៃងាប់ប្រមាណជាង ១ ពាន់ ដើម។ លោកបានស្នើសុំក្រុមហ៊ុនចាស់ដែលនៅសេសសល់ខ្លះនិងទិញខ្លះ ដើម្បីឲ្យមន្ត្រីធ្វើការជួសឡើងវិញដើមដែលងាប់ និងដាក់រថយន្តចំនួន ៤ គ្រឿង ធ្វើការស្រោចទឹកនិងថែទាំ ក្នុងគោលបំណងឲ្យមានសោភ័ណភាពតាមដងផ្លូវនៅពេលដែលផ្កាត្របែកព្រៃចេញផ្កាគ្រប់ដើម៕