កិច្ចប្រជុំអនុគណៈកម្មាធិការមុខងារ និងធនធាន នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ទីស្តីការក្រសួងមហាផ្ទៃ៖នាថ្ងៃចន្ទ ទី២០ ខែមករា ឆ្នាំ២០២៥ ឯកឧត្តម ស៊ឹង សុគង់ អនុរដ្ឋលេខាធិការក្រសួងសាធារណការ និងដឹកជញ្ជូន និងជាសមាជិក អនុគណៈកម្មាធិការមុខងារ និងធនធាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប ) បានអញ្ជើញចូលរួមកិច្ចប្រជុំអនុគណៈកម្មាធិការមុខងារ និងធនធាននៃគ.ជ.អ.ប. ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យថ្នាក់ក្រោមជាតិ (គ.ជ.អ.ប.) ដោយមានការអញ្ជើញចូលរួមពីសមាជិកអនុគណៈកម្មាធិការមុខងារ និងធនធាន តំណាងក្រសួង ស្ថាប័ន ថ្នាក់ដឹកនាំ មន្ត្រីបច្ចេកទេស នៃលេខាធិការដ្ឋាន គ.ជ.អ.ប. និងមន្ត្រីជំនាញពាក់ព័ន្ធ។ កិច្ចប្រជុំនេះធ្វើឡើងដើម្បីពិនិត្យ និងពិភាក្សាលើបញ្ហាប្រឈម តាមរបៀបវារៈនីមួយៗ និងការកំណត់វិធានការណ៍ដោះស្រាយ កំណត់នូវសំណើ និងសំណូមពរផ្សេងៗទៀតសម្រាប់កិច្ចដំណើរការរបស់អនុគណៈកម្មាធិការមុខងារនិងធនធាននៃ គ.ជ.អ.ប. ដែលស្នើឡើងដោយរដ្ឋបាលថ្នាក់ក្រោមជាតិ។ សូមជម្រាបជូនផងដែរថា ក្រសួងសាធារណការ និងដឹកជញ្ជូន បានចូលរួមការអនុវត្តក្នុងដំណើរការនៃការកែទម្រង់វិមជ្ឈការ និងវិសហមជ្ឈការ នៅឆ្នាំ២០១៥ មកទល់នឹងបច្ចុប្បន្ន បានសម្រេចផ្ទេរមុខងារចំនួន៨ (ដឹកជញ្ជូនផ្លូវគោក ៥មុខងារ និង ដឹកជញ្ជូនផ្លូវទឹក ៣មុខងារ) ឱ្យទៅអង្គភាពច្រកចេញចូលតែមួយ នៃរដ្ឋបាលរាជធានី ខេត្ត និងផ្ទេរមុខងារ ចំនួន ០៧(សាធារណការ ២មុខងារ ដឹកជញ្ជូនផ្លូវគោក ៤មុខងារ និងដឹកជញ្ជូនផ្លូវទឹក ១មុខងារ) ឱ្យទៅការិយាល័យច្រកចេញ ចូលតែមួយនៃរដ្ឋបាលក្រុង ស្រុក ខណ្ឌហើយក្រសួងកំពុងបន្តចូលរួមអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិដំណាក់កាលទី២ រយៈពេល១០ឆ្នាំបន្ត (២០២១-២០៣០) ដែលមានគោលដៅពង្រឹង និងការកែសម្រួល រចនាសម្ព័ន្ធ និងប្រព័ន្ធអភិបាលកិច្ចរដ្ឋបាល ថ្នាក់ក្រោមជាតិ ឱ្យមានលក្ខណៈទំនើប ស្វ័យភាព ប្រសិទ្ធភាព តម្លាភាព និងគណនេយ្យភាព ក្នុងការផ្តល់សេវាសាធារណៈ និងការអភិវឌ្ឍមូលដ្ឋានផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube