កិច្ចប្រជុំពិគ្រោះយោបល់កម្រិតបច្ចេកទេស ដើម្បីសម្របសម្រួលប្រមូលធាតុចូលសម្រាប់ការរៀបចំគម្រោងថវិកាឆ្នាំ២០២៦ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃពុធ ទី១៩ ខែមីនា ឆ្នាំ២០២៥ ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញដឹកនាំកិច្ចប្រជុំពិគ្រោះយោបល់កម្រិតបច្ចេកទេស ដើម្បីសម្របសម្រួលប្រមូលធាតុចូលសម្រាប់ការរៀបចំគម្រោងថវិកាឆ្នាំ២០២៦ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីថ្នាក់ដឹកនាំ និងមន្ត្រីជំនាញនៃអង្គភាពថវិកាក្រោមឱវាទក្រសួង។ កិច្ចប្រជុំនេះត្រូវបានរៀបចំឡើង ក្នុងគោលបំណងដើម្បីពិភាក្សា និងពិគ្រោះយោបល់ក្នុងក្របខ័ណ្ឌជារួម ជាមួយអង្គភាពថវិកាក្រោមឱវាទក្រសួង លើការពិនិត្យ និងតម្រូវការកែសម្រួលរចនាសម្ព័ន្ធថវិកា និងផែនការសមិទ្ធកម្មប្រចាំឆ្នាំនៅកម្រិតកម្មវិធី អនុកម្មវិធី និងចង្កោមសកម្មភាព ដោយធ្វើការពិនិត្យអាទិភាពលើគោលនយោបាយថ្មីៗ (New Policy) និងកត្តាជំរុញតម្រូវការ (Demand Drivers) ដើម្បីជាមូលដ្ឋានក្នុងការត្រៀមរៀបចំគម្រោងថវិកាប្រចាំឆ្នាំ២០២៦ ខាងមុខ។ ជាលទ្ធផល ឯកឧត្តមប្រធានអង្គប្រជុំ បានស្នើឱ្យអង្គភាពថវិកាក្រោមឱវាទក្រសួង ត្រូវគិតគូរទៅលើអាទិភាពគោលនយោបាយ និងសកម្មភាព ដែលជាតម្រូវការចាំបាច់របស់ខ្លួនឱ្យបានលម្អិតគ្រប់ជ្រុងជ្រោយ ដើម្បីត្រៀមប្រជុំពិនិត្យ ពិភាក្សា និងចរចាថវិកាប្រចាំឆ្នាំ កម្រិតបច្ចេកទេស និងកម្រិតថ្នាក់ដឹកនាំជាមួយក្រសួងសេដ្ឋកិច្ច និងហិរញ្ញវត្ថុ នាពេលខាងមុខ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube